ខេត្តស្វាយរៀង ៖ នារីវ័យក្មេងម្នាក់ ព្រោះតែតូចចិត្តនឹងបងស្តីបន្ទោសពីរឿងចូលចិត្តដើរលេង មិនសូវជួយការងារផ្ទះឪពុកម្តាយ ស្រាប់ តែរត់ទៅសំងំចងកស្លាប់យ៉ាងអាណោចអាធ័ម កាលពីវេលាម៉ោង៩និង៣០នាទីយប់ ថ្ងៃទី១៩ ខែមករា ឆ្នាំ២០១៧ នៅចំណុចបន្ទប់ដេក របស់ខ្លួន ស្ថិតក្នុងភូមិគោកល្វៀង សង្កាត់ព្រៃអង្គុយ ក្រុងបាវិត។
នារីវ័យក្មេងចិត្តខ្លាំងគំនិតខ្លី ដែលចងក ធ្វើអត្តឃាតនោះ មានឈ្មោះសំ លក្ខណា អាយុ ១៧ឆ្នាំ មានលំនៅក្នុងភូមិកើតហេតុខាងលើ។
តាមសម្តីបុរសឈ្មោះម៉ាន់ ណូយ អាយុ ៥៣ឆ្នាំ ត្រូវជាឪពុករបស់នារីរងគ្រោះ បាន រៀបរាប់ប្រាប់ថា កូនស្រីរបស់គាត់ម្នាក់នេះ ជា មនុស្សចូលចិត្តដើរហើរចោលផ្ទះពពាក់ពពូន ជាមួយមិត្តភក្តិមិនសូវលោះថ្ងៃឡើយ ចំណែក ការងារក្នុងផ្ទះមិនសូវយកចិត្តទុកដាក់ជួយជំនួស ដៃជើងឪពុកម្តាយនោះទេ។
បុរសជាឪពុកនារីរងគ្រោះ បន្តថា លុះមក ដល់យប់ថ្ងៃទី១៩ ខែមករា ឆ្នាំ២០១៧ ក្រោយ ពីឃើញកូនស្រីនេះត្រឡប់មកពីដើរលេងយប់ ជ្រៅពេក ទើបបងរបស់នាងទ្រាំមិនបាន ក៏ស្តី បន្ទោស២-៣ម៉ាត់ ពីរឿងដែលនាងចូលចិត្ត ដើរលេង មិនជួយធ្វើការងារផ្ទះ។ ក្រោយពី ត្រូវបងស្តីបន្ទោសរួចមក កូនស្រីនេះ បានដើរ ចូលទៅក្នុងបន្ទប់ដោយមិននិយាយស្តីអ្វីទាំង អស់។ ចំណែកក្រុមគ្រួសារក៏មិនបានចាប់អារម្មណ៍ និងស្មានដល់ថា កូនស្រីនេះ អាចនឹងមានគំនិត ខ្លី រហូតដល់ថ្នាក់បញ្ចប់ជីវិតបែបនេះឡើយ។
ឪពុកនារីរងគ្រោះ បានឱ្យដឹងទៀតថា លុះ ក្រោយពីកូនស្រីសំងំក្នុងបន្ទប់កន្លះម៉ោងមិន ព្រមចេញមកក្រៅសោះ ទើបពួកគាត់នឹកសង្ស័យ ក៏ដើរទៅហៅ តែមិនឮសូរសំឡេងឆ្លើយតប សោះ ទើបនាំគ្នាទម្លាយទ្វារចូលទៅមើល ស្រាប់ តែប្រទះឃើញកូនស្រីបានចងកស្លាប់បាត់ទៅ ហើយ ទើបរាយការណ៍ប្រាប់សមត្ថកិច្ចឱ្យចុះ មកជួយអន្តរាគមន៍។
ក្រោយកើតហេតុ សមត្ថកិច្ចជំនាញបាន ចុះពិនិត្យនិងធ្វើកោសល្យវិច័យសព រួចបញ្ជាក់ ថា នារីរងគ្រោះរូបនេះពិតជាចងកធ្វើអត្តឃាត ប្រាកដមែនដោយប្រើក្រណាត់ចងកភ្ជាប់ជាមួយ នឹងធ្នឹមបន្ទប់។ មូលហេតុក៏ព្រោះតែនារីរងគ្រោះ តូចចិត្តនឹងបងស្តីបន្ទោសពីរឿងដើរលេងមិន ជួយធ្វើការងារផ្ទះ។
សពនារីរងគ្រោះ ត្រូវបានសមត្ថកិច្ចប្រគល់ទៅឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