ភ្នំពេញ៖ពេជ្រ សោភា បានប្រារពខួបកំណើតរបស់ខ្លួនគម្រប់អាយុ៤០ឆ្នាំគត់នៅថ្ងៃទី៩ មិថុនា ឆ្នាំ២០២៣ ដែលមានក្រុមរាំ និងTop Fan របស់នាងបានយកនំខេកទៅជូននាងដល់ផ្ទះនាងតែម្ដង ។ដោយឡែកលោកឆឹម សក្កដា វិញនៅថ្ងៃពិសេសរបស់អនាគតភរិយារបស់លោកបានចេញសារថា”Happy Birthday To You Bae bae ុសូមឲ្យមានស្នាមញញឹមគ្រប់ពេល ពីមនុស្សម្នាក់ដែលឆ្ងាយតែកាយ”។អ្វីដែលគូរឲ្យចាប់អារម្មណ៍ផងដែរលោកសក្កដា ប្រឹងទៅហាត់ប្រាណនៅប៉ូវយកសាច់ដុំទ្រូង និងដៃឲ្យធំ ដើម្បីឲ្យស្រួលសោភា គេងកើយដោយកក់ក្ដៅ។នេះជាការព្យាយាមប៉ូវរាងកាយថែមទៀតរបស់លោកសក្កដា ដែលក្រោយពីលោកក្លាយទៅជាគូដណ្ដឹងរបស់សោភា ជាង៦ខែមកនេះលោកមិនដែលហ៊ានស្និតស្រីណាខ្លាំងដូចមុនទេ ព្រោះខ្លាចគូដណ្ដឹងប្រចណ្ឌ ខណៈដែលការងាកមកបន្ថែមប៉ូវសាច់ដុំឲ្យធំរឹងមាំថែមទៀតបែបនេះគេជឿរថាលោកបានដឹងច្បាស់ថាអនាគតប្រពន្ធរបស់លោកស្រលាញ់បុរសដែលរឹងមាំ មិនចូលចិត្តប្រុសដែលទន់ជ្រាយឡើយ។
សូមបញ្ជាក់ថាពេជ្រ សោភា ត្រូវបានលោកឆឹម សក្កដា ធ្វើខួបកំណើតឲ្យជារៀងរាល់ឆ្នាំតាំងពីពួកគេបង្កាត់ភ្លើងស្នេហាជាមួយគ្នានៅឆ្នាំ២០១៦ មក ប៉ុន្ដែមានតែ១ឆ្នាំប៉ុណ្ណោះដែលបុរសរូបសង្ហាររូបនេះមិនអើពើរនិងបែខ្នងដាក់សោភា នោះគឺនៅថ្ងៃខួបសោភាឆ្នាំ២០២២ មុនពេលពួកគេភ្ជាប់ពាក្យជាមួយគ្នា ព្រោះកាលនោះលោកសក្កដា អាកអាន់ស្រពោនចិន្ដា និងសោភា ជាខ្លាំងដែលនាងទៅកៀកកើយគ្នាជាមួយបុរសម្នាក់នៅថ្ងៃឆ្លងឆ្នាំសាកល២០២១ ឈានចូល២០២២ នៅខេត្តសៀមរាប ហើយពេលនោះលោកខូចចិត្តខ្លាំងពេករហូតដល់ស្បថស្បែសច្ចារ្យថាលែងយកសង្សារជាតារាដូចគ្នាទៀតផង។ប៉ុន្ដែដឹងអីនៅថ្ងៃទី១១ ខែ១១ សោភា-សក្កដា បានក្លាយទៅជាគូដណ្ដឹងគ្នាទៅវិញដែលធ្វើឲ្យមានភាពច្របូកច្របល់ខ្លាំងក្នុងពិភពគូស្នេហ៍របស់អ្នកសិល្បៈ ព្រោះតែមនុស្សភាគច្រើនគិតថាពួកគេកំពុងសាងស្នេហា”ក្លែងក្លាយ”ដើម្បីឆ្ពិនភ្នែកមហាជនតែចុងក្រោយបែជាស្រលាញ់គ្នាមែនទែន។យ៉ាងណាក្រោយសោភា និងសក្កដា ក្លាយជាគូដណ្ដឹងនិងគ្នាជាងកន្លះឆ្នាំមកនេះក្រុមតារាចម្រៀងហង្សមាសមួយចំនួននៅតែមិនជឿរជាក់ថាពួកគេពិតជាស្រលាញ់គ្នាមែនទែនឡើយ រហូតមកដល់ពេលនេះព្រោះនៅពេលអ្នកយកព័តមានយើងសាកសួរតារាស្និតសោភា ពីគម្រោងរៀបការរបស់នាងនោះម្នាក់ៗបែជាសើច ហើយសួរច្រាសមកអ្នកយកព័តមានយើងវិញថា”តើចេះតែជឿរថា២នាក់ហ្នឹងស្រលាញ់គ្នាមែនដែរអី ?”មិនអាចទេ ពួកគេដឹងច្បាស់ណាស់!…។ដោយឡែកលោកឧកញ៉ាហេង ឡុង ស្វាមីអ្នកនាងចន ច័ន្ទ ក៍មិនជឿរដែរថាសោភា និងសក្កដា ភ្ជាប់ពាក្យជាមួយគ្នាមែនទែនដែរដោយលោកថែមទាំងសន្យាថាបើពួកគេរៀបការជាមួយគ្នាលោកនឹងចងដៃចំនួន៥ពាន់ដុល្លារទៀតផង។
