ភ្នំពេញ ៖ សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកទឹកចិត្តអតីតជ័យលាភី The Voice Cambodia រដូវកាលទី១ ប៊ុត សីហា ងើបឈរឡើងដោយខ្លួនឯង ទើបមានអ្នកជួយ ហើយត្រូវក្តាប់ឱកាសនេះឲ្យជាប់។ ជាមួយនេះ សម្តេច បានលើកឡើងថា អ្នកជក់គ្រឿងញៀន គឺជាជនរងគ្រោះ សូមកុំមានការរើសអើង ជាពិសេសនៅពេលគេចេះកែខ្លួន។
សម្តេចហ៊ុន សែន បានលើកឡើងបែបនេះ នៅពេលបានស្តាប់ការបកស្រាយចម្រៀងរបស់តារាចម្រៀង ប៊ុត សីហា បទ «អរគុណសន្តិភាព» ក្នុងកម្មវិធី «ចម្រៀងគ្រួសារខ្មែរ» កាលពីយប់ថ្ងៃទី១២ ខែកញ្ញា ឆ្នាំ២០២២ ។
សម្តេចនាយករដ្ឋមន្ត្រី បានប្រើគណនីហ្វេសប៊ុក របស់សម្តេ ចូលទៅបញ្ចេញយោបល់ (Comment) ថា «ប៊ុត សីហា ចម្រៀងនេះមានន័យណាស់។ កូនងើបឈរឡើងដោយខ្លួនឯង ទើបមានអ្នកជួយ។ កូនត្រូវក្តាប់ឱកាសនេះឲ្យជាប់។ អ្នកជក់គ្រឿងញៀន គឺជាជនរងគ្រោះ ដូចនេះសូមកុំមានការរើសអើង ពិសេសនៅពេលគេចេះកែខ្លួន។ សូមបញ្ឈប់ការប្រើប្រាស់គ្រឿងញៀន ទើបយើងមានសេចក្តីសុខទាំងអស់គ្នា»។
គួរបញ្ជាក់ថា តារាចម្រៀង ប៊ុត សីហា ជាជ័យលាភីកម្មវិធីប្រឡងចម្រៀងលំដាប់ពិភពលោក «The Voice Cambodia» រដូវកាលទី១ ដែើរៀបចំដោយស្ថានីយទូរទស្សន៍ហង្សមាស តែក្រោយពីមានឈ្មោះល្បី មិនបានប៉ុន្មាន ស្រាប់តែព្យុះនៃភាពអាស្រូវបានបោកបក់ពន្លិចប៊ុត សីហា ទៅបាត់ឈឹង បន្ទាប់ពីមានព័ត៌មានថា តារារូបនេះរងគ្រោះពាក់ព័ន្ធការប្រើប្រាស់គ្រឿងញៀន តែយ៉ាងណា ដោយសារការដឹងខ្លួនខុស និងចេះកែខ្លួនឡើងវិញ នៅពេលនេះ ប៊ុត សីហា បានចាប់ផ្តើមទទួលបានការគាំទ្រឡើងវិញជាបណ្តើរៗ នៅពេលគេបានវិលមកចាប់អាជីពចម្រៀងជាថ្មី សូម្បីសម្តេចនាយករដ្ឋមន្ត្រី ក៏ចាប់អារម្មណ៍នឹងតារាចម្រៀងរូបនេះផងដែរ។
ជាមួយគ្នានេះ អ្នកឧកញ៉ា ឡេង ណាវ៉ាត្រា អគ្គនាយកផលិតកម្មហ្គាឡាក់ស៊ី ណាវ៉ាត្រា ក៏សម្រេចផ្តល់ឱកាសជាថ្មីដល់ប៊ុត សីហា ផងដែរ បន្ទាប់ពីមានការលើកឡើងពីលោកម៉ិច សីហា។
អ្នកឧកញ៉ា ឡេង ណាវ៉ាត្រា បានសរសេរក្នុងទំព័របណ្តាញសង្គម ហ្វេសប៊ុក របស់លោក នៅថ្ងៃទី១២ ខែកញ្ញា ឆ្នាំ២០២២ ថា «ខ្ញុំសូមកោតសរសើរនូវសន្ដានចិត្តលោកគ្រូ ដែលមានបំណងចង់ជួយជ្រោមជ្រែងមនុស្សដែលធ្លាប់មានកំហុស និងកែប្រែដើម្បីអនាគតថ្មី។ សម្រាប់ខ្ញុំ មិនមានទោមនស្សនឹងមនុស្សមានសមត្ថភាពនោះទេ ហើយក៏ទទួលស្គាល់នូវសំឡេងពីធម្មជាតិដែរ។ កន្លងទៅ ពេលដែលបើកក្រុមហ៊ុនដំបូង លោកយឹម តាស្រង់ ដែលជាអ្នកគ្រប់គ្រង បានទាក់ទងមនុស្សពីរនាក់ គឺ តន់ ចាន់សីម៉ា និងប៊ុត សីហា ។ ហើយណាត់គាត់ជួប ប៉ុន្តែប្អូនប៊ុត សីហា គាត់បែរជាមិនគោរពពេលវេលាមកជួប ហើយក្រុមហ៊ុន ក៏សម្រេចមិនចរចាជជែកគ្នាទៀត តែយ៉ាងណាក៏ដោយ ពេលនេះ បើសិនជាពុកម៉ែបងប្អូនគាំទ្រឲ្យខ្ញុំបាទ ផ្ដល់ឱកាសឲ្យគាត់ ខ្ញុំនឹងផ្ដល់ឱកាសគាត់ តែត្រូវសួរគាត់សិនថា គាត់ចង់ឬអត់?»។
អ្នកឧកញ៉ា ឡេង ណាវ៉ាត្រា សរសេរបន្តថា «ទោះបីជាក្រុមហ៊ុនព្រមទទួល ក៏ប៉ុន្តែដាច់ខាតកុំឲ្យលើសខ្សែបន្ទាត់ក្រហម ត្រូវតែគោរពវិន័យ និងលក្ខន្តិកៈរបស់ក្រុមហ៊ុន ហើយក៏សូមឱ្យបងប្អូនទាំងអស់គ្នា ធ្វើជាសាក្សីផង។ សំណេរខ្ញុំនេះ ក៏អាចជាភ័ស្តុតាងមួយ កុំឱ្យអ្នកដែលចង់ជួយ ទៅជាអ្នកដែលមានកំហុស ព្រោះអ្នកជោគជ័យនីមួយៗ មិនមែនមានត្រឹមតែអ្វីដែលជាពីកំណើតទាំងអស់នោះទេ ត្រូវតែពង្រឹងសមត្ថភាពបន្ថែមគ្រប់ផ្នែក ទើបអាចឈរជើងបាន។
បទចម្រៀងមួយបទល្បី គឺត្រូវការ សំឡេងពីរោះ និពន្ធទំនុកច្រៀងល្អ និពន្ធមេឡូឌីល្អ និពន្ធបទភ្លេងល្អ ផលិតវីដេអូល្អ ។ ជាពិសេសនោះ អ្នកចម្រៀង ត្រូវតែតស៊ូព្យាយាម អត់ធ្មត់ គោរពវិន័យ ពង្រឹងសមត្ថភាពជាប្រចាំ ច្រើនណាស់ ទើបអាចក្លាយជាអ្នកជោគជ័យលើវិស័យចម្រៀងបាន»៕ ខៀវទុំ