ភ្នំពេញ៖ស្រីស្រស់តន់ ច័ន្ទសីម៉ា បានចាយពេលដល់ទៅ៨ឆ្នាំ(២០១៥-២០២៣)ទើបអាចបំពេញក្ដីស្រម៉ៃរបស់ខ្លួនបានតាមរយៈការមានឱកាសច្រៀងលើឆាកធំនៅទីលានជល់ដំរី នៅខេត្តសៀមរាបថ្ងៃសង្រ្កាន្ដឆ្នាំថ្មី បទ”ស្រលាញ់អ្វីដែលខ្មែរមាន”។សីម៉ា បានថ្លែងថាកាលពីឆ្នាំ២០១៥ នាងជាយុវជនស្ម័គ្រចិត្តស.ស.យ.ក ខេត្តតាកែវច្រៀងបទនគររាជ និងពង្សាវតា បើកព្រឹត្តិការណ៍អង្គរសង្រ្កាន្ដ ហើយធ្លាប់មានក្ដីស្រម៉ៃចង់ច្រៀងឆាកធំថ្ងៃបើកអង្គរសង្រ្កាន្ដ ដែលពេលនេះនាងធ្វើបានដូចបំណងដោយសារតែមានការគាំទ្រពីទស្សនិកជន។
មជ្ឈដ្ឋានមហាជនមើលឃើញថាតន់ ច័ន្ទសីម៉ា ពេលនេះគឺជាតួឯករបស់Galaxy ហើយអ្វីដែលគូរឲ្យចាប់អារម្មណ៍បំផុតនោះគឺតារាប្រុសលំដាប់ជូរមុខទាំង៣របស់ផលិតកម្មនេះមានលោកព្រាប សុវត្ថិ ,ខេម និងខេមរៈ សិរីមន្ដ បានក្លាយទៅជាដៃគូចម្រៀងរបស់នាងតែម្នាក់គត់ ហេតុនេះបើសីម៉ា មិនល្បីល្បាញលឿនទើបជារឿងចម្លែក។
លោកខាំ ភូរិ ជាអ្នកដឹកនាំភាពយន្ដនិងសម្ដែងខារ៉ាអូខេបានចេញសារទាក់ទងសីម៉ា សម្រេចក្ដីសុបិនធំនៅឆ្នាំ២០២៣ នេះថាបទពិសោធន៍ការងារ ការជ្រោមជ្រែងពីមនុស្សជុំវិញខ្លួន សម្ថភាព និងការខិតខំប្រឹងប្រែង ដោយខ្លួនឯង និងជួយអ្នកឲ្យសម្រេចក្ដីស្រម៉ៃ។សំណាងនិងឱកាសក៍ដើរទន្ទឹមគ្នា។
តន់ ច័ន្ទសីម៉ា អាយុ២៦ឆ្នាំ បានក្លាយទៅជាតារាចម្រៀងស្រីដែលមានបទចម្រៀងប្រពៃណីខ្មែរចេញនាអំឡុងចូលឆ្នាំខ្មែរឆ្នាំ២០២៣ នេះទទួលបានការនិយមចាក់ស្ដាប់កម្សាន្ដ ច្រើននៅគ្រប់ខេត្តក្រុង ហើយនាងក៍ត្រូវបានអ្នកជំនាញសិល្បៈចាត់ទុកថាមានដៃគូល្អបំផុតនៅឆ្នាំនេះដែរ។ប្រសិនបើGalaxy មិនមានផែនការទិញតារាស្រីលំដាប់ល្បីៗចូលមកទេ នោះមានន័យថានាងច័ន្ទសីម៉ា គឺនៅតែគ្មានដៃគូប្រជែងក្នុងក្រុមតទៅទៀតជាមិនខាន ខណៈដែលតារាគីឡូប្រហាក់ប្រហែលនាងផ្សេងទៀតកាន់តែពិបាកទប់ទល់ជាមួយអតីតអ្នកស្មូត្រចាំខេត្តតាកែវរូបនេះជាមិនខាន ព្រោះដំណឹងផលិតកម្មថ្មី ហ៊ានចាយលុយធំ នេះចង់ទិញមាស សុខសោភា និងពេជ្រ សោភា បានស្ងប់ស្ងាត់ទៅវិញ។ប៉ុន្ដែសម្រាប់អ្នករៀបចំប្រគុំតន្ត្រីមួយចំនួននៅតែថ្ងូររឿងតម្លៃខ្លួននាងច័ន្ទសីម៉ា ថាខ្ពស់ខ្លាំងពេកធ្វើឲ្យពួកគេពិបាករកSponsor ហ៊ានថ្លៃតម្លៃខ្លួននាង ខណៈដែលកាលពីឆ្នាំ២០២០ អ្នកគ្រប់គ្រប់Galaxy ធ្លាប់អះអាងថាសីម៉ា ស៊ីថ្លៃច្រៀងConcerts ធំៗម្ដង៥ពាន់ដុល្លារឯណ្ណោះ។ការកំណត់ថ្លៃខ្លួនខ្ពស់បែបនេះហើយនាំឲ្យនាងសីម៉ា បាត់ឱកាសចេញច្រៀងសម្ដែងស្ទើតែគ្រប់ឆាកតន្រ្ដីតាមប៉ុស្ដិ៍ទូរទស្សន៍ទាំងអស់លើកលែងតែកម្មវិធីនោះរៀបចំដោយក្រុមការងារផលិតកម្មនាងតែម្ដង ទោះជាអតីតអ្នកចាត់ការទូទៅGalaxy លោកយឹម តាស្រង់ ធ្លាប់អះអាងថានាងសីម៉ា ច្រៀងម្ដងៗតាមឆាកទូរទស្សន៍ស៊ីថ្លៃត្រឹម១ទៅ២ពាន់ដុល្លារក្ដី។
គូររំលឹកថានាងតន់ ច័ន្ទសីម៉ា ធ្លាប់បរាជ័យលើកពានក្នុងការប្រលងចម្រៀងនៅCTN និងThe Voice Cambodia រដូវកាលទី២ របស់ហង្សមាស តែអំឡុងពេលនាងជ្រកនៅGalaxy ជាង៣ឆ្នាំនេះធ្វើឲ្យស្រីស្រស់ដែលធ្លាប់តែច្រៀងនៅហាងនៅពេលរាត្រីបានតម្លៃខ្លួន១យប់តែជាង១០ដុល្លារ និងជួលបន្ទប់ជួលម្ដុំស្ដុបDN តម្លៃ៦០ដុល្លារក្នុង១ខែនោះបានកែប្រែវាសនាដូចមេឃនិងដីបើ្រប្រៀបធៀបពីមុននិងពេលបច្ចុប្បន្ន។អំឡុងពេលនាងសីម៉ា ឡើងកូដខ្លាំងនេះដែរស្រីស្រស់តូចតន់ក៍បានធ្វើឲ្យសម្រស់របស់នាងកាន់តែប្រែប្រួលខ្លាំងដែរនោះគឺនាងបានកែរូបឆោមដល់ទៅ៣កន្លែងគឺលើកខ្ទង់ច្រមុះ,ចាក់ចង្កា និងពត់ធ្មេញ។ប៉ុន្ដែទាក់ទងរឿងស្នេហាវិញនាងសីម៉ា នៅមិនទាន់មានរាសីល្អនោះទេ ព្រោះរាល់លើកនាងតែងតែថ្ងូរដូចព្រាប ថាអត់ទាន់មានសង្សារ ឬរកអ្នកបណ្ដើរដូចគេមិនបាន ស្របពេលដែលលោកឧកញ៉ាពោះម៉ាយម្នាក់ដែលធ្លាប់លេចឭថាតាមស្នេហានាងនោះពេលនេះក៍ស្ងប់ស្ងាត់ទៅវិញ។តែគេជឿរថាសីម៉ា ល្បីប៉ុណ្ណឹងដែរ រឿងអីដែលនាងគ្មានសង្សារ?អ្នកខ្លះសង្ស័យថាស្រីស្រស់រូបនេះមិនមែនបេះដូងនៅទំនេរទេ គ្រាន់តែនាងមិនហ៊ានសាងស្នេហ៍ដោយចំហប៉ុណ្ណោះ ព្រោះខ្លាចធ្លាក់កាលីពអំឡុងពេលឡើងកូដខ្លាំងនេះ៕