ភ្នំពេញ៖ព្រាប សុវត្ថិ ដែលឡើងជាឧកញ៉ាជាង២ខែមកនេះបទចម្រៀងរបស់លោកលែងសូវមានល្បីល្បាញដូចមុនទៀតហើយពោលគឺអ្នកនិយមលោកឧកញ៉ាស្នាយ ច្រៀងតែបទចាស់ៗនៅហង្សមាសឡើងវិញ។ប៉ុន្ដែព្រាប សុវត្ថិ ហាក់មិនក្វល់ក្វាយឬអន់ចិត្តរឿងGalaxy ធ្វើបទចម្រៀងឲ្យលោកមិនល្បីដូចនៅហង្សមាសនោះទេ តែផ្ទុយទៅវិញតារាវ័យ៤៧ឆ្នាំរូបនេះនៅតែបង្ហាញភាពរីករាយជាមួយថៅកែផលិតកម្មរបស់ខ្លួនខណៈដែលនៅខែសីហាឆ្នាំ២០២២ ខាងមុខនេះឈានចូលមកដល់ខួប២ឆ្នាំនៃការចាកចេញរបស់លោក ពីហង្សមាសចូលផលិតកម្មថ្មីនោះហើយ។
តាមរយៈសកម្មភាពរបស់ព្រាប សុវត្ថិ នៅពេលនេះបញ្ជាក់ថាលោកផ្ដោតលើការធ្វើជំនួញច្រើនជាងធ្វើបទចម្រៀងហេតុនេះហើយនៅសល់ជាង៣ឆ្នាំទៀតនៃការចុះកុងត្រារបស់លោកសុវត្ថិ ជាមួយGalaxy គេអាចសន្និដ្ឋានបានថាលោកនឹងគ្មានអ្វីដែលថ្មីៗ ហើយប្លែកជាងពេលនេះទេបើទោះជាមុននេះអតីតអ្នកនិពន្ធនិងដឹកនាំសម្ដែងរបស់ហង្សមាសដល់ទៅ២រូបគឺលោកខាំ ភូរិ និងសុខ ជំនោរ ទៅចាប់ដៃគ្នានៅទ្រនុំរបស់លោកឧកញ៉ាស្នាយ ក្ដី។អ្វីដែលគូរឲ្យកត់សម្គាល់នោះព្រាប សុវត្ថិ កាន់តែបង្ហាញកាយវិការស្រលាញ់ភរិយាលោកអ្នកស្រីឡុង ស្រីមុំ ដែលពេលនេះត្រូវបានគេហៅថាជាជំទាវៗ នោះមិនចាញ់គូស្នេហ៍យុវវ័យឡើយដូចជាលោកអោបថើបប្រពន្ធនៅចំពោះមិត្តភក្ដិជាដើម។ប៉ុន្ដែមុននេះអ្នកស្រីឡុង ស្រីមុំ បានសួរទៅលោកសុវត្ថិ ថាតើចង់បានកូនថែមទៀតឬអត់នោះលោកឧកញ៉ាស្នាយ បែជាគាំងចម្លើយនិយាយមិនចេញទៅវិញ។
គូរបញ្ជាក់ថាព្រាប សុវត្ថិ បានឈជើងនៅហង្សមាសរយៈពេល២៣ឆ្នាំ(១៩៩៧-២០២០)ដោយបន្សល់បទចម្រៀងជាង៣ពាន់បទ ហើយក្នុងអាជីពចម្រៀងជាង២ទសវត្សន៍នេះលោកឧកញ៉ាស្នាយ ត្រូវមនុស្សជិតដិតទម្លាយប្រាប់អ្នកកាសែតកាលពីខែកញ្ញាឆ្នាំ២០២០ ថាអតីតតារាហង្សមាសរូបនេះសល់ទ្រព្យចំនួនដល់ទៅ៣០លានដុល្លារ។ទុំហ៊ុំទឹកលុយនេះសម្រាប់តារាស្រុកខ្មែរគឺច្រើនខ្លាំងណាស់ទើបគេហៅលោកសុវត្ថិ ថាជា”សេដ្ឋីៗ”ខណៈកាលពីពេលថ្មីៗនេះលោកទើបទិញរថយន្ដទំនើបម៉ាកRolls Royce Ghost តម្លៃខ្ទង់ជិត៣០ម៉ឺនដុល្លារ បន្ថែមពីលើឡានលោកមានស្រាប់ដូចជាBmw, Range Rover ,Ford និងAlphard ជាដើមនោះទៀតផង។
មហាជនចាំមើលថានៅពេលដែលព្រាប សុវត្ថិ លែងសូវមានបទល្បីៗហើយក្លាយជាឧកញ៉ាបែបនេះតើលោកនឹងឈប់ឡើងឆាកតន្រ្ដីទៀតឬយ៉ាងណា?
