ភ្នំពេញ ៖ នារីរូបស្រស់ម្នាក់ ទើបនឹងចេញពីកម្មវិធីជួបជុំមិត្តភក្តិ បានបើករថយន្ត ១គ្រឿង ក្នុងល្បឿនយ៉ាងលឿន រួចរេចង្កូតទៅបុករបាំងថ្មពុះចែកទ្រូងផ្លូវ ពេញទំហឹង បណ្តាលឱ្យបាក់អស់១កង់ ចំណែករថយន្តបែកកង់មុខខាង ឆ្វេង ទៅមុខលែង។
ករណីនេះ បានកើតឡើងកាលពីវេលាម៉ោង ៣និង៥០នាទីទៀបភ្លឺ ថ្ងៃទី១៩ ខែមិថុនា ឆ្នាំ២០២៣ នៅត្រង់ចំណុច ខាងលិចភ្លើង ស្តុបចេនឡា ប្រហែល១០០ម៉ែត្រ តាមបណ្តោយផ្លូវព្រះមុន្នីរ៉េត (២១៧) ក្នុងសង្កាត់បឹងសាឡាង ខណ្ឌទួលគោក។
តាមប្រភពព័ត៌មានកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញរថយន្ត១គ្រឿង ម៉ាកឡិច ស៊ីស IS250 ស៊េរីឆ្នាំ២០០៦ ពណ៌ទឹកប្រាក់ ពាក់ស្លាកលេខ ភ្នំពេញ 2U-6899 បើកបរដោយនារីស្រស់ស្អាតម្នាក់ បានធ្វើដំណើរតាមបណ្តោយផ្លូវព្រះមុនីរ៉េត (២១៧) ទិសដៅពីកើត ទៅលិច ក្នុងល្បឿនយ៉ាងលឿន ខណៈ មក ដល់ចំណុចកើតហេតុខាងលើ ស្រាប់តែរេចង្កូតមកឆ្វេងដៃ ជ្រុលទៅបុករបាំងថ្មពុះចែកទ្រូងផ្លូវ បាក់អស់១កង់ ខ្ទាតទៅលើចំណីផ្លូវម្ខាង ចំណែករថយន្ត បែកកង់មមុខខាងឆ្វេង ទៅមុខលែងរួចតែម្តង។ យ៉ាងណាហេតុ ការណ៍គ្រោះថ្នាក់ចរាចរណ៍នេះ មិនបង្កឱ្យនរណាម្នាក់រងរបួសនោះទេ។
ក្រោយកើតហេតុ សមត្ថកិច្ចជំនាញចរាចរណ៍ បានចុះមកស្ទូចយករថយន្តបង្កហេតុ ទៅរក្សាទុកនៅការិយា ល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេល ក្រោយ៕
