ភ្នំពេញ៖តារាប្រុសលំដាប់ជូរមុខគេរបស់Galaxy លោកប៉ុន សុណារិន ហៅខេម នៅមិនទាន់ទទួលបានគោរម្យងារជាឧកញ៉ាឡើយ គិតត្រឹមឆ្នាំ២០២៣ នេះ ខណៈដែលថៅកែផលិតកម្មរបស់លោក និងតារារួមអាជីពមានដូចជាលោកព្រាប សុវត្ថិ ,ខេមរៈ សិរីមន្ដ និងអតីតអ្នកនិពន្ធនិងចាត់ការទូទៅរបស់ផលិតកម្មនេះលោកយឹម តាស្រង់ សុទ្ធតែក្លាយទៅជាឧកញ៉ាទាំងអស់គ្នាទៅហើយ ទើបមជ្ឈដ្ឋានមហាជនមើលឃើញថាទាំងតារាចម្រៀងនិងថៅកែជាឧកញ៉ាដូចគ្នា អីចឹងបទចម្រៀងចេញមកប្រាកដជាឧកញ៉ាស្ដាប់ច្រើនជាងរាស្រ្ដហើយ។សម្រាប់លោកខេម គេជឿរថាលោកមានលទ្ធភាពលោកអាចទិញងារជាឧកញ៉ាបាន ព្រោះអតីតតារាថោន រូបនេះមានដីធ្លីមួយចំនួនដែលមានតម្លៃរាប់សែនដុល្លារ គ្រាន់តែលោកសុណារិន មិនដែលបញ្ចេញឬអួតអាងដូចគេប៉ុណ្ណោះ តែគេជឿរថានាពេលអនាគតឲ្យតែខេម បន្ដច្រៀងនៅGalaxy តទៅទៀតនោះច្បាស់ជាអ្នកចម្រៀងរូបនេះប្រាកដជាដើរតាមគន្លងថៅកែរបស់ខ្លួននិងរៀមច្បងលោកគឺព្រាប សុវត្ថិ និងខេម ប៊ុនថៃ តាមរយៈការក្លាយទៅជាឧកញ៉ាដូចគ្នាជាមិនខាន។
សូមបញ្ជាក់ថាគិតមកដល់ឆ្នាំ២០២៣ នេះតារានិងអតីតតារាដែលក្លាយជាឧកញ៉ាមាន៤នាក់មកហើយ ក្នុងនោះគឺលោកទុំ សារុត ហៅឧកញ៉ាឃ្លោគ ,លាន អាហ្វ្រីលគីនីន ,ខែម ប៊ុនថៃ និងព្រាប សុវត្ថិ ។ក្រោយតារាខាងលើសុទ្ធតែក្លាយទៅជាឧកញ៉ាផ្អើលអស់ពិភពសិល្បៈនោះមានព័តមានថាមានតារា២ដួងទៀតដែលកំពុងតែចង់និងរកវិធីឡើងជាឧកញ៉ាក្នុងនោះគឺតារាកំប្លែងលោកចែម ចាន់តារា ហៅនាយពែកម៉ី និងលោកសុខ មេសា ហៅនាយចឺម ។ប្រភពបានឲ្យដឹងថាតារាកំប្លែងនាយពែកម៉ី និងអតីតអ្នកកំប្លែងនាយចឺម អន្ទះសារចង់ឡើងឧកញ៉ានោះដូចគ្នានោះគឺមិនមែនចង់ប្រញ៉ាប់ទៅរកស៊ីលក់ដីឡូតិ៍ដូចលោកព្រាប សុវត្ថិ និងខែម ប៊ុនថៃ នោះទេ ប៉ុន្ដែទាំង២ដួងនេះចង់ឲ្យមានមន្ដស្នេហ៍លើសនេះទ្វេដង ព្រោះបើពួកគេក្លាយទៅជាឧកញ៉ានោះច្បាស់ជាកាន់តែរវល់ការងារក្រៅសិល្បៈជាងនេះជាមិនខាននោះគឺរឿងស្រីក្មេងតោងស្នេហ៍នេះតែម្ដង។
