ភ្នំពេញ៖ក្នុងជំនួបជាមួយទេព បូព្រឹក្ស កាលពីរាត្រីថ្ងៃទី២ ឧសភា តារាចម្រៀងទើបសម្រាលកូនបានជាង២ខែរូបនេះបានឲ្យដឹងថានាងនឹងលោកងួន ចាន់ដេវីត ដែលជាគូស្នេហ៍គ្រោងទៅកម្សាន្ដនៅប្រទេសបារាំងជាមួយគ្នានៅអំឡុងពាក់កណ្ដាលខែឧសភាឆ្នាំ២០២៣ នេះហើយដែលដំណើរក្រៅស្រុកនោះមានរយៈពេលកន្លះខែ ព្រោះអាចនឹងហួសទៅដើរលេងនៅប្រទេសក្បែបារាំងផងដែរ។យ៉ាងណានាងថាដោយសារតែកូនប្រុសនាងនៅតូចពេកហេតុនេះនាងទៅតែជាមួយដេវីត មិនបានយកកូនទៅជាមួយឡើយ។
ការចេញទៅប្រទេសបារាំងលើកនេះរបស់ទេព បូព្រឹក្ស គេជឿរថាក៍មិនខុសពីលើកមុនៗដែរពោលគឺក្រៅពីរឹតចំណងស្នេហាឲ្យកាន់តែផ្អែមល្ហែមនោះពួកគេក៍ប្រាកដជាទិញអ៊ឺវ៉ាន់ម៉ាកប្រេន ប្រេន ជាច្រើនថែមទៀតមិនខានដើម្បីលើកទឹកចិត្តដល់ស្វាមីនាងលោកដេវីត ដែលហត់នឿយចេញច្រៀងសម្ដែងពេញ១រដូវក្ដៅកន្លងមក។
ឆ្លើយតបសំណួរថាតើទេព បូព្រឹក្ស គ្រោងនឹងវិលមករកឆាកតន្រ្ដីនាពេលណានោះភរិយាលោកដេវីត រូបនេះថាមិនទាន់អាចកំណត់ពេលវេលាឲ្យជាក់លាក់បានទេ ព្រោះនាងនៅសសៃខ្ចីនៅឡើយ។នាងថាមុនសម្រាលកូននាងបានឡើងគីឡូដល់ទៅជាង៧០ គ.ក្រ ឯណ្ណោះ តែពេលនេះនាងមានគីឡូជាង៥០ ហើយនៅតែចង់សម្រកឲ្យស្រាលជាងនេះដើម្បីវិលទៅរកគីឡូដូចកាលនៅលីវឡើងវិញដែលពេលនោះទើបអាចគិតគូពីការឡើងឆាកឡើងវិញបាន។ដោយឡែកសម្រាប់តារារួមអាជីពបានសរសើរបូព្រឹក្ស ថានាងពិតជាពូកែថែរាងមែន ពោលគឺទើបសម្រាលកូនហើយថ្មីៗសោះ តែមិនសូវបែកសាច់ខ្លាំងនោះទេ ហើយនាងចាប់ផ្ដើមចូលរួមតាមបណ្ដារកម្មវិធីអ្នកសិល្បៈជាបន្ដបន្ទាប់បើទោះជាមិនទាន់អាចកាន់ក្បាលមីក្រូឡើងច្រៀងសម្ដែងបានដូចមុនក្ដី។
គូររំលឹកថាទេព បូព្រឹក្ស បានភ្ជាប់ស្នេហ៍ជាង៦ឆ្នាំជាមួយលោកងួន ចាន់ដេវីត ហើយអ្នកទាំងពីរគ្រោងដឹកដៃគ្នារៀបការនៅឆ្នាំ២០១៩ ទៀតផង តែក្រោយពីថតPre-Wedding នៅកោះម៉ាល់ឌីវរួចមង្គលការរបស់អ្នកទាំងពីរបែជាស្ងប់ស្ងាត់ដល់ពេលនេះទៅវិញ ខណៈដែលលាកពីថ្ងៃទី១៦ ខែកុម្ភៈ ឆ្នាំ២០២៣ បូព្រឹក្ស