ភ្នំពេញ៖តារាចម្រៀងឃីន ស្រីនាថ ហៅអ៊ីវ៉ា ទើបតែបង្ហាញគូស្នេហ៍ថ្មីរយៈពេល៤ខែ ប៉ុណ្ណោះ ក្រោយលាក់លៀមអស់រយៈពេលជាង៧ឆ្នាំ (២០១៦-២០២៣) ។ការព្រមបញ្ចេញមុខម្ចាស់បេះដូងនៅពេលនេះមិនមែនសុខៗស្រីនាថ ស្ម័គ្រចិត្តធ្វើបែបនេះឡើយ តែដោយសារអនាគតស្វាមីនាងលោកលី សេងហួរ ម្ចាស់ក្លឹបបាល់ទាត់សៀមរាបយូណាយធីត មិនព្រមសាងស្នេហ៍ដោយបិតបាំងតទៅទៀតទើបធ្វើឲ្យតារាសាច់សខ្ចីទ័លច្រក។ចំពោះលទ្ធផលដែលលោកសេងហួរ ទទួលបានក្រោយលាតត្រដាងស្នេហ៍អ៊ីវ៉ា ជាសាធារណៈនោះគឺលោកលែងបារម្ភខ្លាចមានប្រុសផ្សេងៗទៀតតាមញ៉ែស្រីស្អាតរូបនេះទៀតហើយ ព្រោះគ្រប់គ្នាបានដឹងថាពេលនេះស្រីនាថ មានម្ចាស់ចិត្ត មិនមែនបេះដូងនៅទំនេរ។ចំណែកលោក”ប”ដែលជាថៅកែក្លឹប និងហាងបញ្ចាំដ៍ធំមួយនៅក្រុងសៀមរាប និងជាប្អូនមន្រ្ដីធំផ្កាយ៣ម្នាក់ដែលតាមស្នេហ៍ស្រីនាថ ជាច្រើនឆ្នាំមកហើយនោះពេលនេះមនុស្សជំនិតរបស់ថៅកែបានបង្ហើបប្រាប់អ្នកយកព័តមានយើងថាប្អូនមន្រ្ដីធំរូបនោះបានដកខ្លួនចេញទៅហើយ ទោះជាបើធ្វើការប្រៀបធៀបរវាងទ្រព្យសម្បត្តិរបស់លោកនិងម្ចាស់ក្លឹបបាល់ទាត់នោះលោកគ្មានចំណុចក្រោមផ្នែកណាមួយក្ដី តែស្រីនាថ ផាត់ចោលសថៅកែ ជ្រើសរើសម្ចាស់ក្លឹបបាល់ទាត់ព្រោះនាងមិនចូលចិត្តប្រុសពូកែប្រចណ្ឌ។
ប្រភពបានឲ្យដឹងថាអ៊ីវ៉ា និងលោកលី សេងហួរ បានក្លាយទៅជាគូដណ្ដឹងគ្នាទៅហើយ ប្រសិនបើគ្មានអ្វីប្រែប្រួលទេ អ្នកទាំងពីរនឹងរៀបការនៅឆ្នាំ២០២៤ ខាងមុខនេះហើយតាមសំណើររបស់លោកអ៊ូ វ៉ាវ ដែលមិនចង់ឃើញកូនស្រីរបស់លោកមានប្ដី ហើយលោកបានកូនប្រសារមកជំនួសដៃជើង។ចំណែកស្រីនាថ វិញធ្លាប់គិតថានាងចង់រៀបការនៅអាយុ៣០ឆ្នាំ គឺនៅឆ្នាំ២០២៣ នេះព្រោះយល់ថាមនុស្សស្រីអាយុប៉ុណ្ណេះមិនចាស់ ឬក្មេងពេកទេ តែម៉ាល្មម តែនៅឆ្នាំនេះនាងបែជាមិនហ៊ានគ្រងឈុតកូនក្រមុំមែនទែនទៅវិញ ព្រោះតែខ្លាចប៉ៈពាល់ដល់អាជីពចម្រៀងរបស់ខ្លួននេះឯង ដោយសារតែមានតារាមិនតិចនាក់ទេ ពេលរៀបការប្ដីរួចលែងសូវស្ទុះទៅមុខទៀត។ប៉ុន្ដែលោកវ៉ាវ វិញមិនយល់បែបនេះឡើយលោកថាតារាគេគាំទ្រនៅលើសម្ថភាព ហេតុនេះលោកថាទោះជាមានប្ដីហើយក៍ដោយឲ្យតែនៅច្រៀងសម្ដែងបានល្អគឺនៅតែមានអ្នកស្រលាញ់ចូលចិត្តដូចដើមអីចឹង។តែលោកថាផ្ទុយទៅវិញរឿងដែលទុកជីវិតនៅលីវយូពេកទៅវិញទេដែលធ្វើឲ្យអត់ប្រយោជន៍ ព្រោះមនុស្សស្រីប្រៀបដូចជាផ្ការីកលំអងកាលណាក៍រោយស្រពោនទៅវិញនោះជាច្បាប់ធម្មជាតិ។
