ខេត្តស្វាយរៀង ៖ បុរស២នាក់ បានកើតមានជម្លោះតឹងសរសៃកដាក់គ្នា ដោយគ្រាន់ តែរឿងសត្វឆ្កែរបស់ខ្លួនខាំគ្នាប៉ុណ្ណោះ លុះភាគី ម្ខាងឆេះឆួលកំហឹង ទប់មិនបាន ក៏ទាញពូថៅ កាប់ប្រហារគូទំនាស់ បណ្តាលឱ្យដាច់ម្រាមដៃ រងរបួសធ្ងន់ កាលពីវេលាម៉ោង៧យប់ ថ្ងៃទី១៩ ខែមករា ឆ្នាំ២០១៧ នៅចំណុចភូមិក្បាលថ្នល់ ឃុំត្នោត ស្រុកកំពង់រោទ៍។
ភាគីបង្កហេតុ ដែលកាប់គូទំនាស់ដាច់ ម្រាមដៃ ព្រោះតែផ្ទុះជម្លោះរឿងសត្វឆ្កែខាំគ្នា នោះ មានឈ្មោះឆាំ សាលី ហៅដឿក សាលី អាយុ៥៤ឆ្នាំ មុខរបរកសិករ មានលំនៅក្នុងភូមិ កើតហេតុខាងលើ។ ចំណែកជនរងគ្រោះ មាន ឈ្មោះសូ សុធាត អាយុ៣៩ឆ្នាំ មុខរបរកសិករ មានលំនៅក្នុងភូមិជាមួយគ្នា (ជាប់របងផ្ទះគ្នា)។
តាមប្រភពពីកន្លែងកើតហេតុ បានឱ្យដឹង ថា នៅមុនពេលកើតហេតុ សត្វឆ្កែរបស់ជនបង្កហេតុ បានចូលទៅខាំសត្វឆ្កែរបស់ជនរងគ្រោះ ដល់ក្នុងផ្ទះ ឃើញបែបនេះ ជនបង្កហេតុក៏ទាញ ចម្ពាមកៅស៊ូបាញ់សត្វឆ្កែរបស់ជនរងគ្រោះ ដែលកំពុងតែខាំគ្នានោះ។ នៅពេលនោះ ស្ត្រី ជាប្រពន្ធរបស់ជនរងគ្រោះ ប្រទះឃើញ ក៏ស្តី បន្ទោសជនបង្កហេតុថា គ្រាន់តែសត្វឆ្កែខាំគ្នា ក៏ចាំបាច់យកចម្ពាមកៅស៊ូមកបាញ់ធ្វើអី ខ្លាច ត្រូវចំមនុស្សនាំឱ្យមានរបួស។ ភ្លាមនោះ ជន- បង្កហេតុច្រឡោតខឹង ក៏កើតមានជម្លោះតឹង- សរសៃកដាក់គ្នាជាមួយប្តីប្រពន្ធជនរងគ្រោះ។
ប្រភពដដែលបន្តថា ដោយសារតែកំហឹង ឆេះឆួលខ្លាំងពេក ទប់មិនជាប់ ស្រាប់តែជនបង្កហេតុបានស្ទុះទៅទាញពូថៅពីក្នុងផ្ទះ ចូល ទៅកាប់ប្រហារជនរងគ្រោះ បណ្តាលឱ្យដាច់ ម្រាមដៃខាងស្តាំរងរបួសធ្ងន់ សន្លប់ស្តូកស្តឹង នៅនឹងកន្លែងតែម្តង។
ក្រោយកើតហេតុ ជនរងគ្រោះត្រូវបាន ក្រុមគ្រួសារដឹកបញ្ជូនទៅកាន់មណ្ឌលសុខភាព ដើម្បីព្យាបាលរបួស។ ចំណែកជនបង្កហេតុ ត្រូវបានសមត្ថកិច្ចចុះចាប់ឃាត់ខ្លួន នាំយកទៅ សាកសួរ និងរៀបចំកសាងសំណុំរឿង បញ្ជូន ទៅចាត់ការតាមនីតិវិធី៕