ខេត្តកណ្តាល ៖ ជនសង្ស័យប្រុសស្រី ចំនួន៣នាក់ រួមនិងក្មេងប្រុសតូចម្នាក់ផង បានធ្វើសកម្មភាពលួចកាបូបលុយរបស់អ្នកលក់ផ្លែឈើម្នាក់ នៅក្នុងផ្សារ តែត្រូវអ្នកលក់ក្បែរនោះប្រទះឃើញ ស្រែកឆោឡោផ្អើលដល់សមត្ថកិច្ច ដេញចាប់ឃាត់ខ្លួនបានទាំង៤នាក់ ប៉ុន្តែក្រោយមក ដោយក្មេងប្រុសតូចម្នាក់ជាអនីតិជន ត្រូវបានព្រះរាជអាជ្ញាអនុញ្ញាតឱ្យក្រុមគ្រួសារមកធានាយកទៅវិញ នៅសល់ប្រុសស្រី ៣នាក់ទៀត បញ្ជូនទៅចាត់ការតាមច្បាប់។
ករណីអំពើលួច (កាបូបលុយ) ខាងលើនេះ បានកើតឡើង កាលពីថ្ងៃទី២៨ ខែកក្កដា ឆ្នាំ២០២២ នៅចំណុចផ្សារអ្នកលឿង ត្រើយខាងលិច ស្ថិតក្នុងភូមិកំពង់ចម្លង ឃុំព្រែកទន្លាប់ ស្រុកលើកដែក។
ជនសង្ស័យទាំង៤នាក់ ដែលត្រូវសមត្ថកិច្ចចាប់ឃាត់ខ្លួន រួមមាន ៖ ទី១-ឈ្មោះគង់ ទីណាង ភេទប្រុស អាយុ៣៤ឆ្នាំ មុខរបរមិនពិតប្រាកដ មានលំនៅ ភូមិ៣ សង្កាត់ឃ្មួញ ខណ្ឌសែនសុខ រាជធានីភ្នំពេញ។ ទី២-ឈ្មោះគង់ ស្រីល័ក្ខ ហៅសង ស្រីអូន ភេទស្រី អាយុ៣៤ឆ្នាំ មុខរបរមិនពិតប្រាកដ មានលំនៅ ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។ និងទី៣-ឈ្មោះនៅ វិត ហៅស្វា ភេទប្រុស អាយុ១៦ឆ្នាំ មុខរបរមិនពិតប្រាកដ មានលំនៅ ភូមិព្រែកតាសេក ឃុំព្រែកតាសេក ស្រុកមុខកំពូល និងទី៤-ជាក្មេងប្រុស អាយុមិនដឹង មុខរបរ សិស្ស មានលំនៅសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ (ជាអនីតិជន ត្រូវបានព្រះរាជអាជ្ញាអនុញ្ញាតឱ្យអាណាព្យាបាលមកធានាយកទៅអប់រំនៅលំនៅឋានវិញ)។
រីឯវត្ថុតាងចាប់យក រួមមាន ១-ម៉ូតូ ចំនួន២គ្រឿង ២-កាបូបស្ពាយ ម៉ាក CG ពណ៌ខ្មៅ របស់ជនសង្ស័យ ចំនួន១។ ៣-កាបូបស្ពាយ ម៉ាក CHIBAO ពណ៌ខ្មៅ (ជារបស់ជនរងគ្រោះ) ចំនួន ១។ ៤-លុយខ្មែរ ៩២៤ ៤០០រៀល (ជារបស់ជនរងគ្រោះ)។ ៥-ទូរស័ព្ទ ចំនួន២គ្រឿង ម៉ាក Samsung ចំនួន១គ្រឿង និងម៉ាកណូគា ចំនួន១គ្រឿង (ជារបស់ជនរងគ្រោះ)។
តាមប្រភពពីសមត្ថកិច្ច បានឱ្យដឹងថា មុនពេលកើតហេតុ ជនរងគ្រោះកំពុងលក់ផ្លែឈើ នៅផ្សារអ្នកលឿង ត្រើយខាងលិច ស្រាប់តែមានបុរសម្នាក់ ចូលមកទិញផ្លែទ្បុងកុង ១គីទ្បូ ដោយឱ្យជនរងគ្រោះរើសឱ្យ ហើយបានប្រាប់ជនរងគ្រោះថា ខ្លួនដួលម៉ូតូ ឈឺក្បាលជង្គង់ ឱនរើស មិនបានទេ ពេលជនរងគ្រោះចុះពីលើគ្រែ រើសផ្លែឈើឱ្យរួចហើយ បុរសនោះបានហុចលុយឱ្យជនរងគ្រោះ ចំនួន៧០០០រៀល ដាក់ចូលកាបូប ហើយជនសង្ស័យបានឱ្យជនរងគ្រោះរើសផ្លែគូលែន ១គីទ្បូទៀត ពេលជនរងគ្រោះកំពុងរើសផ្លែគូលែន ស្រាប់តែមានអ្នកលក់នំបញ្ចុកក្រឡេក ឃើញបក្ខពួកជនសង្ស័យលួចយកកាបូបលុយរបស់ជនរងគ្រោះ ពីក្រោយ ហើយក៏ស្រែកឆោឡោថា មានចោរលួចកាបូបលុយអ្នកលក់ផ្លែឈើបាត់ហើយ។
ភ្លាមនោះកម្លាំងប៉ុស្តិ៍នគរបាលរដ្ឋបាលព្រែកទន្លាប់ កំពុងតែល្បាត បានដេញតាមម៉ូតូជនសង្ស័យពីក្រោយ និងបានរាយការណ៍ជូនលោកអធិការ តាមវិទ្យុទាក់ទង។ ពេលនោះកម្លាំងជំនាញនគរបាលយុត្តិធម៌ បានចេញអន្តរាគមន៍ដេញពីក្រោយភ្លាមៗដែរ និងបានប្រទាក់ក្រឡាជាមួយកម្លាំងអធិការដ្ឋានស្រុកកៀនស្វាយ ជួយចេញពួនស្ទាក់។ រហូតមកដល់វេលាម៉ោង ១១និង៤០នាទីព្រឹក ថ្ងៃដដែល កម្លាំងអធិការដ្ឋាននគរបាលស្រុកកៀនស្វាយ បានឃាត់ខ្លួនជនសង្ស័យ ចំនួន៣នាក់ និងកុមារម្នាក់ នៅលើផ្លូវជាតិលេខ១ ស្ថិតនៅមុខខ្លោងទ្វារចូលវត្តអង្គរជ័យ ក្នុងឃុំដីឥដ្ឋ ស្រុកកៀនស្វាយ និងបានបញ្ជូនទៅអធិការដ្ឋានស្រុកកៀនស្វាយ។ បន្ទាប់មក កម្លាំងនគរបាលស្រុកលើកដែក បានទៅទទួលជនសង្ស័យ និងវត្ថុតាង យកមកអធិការដ្ឋាននគរបាលស្រុកលើកដែក ដើម្បីបន្តនីតិវិធី៕