ភ្នំពេញ ៖ ជនសង្ស័យម្នាក់ ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពលួចដោះក្រវិលពីនារីម្នាក់ បាន១ចំហៀង កាលពីវេលាម៉ោង ១០និង៣០នាទីព្រឹក ថ្ងៃទី១៧ ខែកក្កដា ឆ្នាំ២០២២ នៅចំណុចផ្សារកសិផល ជ្រោយចង្វា ផ្លូវកែវចិន្តា ក្រុមទី១០ ភូមិ០៣ សង្កាត់ជ្រោយចង្វា ខណ្ឌជ្រោយចង្វា។
ករណីខាងលើនេះ ពេលសមត្ថកិច្ចទទួលបានព័ត៌មានពីប្រជាពលរដ្ឋ ក៏បានចុះទៅអន្តរាគមន៍ ដល់កន្លែងកើតហេតុ បន្ទាប់មក សមត្ថកិច្ចបានធ្វើការឃាត់ខ្លួនជនសង្ស័យម្នាក់ មកប៉ុស្តិ៍នគរបាលរដ្ឋបាលជ្រោយចង្វា ដើម្បីធ្វើការសាកសួរ ។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះទុំ ភី ភេទប្រុស អាយុ៣៧ឆ្នាំ មុខរបរមិនពិតប្រាកដ មានលំនៅបច្ចុប្បន្ន ផ្ទះជួល ផ្លូវលំភូមិ០១ សង្កាត់ជ្រោយចង្វា ខណ្ឌជ្រោយចង្វា។ ចំណែកវត្ថុតាងដែលត្រូវសមត្ថកិច្ចដកហូត រួមមាន ក្រវិលមាស ១ចំហៀង ទម្ងន់២ហ៊ុន។ ម៉ូតូម៉ាកគុបជ្រុង ១គ្រឿង ពណ៌បៃតងចាស់ ពុំមានស្លាកលេខ និងទូរស័ព្ទដៃ ១គ្រឿង ម៉ាក NOKIA ពណ៌ខៀវ ។
ក្រោយពីធ្វើការសាកសួរ ជនសង្ស័យឈ្មោះទុំ ភី បានឆ្លើយសារភាពថា រូបខ្លួនពិតជាបានធ្វើសកម្មភាពលួចដោះក្រវិលមាស ១ចំហៀង ពីនារីរងគ្រោះ ប្រាកដមែន។ ករណីនេះ នារីរងគ្រោះ បានដាក់ពាក្យបណ្តឹង សំណូមពរសមត្ថកិច្ចចាត់ការតាមនីតិវិធី។
ចំណែកវត្ថុតាងដកហូត ក្រវិលមាស មួយចំហៀង ទម្ងន់២ហ៊ុន សមត្ថកិច្ចបានប្រគល់ជូនជនរងគ្រោះវិញ។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនទៅកាន់ផ្នែកជំនាញ នៃអធិការដ្ឋាននគរបាលខណ្ឌជ្រោយចង្វា ដើម្បីចាត់ការបន្តតាមនីតិវិធី៕