ភ្នំពេញ៖នៅ សុនិតា ចាប់ផ្ដើមចុះខ្សោយឥទ្ធិពលរបស់ខ្លួនបន្ដិចម្ដងៗនារយៈពេលចុងក្រោយនេះ ដែលធ្វើឲ្យតារាខ្លះធ្លាប់ហៅនាងថាជាជំទាវៗនោះប្រែមកជាហៅនាងធម្មតាដូចមុន ខណៈដែលនាងក៍បានវិលមករកអាជីពចាស់វិញជាបណ្ដើរៗដែរដូចជាក្នុងនាមជាតារាម៉ូដែល និងMC ជាដើម។ភាពប្រែប្រួលរបស់សុនិតា នាពេលនេះកើតមានក្រោយធ្លាយព័តមានថានាងនិងប្ដីគឺលោកទឹត ថាវរិទ្ធ ដែលមានឋានៈជាអនុរដ្ឋលេខាធិការ ក្រសួងវប្បធ័ម និងវិចិត្រសិល្បៈ នោះបានចែកផ្លូវគ្នាកណ្ដាលទីកាលពីចុងឆ្នាំ២០២២ ធ្វើឲ្យតំណែងជំទាវរបស់សុនិតា រង្គោះរង្គើរ និងប្រឈមគ្មានសុវត្ថិភាព ហើយតាមដំណឹងថាបច្ចុប្បន្ននាងបានចាកចេញពីផ្ទះវីឡារដ៍ធំស្កឹមស្កៃរស់នៅរួមគ្នាជាមួយលោកថាវរិទ្ធ នៅបុរីប៉េង ហួត(បឹងស្នោរ) បែជាមកស្នាក់នៅផ្ទះល្វែងយ៉ាងសាមញ្ញានៅម្ដុំស្ពានឡីឡូលេខ៩ ខណ្ឌជ្រោយចង្វា ទៅវិញ។ប៉ុន្ដែទាំងសុនិតា និងអតីតស្វាមីបានព្យាយាមគេចចេញពីសាកសួររបស់អ្នកសារព័តមានជុំវិញរឿងចំណងស្នេហាដើរដល់ទីបញ្ចប់នេះ។លោកថាវរិទ្ធ ធ្លាប់ប្រាប់”នគរធំ”ថាលោកមិនចង់និយាយរឿងគ្រួសារទេ តែនៅលើហ្វេសបុករបស់លោកបែជាចែកចាយ(Share)នូវសាព័តមានមួយចំនួនដែលផ្សព្វផ្សាយ ពីរឿងលោកនិងសុនិតា បែកបាក់គ្នាទៅវិញ ដែលនេះបញ្ជាក់ថាលោកហាក់ដូចជាទទួលស្គាល់ចំពោះរឿងរ៉ាវដែលកើតឡើង។
ប្រភពបានឲ្យដឹងថានៅ សុនិតា ដែលធ្លាប់តែជិះរថយន្ដទំនើបៗដូចជាRage Rover ,Alphard និង Ford Raptor ជាដើមដោយមានអង្គរក្សបើកជូននោះពេលនេះនាងកាន់ចង្កូតឡានដោយខ្លួនឯង និងមិនមានរថយន្ដថ្លៃៗជិះដូចមុនទេ ហើយពេលខ្លះថែមទាំងជិះជាមួយអ្នករួមអាជីពទៀតផង។ដោយឡែកសម្រាប់មិត្តភក្ដិនាងពីមុនដែលធ្លាប់ហៅថា”លោកជំទាវតូចៗ”នោះបែជាខ្លះមកហៅនាងត្រឹមតែ”អាតា”ម្ដង ដែលធ្វើឲ្យអ្នកនៅជិតខាងតារាកូន១ រូបនេះភ្ញាក់ផ្អើលខ្លាំង។ប្រភពបានឲ្យដឹងថាប្រសិនបើសុនិតា