ខេត្តស្វាយរៀង ៖ កម្លាំងជំនាញផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តស្វាយរៀង នៅថ្ងៃទី០៩ ខែសីហា ឆ្នាំ២០២២ បានបញ្ជូនជនសង្ស័យ៥នាក់ រួមជាមួយគ្រឿងញៀនមួយចំនួន ទៅកាន់សាលាដំបូងខេត្ត ដើម្បីចាត់ការតាមផ្លូវច្បាប់ ករណីជួញដូរ និងប្រើប្រាស់គ្រឿងញៀន។
តាមប្រភពពីសមត្ថកិច្ចខេត្តស្វាយរៀង បានឱ្យដឹងថា កម្លាំងជំនាញអធិការដ្ឋាននគរបាលក្រុងបាវិត បានសហការជាមួយកម្លាំងជំនាញ ការិយាល័យប្រឆាំងគ្រឿងញៀនខេត្ត ក្រោមការសម្របសម្រូលពីលោកខាំ សុផារី ព្រះរាជអាជ្ញា និងលោកឡាយ ជុងហេង ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង បានបើកប្រតិបត្តិការបង្ក្រាបករណីជួញដូរគ្រឿងញៀន មួយលើក នៅសង្កាត់បាវិត ក្រុងបាវិត ដោយ បានឃាត់ខ្លួនជនសង្ស័យជាជនជាតិវៀតណាម ចំនួន៤នាក់ (ស្រី១)។
សមត្ថកិច្ចបានបន្តថា នៅក្នុងប្រតិបត្តិការបង្ក្រាបគ្រឿងញៀននេះ កម្លាំងជំនាញ បានរឹបអូសវត្ថុតាង ថ្នាំញៀន គ្រប់ប្រភេទ (មេតំហ្វេតាមីន កេតាមីន និងអ៊ិចស្តាស៊ី) រួមមាន សារធាតុញៀន សរុបទម្ងន់ ១០០៨,៦៨ក្រាម (ជាង១គីឡូក្រាម) ជញ្ជីងថ្លឹងថ្នាំញៀន ចំនួន៧គ្រឿង ទូរស័ព្ទដៃ ចំនួន១២គ្រឿង កុំព្យូទ័រ Laptop ១គ្រឿង ប្រាក់ដុល្លារ ចំនួន៩២២ដុល្លារ ប្រាក់ដុង ចំនួន ២៨លានដុង និងប្រាក់រៀល ចំនួន ៤ម៉ឺនរៀល ព្រមទាំងឧបករណ៍ជក់ ប្រើប្រាស់មួយចំនួនទៀត៕