មើលទៅអ៊ីវ៉ា គ្មានលែសណាទៀតអាចពន្យាពេលការប្ដីតទៅទៀតនោះទេ ព្រោះមិនមែនតែលោកវ៉ាវនោះទេ ដែលជម្រុញឲ្យនាងរៀបការនៅឆ្នាំក្រោយនេះ តែលោកហួរ ក៍ចង់ដឹកដៃគូស្នេហ៍ក្រាបផ្ទឹមឲ្យបានឆាប់កាន់តែល្អ ហេតុនេះហើយបើស្រីនាថ ប្រឆាំងជាមួយមនុស្ស២នាក់នេះគឺនាងហាក់ដូចជាធ្វើឲ្យឪពុកផង គូណ្ដឹងផងមិនយល់ស្របតាមនាងទៀតឡើយ។
ក្រៅពីអ៊ីវ៉ា តារាដែលធ្លាប់សាងស្នេហ៍លាក់បាំងបានយូបំផុតមានដូចជាសុខ ពិសី និងសុខ ស្រីនាង ជាដើម ហើយរហូតមកដល់ពេលនេះមានតែស្រីនាថ ម្នាក់ប៉ុណ្ណោះដែលមានដំណឹងរៀបការប្ដីមុនរៀមច្បងទាំងពីរ ហេតុនេះមិនយូទេតារាចម្រៀងសាន់ដេរូបនេះនឹងក្លាយទៅជាថៅកែស្រីក្លឹបបាល់ទាត់សៀមរាបយូណាយធីត ជាមិនខាន។ដោយឡែកសម្រាប់អាជីពចម្រៀងវិញស្រីនាថ នៅតែបន្ដច្រៀងឲ្យផលិតកម្មសាន់ដេដោយគ្មានកុងត្រាឡើយ ទោះជាមុននេះមានព័តមានថាថោន ,Galaxy និងហង្សមាសចង់អូសទាញនាងទៅធ្វើជាសមាជិករបស់ពួកគេក្ដី។ប្រភពបានឲ្យដឹងថាអ៊ីវ៉ា ភ័យខ្លាចការប្ដូរទ្រនុំចាស់ផ្លាស់ទៅទ្រនុំថ្មីនាងមិនត្រូវបានស្ថិតក្នុងគោលដៅដែលគេនឹងលើកតំកើង ទើបស្រីស្រស់មិនហ៊ានប្រថុយ ។ម្យាងទៀតថៅកែសាន់ដេក៍បានផ្ដល់សិទ្ធិពិសេសឲ្យនាងដែរ តាមរយៈការមានសិទ្ធច្រៀងតែបទណាដែលខ្លួននាងស្រលាញ់ចូលចិត្ត បើបទដែលមិនពេញចិត្តអាចបដិសេធច្រៀងបានគ្រប់ពេល។
អ្នកជំនាញសិល្បៈបានលើកឡើងថាអ៊ីវ៉ា នឹងមានទីផ្សារចម្រៀងប្រែប្រួល ប្រសិនបើនាងចូលGalaxy ឬហង្សមាសព្រោះនាងមានដៃគូថ្មី។ប៉ុន្ដែលោកវ៉ាវ ថាស្រីនាថ នឹងធ្វើការទៅតាមពេលវេល ពោលគឺមិនមែនតាំងចិត្តថាច្រៀងឲ្យសាន់ដេរហូតនោះទេ តែកូនស្រីលោកបានចាត់ទុកសាន់ដេដូចជាឪពុកម្ដាយទី២ ព្រោះនាងល្បីដល់សព្វថ្ងៃដោយសារតែផលិតកម្មនេះបណ្ដុះបណ្ដាលនិងជ្រោមជ្រែងរហូតមក ហើយសាន់ដេក៍មិនធ្លាប់កាត់លុយភាគរយពីតារាដែរ ព្រោះថៅកែចង់ឲ្យកូនចៅលោកមានបាន៕