ហៅស្រីនិច្ច សម្រាលកូនប្រុសដោយ១ដោយដាក់ឈ្មោះថាទេព បញ្ចាវរាប ហៅAlbert ។បូព្រឹក្ស ធ្លាប់និយាយថានាងមិនអាចប្រាប់បានថាតើត្រូវរៀបការពេលណាជាមួយដេវីត នោះទេ ប៉ុន្ដែជូនកាលនាងនិងគូស្នេហ៍បានរៀបចំកម្មវិធីអ្វីផ្ទាល់ខ្លួនរួចទៅហើយក៍ថាបាន គ្រាន់តែមានរឿងខ្លះនាងមិនអាចនិយាយបាន រឿងខ្លះអាចប្រាប់បាន។ការលើកឡើងរបស់បូព្រឹក្ស បែបនេះធ្វើឲ្យគេសង្ស័យថានាងបានចុះអេតាស៊ីវិលឬពិធីរៀបការបែបសែនព្រេនរួចហើយជាមួយដេវីត មុនយកកូនតែនាងថារឿងនេះមិនអាចប្រាប់បានឡើយ។
គេកត់សម្គាល់ថាគិតត្រឹមឆ្នាំ២០២៣ នេះក្រៅពីទេព បូព្រឹក្ស តារាកូន១ មានដូចជាឱក សុគន្ធកញ្ញា ,ពេជ្រ សូលីកា ,ឌុច លីដា ,កែវ ពេជ្រពិសី ,នៅ សុនិតា និងផាត់ ផាន់ណា ជាដើម។Fan តារាចម្រៀងទេព បូព្រឹក្ស រងចាំមើលថាក្រោយអ្នកចម្រៀងពូកែតុបតែងខ្លួន និងលេងក្បាច់រាំប្លែកៗរូបនេះមានកូន១ហើយវិលរកឆាកតន្រ្ដីនាពេលខាងមុខនេះតើនាងនៅតែមានយីអ៊ុនល្អក្នុងទីផ្សារចម្រៀងទៀត ឬក៍ប្រឈមនៅទ្រឹងដូចតារាមានប្ដីនិងកូនដ៍ទៃទៀត?ប៉ុន្ដែគេជឿរថាសម្រាប់បូព្រឹក្ស នាងប្រាកដជាត្រូវបានគូស្នេហ៍នាងលោកដវីត ធ្វើបទចម្រៀងយ៉ាងសម្រិតសម្រាំងដើម្បីទប់លំនឹងនាងកុំឲ្យធ្លាក់ចុះជាមិនខាន ក្រោយរូបនាងបាត់មុខជាច្រើនខែតាំងពីពពោះនិងក្រោយសម្រាលនេះ។
ចំណែកតារាចម្រៀងជិតដិតបូព្រឹក្ស បានបង្ហើបថាថរឿងរៀបការជាចំហរបស់អតីតតារាហង្សមាសរូបនេះនិងគូស្នេហ៍អាចនឹងមិនអាចរៀបចំក្នុងពេលឆាប់ៗនេះបានទេ ព្រោះថាពួកគេច្បាស់លាស់ជាមួយគ្នាហើយទើបបានសម្រេចចិត្តយកកូនមុនរៀបការបែបនេះ។ប៉ុន្ដែរឿងដែលបូព្រឹក្ស ត្រូវធ្វើនៅឆ្នាំ២០២៣ នេះគឺការពង្រឹងអាជីពចម្រៀងឡើងវិញ រួមទាំងការរៀបគម្រោងយកកូនថែម ដើម្បីឲ្យចំណងស្នេហាកាន់តែរឹងមាំថែមទៀត ខណៈដែលលោកដេវីត ត្រូវបានគេមើលឃើញថាមានទីផ្សារស្ទុះឡើង និងតម្លៃខ្លួនខ្ពស់ជាងមុន ក្រោយផ្ទុះសង្រ្គាមDiss Track ជាមួយលោកវណ្ណដា ១ប្រាវកាលពីចុងឆ្នាំ២០២២ ៕