ពេជ្រ សោភា បានលុបចោលមង្គលការជាមួយលោកឆឹម សក្កដា នៅដើមឆ្នាំ២០២៣ នេះទាំងចម្រូងចម្រាស ព្រោះនាងចង់ធ្វើជាកូនក្រមុំជាលើកទី២នៅឆ្នាំនេះ តែលោកសក្កដា បែជាថាគ្មានគម្រោងទៅវិញទើបមង្គលការរបស់តារាទាំងពីរត្រវជាប់គាំងមិនអាចប្រព្រឹត្តិទៅបានឡើយ។ប្រភពខ្លះបានឲ្យដឹងថាលោកសក្កដា មិនសូវសប្បាយចិត្តនៅពេលដែលលោកជិតក្លាយទៅជាស្វាមីរបស់សោភា ទៅហើយតែតារាហង្សមាសបែជានៅតែតឹងរឹងដាក់លោកដូចជាករណីនាងមិនអនុញ្ញាត្តិឲ្យលោកមានសិទ្ធិចេញចូលផ្ទះនាងដោយសេរីដូចជាគូណ្ដឹងគេផ្សេងៗទៀតជាដើមដែលចំណុចនេះហើយអ្នកខ្លះគេជឿរថាបុរសកំពុងប្រឹងហាត់យកសាច់ដុំធំផ្គាប់ចិត្តកំពូលស្នេហ៍រូបនេះលោកមានចេតនាចង់លើកពេលរៀបការដើម្បីឲ្យសោភា ចេះយល់ចិត្តលោកខ្លះផង ព្រោះមុនភ្ជាប់ពាក្យសោភា ធ្លាប់ប្រាប់ថាសក្កដា មិនអាចចាំពិធីនេះបានតទៅទៀតទេ គឺត្រូវតែធ្វើនៅពេលនោះដោយជៀសមិនផុត។
គេកត់សម្គាល់ថាទោះជាពេជ្រ សោភា ឈានចូលវ័យ៤០ឆ្នាំក្ដី តែរូបសម្រស់នាងនៅតែក្មេងជាងវ័យ ហើយនាងត្រូវបានគេចាត់ទុកថាជាតារាមានទ្រព្យច្រើននាពេលបច្ចុប្បន្នព្រោះនាងមានផ្ទះផ្ទាល់ខ្លួនយ៉ាងប្រណិតលើសពី៣ និងជិះរថយន្ដទំនើបៗជាច្រើនគ្រឿងឆ្លាស់គ្នា។តែសោភា ដែលជាកាន់គ្រិស្ទានជាង២០ឆ្នាំទៅហើយនោះបានបង្ហាញអារម្មណ៍ផ្លាស់ប្ដូរជាញឹកញាប់ដោយម្ដងថាចង់រៀបការ និងជូនកាលថានាងធ្លាប់រៀបការម្ដងហើយ ហេតុនេះមង្គលការមិនសូវចាំបាច់សម្រាប់រូបនាងជាដើម។ប៉ុន្ដែនៅថ្ងៃរៀបមង្គលការរបស់ក្មួយស្រីនាងកាលពីខែ១១ ឆ្នាំ២០២២ នោះសោភា បញ្ជាក់ច្បាស់ៗថាមូលហេតុដែលនាងមិនបានហៅភ្ញៀវជាតារាមិត្តរួមអាជីពមកចូលរួមច្រើននោះព្រោះតែទុកហៅសរុបនៅថ្ងៃមង្គលការរបស់នាងជាមួយលោកសក្កដា នៅឆ្នាំ២០២៣ ។តែលោកសក្កដា បែជាឆ្លើយបញ្ច្រាសនាងទៅវិញថាគ្មានមង្គលការរបស់លោកនិងគូដណ្ដឹងកើតឡើងនៅឆ្នាំនេះទេ ហើយក៍មិនអាចកំណត់ថាធ្វើពេលណាដែរ តែបើធ្វើគឺបែបតូចតាចយ៉ាងច្រើនជប់លៀងត្រឹម១០តុប៉ុណ្ណោះ៕
