ភ្នំពេញ៖ បុរសម្នាក់បើករថយន្តដឹកគូដណ្តឹងនិងប្អូនស្រីចេញពីខួបកំណើតមិត្តភក្ដិនៅកោះពេជ្រមកដល់មុខផ្ទះឲ្យប្អូនស្រីនិងគូដណ្តឹងចុះបើកទ្វាររបងផ្ទះត្រូវជនសង្ស័យម្នាក់ចូលទៅ ឆក់ទូរស័ព្ទប្រទាញប្រទង់គ្នាបងប្រុសបានបើករថយន្តបុកផ្ទប់នឹងរបងផ្ទះ បណ្តាលឲ្យជន សង្ស័យរងរបួសស្រាលគូដណ្តឹងបោកក្បាលសន្លប់ស្តូកស្តឹងប្អូនស្រី រងរបួសស្រាលជា អកុសលបក្សពួកជនសង្ស័យបានដកកាំភ្លើងបាញ់បុរសជាអ្នកបើក រថយន្តចំនួន៥គ្រាប់រង របួសធ្ងន់ធ្ងរបង្កឲ្យមានការភ្ញាក់ផ្អើលកាលពីវេលាម៉ោង១និង៣០នាទីរំលងអាធ្រាត្រឈានចូលថ្ងៃ ទី២១ ខែមករា ឆ្នាំ២០១៧ ទុលមុខផ្ទះលេខ14Bស្ទូនផ្លូវ២០៧ ភូមិ៤ ក្រុម២៦ សង្កាត់ទំនប់ទឹក ខណ្ឌចំការមន។
ជនរងគ្រោះដែលរងរបួសធ្ងន់ធ្ងរមានឈ្មោះ ចាន់ សុជា ភេទប្រុស អាយុ២៤ឆ្នាំ មុខរបរនិស្សិត ស្នាក់នៅផ្ទះលេខ១៤A ផ្លូវ២០៧ សង្កាត់បឹងទំពុន ខណ្ឌមានជ័យ ២ឈ្មោះ នេត សុធារដ្ឋ ភេទស្រី អាយុ២២ឆ្នាំ មុខរបរនិស្សិត ស្នាក់នៅសង្កាត់ព្រៃស ខណ្ឌដង្កោ ត្រូវជាគូដណ្តឹង និង៣ឈ្មោះ ចាន់ ស្រីប៉ ភេទស្រី អាយុ១៨ឆ្នាំ មុខរបរសិស្ស ត្រូវជាប្អូនស្រីរបស់ ជនរងគ្រោះរបួសធ្ងន់។
តាមសម្ដីជនរងគ្រោះដែលត្រូវជាប្អូនស្រីបានអោយដឹងថា មុនពេលកើតហេតុ ពួកគេមានគ្នាបីនាក់បងប្អូនគឺបងប្រុសនិងគូដណ្តឹងព្រមរូបគេបានជិះរថយន្តម៉ាកឡិចស៊ីស GS 300 ពណ៌ស ពាក់ស្លាកលេខ ភ្នំពេញ 2AI 8799ចេញពីខួបកំណើតមិត្តភក្ដិនៅកោះពេជ្ររួចហើយបានចូលទៅហូបបបរសនៅហាងលឹមទ្រីនៅម្ដុំពេទ្យចិន លុះហូបបបរស រួចហើយ ពួកគេបានបន្តរដំនើរត្រលប់ទៅផ្ទះវិញ ដោយបានធ្វើដំណើរតាម៤៣០ក្នុងទិសដៅពីជើងទៅត្បូង រួចហើយបានបត់ស្តាំ ឡើងទៅផ្លូវ២០៧សំដៅទៅផ្ទះរបស់ពួកគេ ខណៈពេលមកដល់មុខផ្ទះបានឈប់រថយន្តរួចហើយរូបគេនិងគូដណ្តឹងរបស់បងប្រុសបានចុះពីលើរថយន្តរថយន្តដើរទៅបើកទ្វាររបងផ្ទះដោយបានកាន់ទូរស័ព្ទម៉ាក