ដោយឡែកសម្រាប់លោកខេម វិញលោកច្រើនតែរក្សារភាពស្ងប់សា្ងត់មិនជ្រួលជ្រើមរឿងចង់បានសង្សារជាស្រីស្អាតថែមទៀតនោះទេ បន្ទាប់ពីលោកសាងស្នេហ៍ជាមួយនារីអាណិកជនខ្មែរមកពីបារាំងអ្នកនាងស្រីកា ជាង៧ឆ្នាំ តែគ្មានតម្រុយរៀបការ ខណៈដែលតារាចម្រៀងសំនៀងស្អករូបនេះ ក៍មានមន្ដស្នេហ៍មិនធម្មតាដែរ ព្រោះលោកធ្លាប់មានអតីតសង្សារជាតារាសម្ដែងស្រីស្អាតខ្លះនៅតែច្រណែនអ្នកនាងកា ដែលយកបានបេះដូងលោកសុណារិន ហើយផាត់ចោលពួកគេ។
ក្រៅពីខេម មិនមានតារាប្រុសផ្សេងៗទៀតរបស់Galaxy នឹងក្លាយជាឧកញ៉ាដែរនោះទេ ខណៈដែលការពន្យាពេលឲ្យគេហៅលោកថាជា”ឧកញ៉ាខេម”នាពេលនេះគឺដោយសារតែលោកសុណារិន អាចរារែកចិត្តនឹងយល់ឃើញដូចនាយពែកម៉ី ដែលថាខ្លាចតែទទួលបានគោរម្យងារដ៍អស្ចារ្យមួយនេះហើយលែងមានគេហៅធ្វើការងារសិល្បៈតទៅទៀត ស្របពេលដែលអ្នកដឹកនាំកម្មវិធីសិល្បៈរបស់CTN លោកស៊ិន សិលា ធ្លាប់បានសំណូមពរថាតារាដែលក្លាយទៅជាឧកញ៉ាហើយគូរណាស់តែឈប់ពីសិល្បៈឲ្យដាច់ស្រឡះតែម្ដងទៅ កុំច្រៀងផង ធ្វើឧកញ៉ាផង នាំឲ្យច្របូលច្របល់ក្នុងការឡើងអក្សរលើទូរទស្សន៍ និងខ្លាចខុសគោរម្យងារ។ប៉ុន្ដែទោះជាមានការលើកឡើងបែបនេះក្ដី ក៍គេឃើញលោកព្រាប សុវត្ថិ និងខែម ប៊ុនថៃ នៅតែចេញច្រៀងរាំធម្មតា ហើយតារាខ្លះទៀតកាន់តែប៉ងចង់បានគោរម្យងារដ៍អស្ចារ្យនេះ ដើម្បីឲ្យមានឥទ្ធិពលក្នុងសង្គម ស្របពេលដែលលោកទុំ សារុត និងលាន អាហ្រ្វីលគីនីន បានផ្ដាច់ខ្លួនពីសិល្បៈទាំងស្រុងជាច្រើនឆ្នាំហើយ ។
ថ្វីត្បិតតែខេម មិនមានតម្រុយដឹកដៃភរិយាចូលរោងការក្ដី ប៉ុន្ដែគេឃើញលោកនិងអ្នកនាងកា បង្ហាញរូបភាពផ្អែមល្ហែមស្នេហ៍នៅថ្ងៃបុណ្យទិវានៃក្ដីស្រលាញ់(Valentine’s Day )កាលពីថ្ងៃទី១៤ កុម្ភៈ ដែលចំណងស្នេហានេះកាន់តែរឹងមាំជាងឆ្នាំចាស់ទៀតផង។ខេម ធ្លាប់ប្រាប់ថាលោកមិនខ្លាចថារៀបការទៅធ្វើឲ្យអាជីពចម្រៀងខ្លួនមានការធ្លាក់ចុះនោះទេ ហេតុនេះលោកសន្យាថានឹងមិនពន្យាពេលរៀបអាពាហ៍ ពិពាហ៍ ច្រើនឆ្នាំតទៅទៀតឡើយ ព្រោះថាចិត្តលោកក៍ស្រលាញ់ក្មេងៗដែរ(ចង់បានកូន) តែលោកថាមិនអាចកំណត់ថ្ងៃខែឆ្នាំរៀបការមុនកម្មវិធីរៀបចេញជារូបរាងឡើងឡើយ៕