ពិតជាមិនអាចផ្សះផ្សារស្នេហ៍ជាមួយលោកទឹត ថាវរិទ្ធ នោះទេការធ្លាក់ខ្លួនជាមេម៉ាយកូន១របស់នាងនេះធ្វើឲ្យនាងមានការសោកស្ដាយខ្លះៗជាមិនខាន ព្រោះអំឡុងពេលនាងភ្ជាប់ស្នេហ៍ជាមួយលោកថាវរិទ្ធ នោះស្រីស្រស់រូបនេះបានផាត់ចោលសំណើរស្នេហ៍បុរសមិនក្រោម៤នាក់ទៀតនោះទេ ដែលតាមស្នេហានាងនៅពេលតែមួយនោះដែរ ហើយគម្រោងនាងដឹកដៃឯកឧត្តមរៀបការផ្អើលអស់ក្នុងរង្វង់អ្នកសិល្បៈក៍ក្លាយទៅជាផះផង់ ស្របពេលដែលដំណឹងខ្លះថានីតា នឹងអាចក្លាយទៅជាម្ចាស់អចនវត្ថុរបស់បុរសជាឪពុកនាងលើផ្ទៃដីរាប់ហិកតា មានតម្លៃរាប់លានដុល្លារនៅតំបន់កែវផុស ខេត្តព្រះសីហនុ នោះក៍មិនអាចក្លាយជាការពិតបានឡើយ។
ប៉ុន្ដែសុនិតា ដែលមានរូបសម្រស់នៅតែផូផង់នោះគេជឿរថានាងនឹងមានជម្រើសសេ្នហ៍ច្រើន ហើយឱកាសនាងក្ដាប់តំណែងជាជំទាវម្ដងទៀតនោះក៍នៅតែមិនឆ្ងាយពីកណ្ដាប់ដៃនាងឡើយ ព្រោះកន្លងមកបុរសដែលតាមស្នេហានាងនោះក៍ភាគច្រើនជាមន្រ្ដីធំផងដែរ។ដោយឡែកចំពោះលោកថាវរិទ្ធ វិញប្រសិនបើនៅតែមិនវិលមកត្រូវរ៉ូវគ្នាជាមួយសុនិតា ទេ នឹងធ្វើឲ្យតារាស្រីស្អាតៗមួយចំនួនម៉ៃថាលោកជាបុរសដែលស្រលាញ់គូស្នេហ៍តែដំបូងៗជាមិនខាន ព្រោះកាលលោករៀបការជាមួយអ្នកនាងលី ម៉ារីណា នោះចំណងស្នេហាក៍ចែកផ្លូវលឿនជាងពេលធ្វើជាស្វាមីនីតា ទៅទៀត។
សូមរំលឹកថានៅ សុនិតា ធ្លាប់មានព័តមានថានាងបានភ្ជាប់ពាក្យជាមួយលោកទឹត ថាវរិទ្ធ កាលពីថ្ងៃទី៥ ខែកញ្ញា ឆ្នាំ២០១៨ ហើយនាងសម្រាលកូនប្រុសថ្ងៃទី២០ ខែកក្កដា ឆ្នាំ២០១៩ ដែលក្រោយក្លាយជាម្ដាយគេនិងឡើងងារជាជំទាវមកបានក៍បានផ្ដាច់ខ្លួនពីអាជីពសិល្បៈទាំងស្រុង។ប៉ុន្ដែនៅដើមឆ្នាំ២០២៣ នេះសុនិតា បានប្រឹងសន្សំលុយល្អិតមកវិញ ហើយទាំងរូបនាងនិងលោកថាវរិទ្ធ នារយៈពេលចុងក្រោយនេះមិនដែលបង្ហាញខ្លួនប៉ៈគ្នាដោយចៃដន្យក្នុងកម្មវិធីណាមួយឡើយ បើទោះជាពួកគេនៅតែយកកូនប្រុសទៅលេងម្ខាងៗម្នាក់ជាញឹកញាប់ក្ដី៕