អាយហ្វូន ស៊ិចplus មួយ នៅនិងដៃ ពេលកំពុងតែរៀបចំបើកទ្វារផ្ទះ ក៏ស្រាប់តែលេចមុខជនសង្ស័យ៤នាក់ជិះម៉ូតូ២គ្រឿង ម៉ាកហុងដាឌ្រីមប្រើប៉ិចមួយគ្រឿងនិងម៉ាកឃ្លីកមួយគ្រឿង មិនចាំស្លាកលេខបានជិះមកឈប់ជិះរថយន្តហើយមានជនសង្ស័យម្នាក់ដែលជិះម៉ូតូឃ្លីកបានចុះមកដណ្ដើមយកទូរស័ព្ទពីដៃរបស់នាងជាប្អូនស្រីតែនាងមិនព្រមឲ្យក៏បានប្រទាញប្រទង់គ្នាទៅវិញទៅមកឃើញបែបនេះបងប្រុសដែលនៅក្នុងរថយន្តស្រាប់បានជាន់ហ្គាររថយន្តបំបុកផ្ទប់នឹងរបងផ្ទះបាក់រុញផ្ទប់នឹងទ្វារកញ្ចក់រថយន្តបាក់អស់២ផ្ទាំងហើយរុញផ្ទប់នឹងរថយន្តកាមរីហាយ ប្រីតពណ៌សចតនៅក្នុងមួយផ្ទះមួយគ្រឿងទៀតធ្វើឲ្យជនសង្ស័យហោះផ្លោងធ្លាក់ទើរលើរថយន្តរងរបួសស្រាលនិងបុកនារីជាគូរដណ្ដឹងបោកក្បាលសន្លប់ស្ដូកស្ដឹងរីឯប្អូនស្រីរងរបួសស្រាល។
ភ្លាមៗនោះបក្សពួករបស់ជនសង្ស័យ៣នាក់ទៀតដែលឈប់រង់ចាំនៅម៉ូតូបានដកកាំភ្លើងខ្លីមិនស្គាល់ម៉ាកបាញ់សំដៅបងប្រុសរបស់នាងដែលនៅក្នុងរថយន្ត ចំនួន៥គ្រាប់ជាប់ៗគ្នាធ្វើអោយបងប្រុសរបស់គេត្រូវចំនួន៤គ្រាប់ គឺចំសៀតថ្កាមួយគ្រាប់ ចង្កាមួយគ្រាប់និងក្រោមក្លៀកខាងស្តាំមួយគ្រាប់ បណ្តាលអោយហូរឈាមស្រោចពេញខ្លួនរងរបួសធ្ងន់ធ្ងរត្រូវបានដឹកតាមរ៉ឺម៉កម៉ូតូបីយកទៅសង្គ្រោះនៅមន្ទីរពេទ្យមិត្តភាពខ្មែរសូវៀត តែដោយសាររបួសធ្ងន់ធ្ងរក៏ត្រូវបញ្ជូនបន្តទៅសង្គ្រោះនៅមន្ទីរពេទ្យកាល់ម៉ែតរួមជាមួយគូដណ្តឹង។ ចំណែកជនសង្ស័យបានរត់គេចខ្លួនទៅបាត់អស់និងបានប្លន់យកទូរស័ព្ទដៃពីជនរងគ្រោះម៉ាក iPhon 6plus មួយគ្រឿងយកទៅជាមួយផងដែរ ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់ បានរកឃើញ សំបកកន្ទុះចំនួន៥គ្រាប់ ក្នុងមានមួយគ្រាប់មិនទាន់ផ្ទុះ រួចហើយបានសាកសួរជនរងគ្រោះពីដំណើររឿង ព្រមទាំងទទួលពាក្យបណ្ដឹងនៅផ្ទះជនរងគ្រោះផ្ទាល់តែម្តង៕
ណនរ៉ាត់