ភ្នំពេញ៖ព្រាប សុវត្ថិ បានដើរចេញពីហង្សមាសរយៈពេលជាង៣ឆ្នាំទៅហើយ ខណៈដែលខេមរៈ សិរីមន្ដ លែងជាតារាហង្សមាសទើបតែជាងជិត១០ខែ ។ប៉ុន្ដែក្រោយបាត់តារាស្នូលរបស់ខ្លួនដល់ទៅ២ដួងនេះហង្សមាសនៅមិនទាន់ឃើញទិញតារាថ្មីណាមកជំនួសព្រាប សុវត្ថិ និងខេមរៈ សិរីមន្ដ ឡើយ ខណៈដែលបច្ចុប្បន្នតារាប្រុសហង្សមាសក៍រកមិនទាន់ឃើញម្នាក់ណាជាតួឯកដែរ ។
តើហេតុអ្វីបានជាលោកឆាយ វីរៈយុទ្ធ ដែលជាតារាប្រុសលំដាប់ជូរមុខម្នាក់ដែរមិនអាចក្លាយទៅជាតារាដែលហង្សមាសទិញយកទៅធ្វើជាតួឯករបស់ខ្លួន?
លោកនូ ស៊ឹប បានប្រាប់តាមទូរស័ព្ទកាលពីពេលថ្មីៗនេះថាឆាយ វីរៈយុទ្ធ មានសម្ថភាពខ្លាំងម្នាក់ព្រោះច្រៀងសម្លេងលះល្អណាស់ ហើយបើអាចច្រៀងបទកន្ទឹ្រមបានគឺតារាផ្សេងៗទៀតនឹងពិបាកទប់ទល់។អតីតតារាហង្សមាសរូបនេះបានឲ្យដឹងដែរថាចំពោះមូលហេតុដែលវីរៈយុទ្ធ អាចត្រូវបានហង្សមាសមើលរំលងព្រោះតែពេលនេះអាចមកពីលោកក៍មានអាយុច្រើនដែរ អីចឹងគេអាចនឹងបណ្ដុះតារាថ្មីៗវ័យក្មេងដែលមានស្រាប់ជំនួសអ្នកដែលចាកចេញទៅវិញ។លោកនូ ស៊ឹប បន្ថែមទៀតថាម្យាងទៀតវីរៈយុទ្ធ អាចនៅមានកុងត្រាជាមួយសាន់ដេផង តែបើតាមសម្ថភាពដូចលោកយុទ្ធ នេះលោកមិនជឿរថាហង្សមាសមិនចាប់អារម្មណ៍នោះទេ ។
ឆាយ វីរៈយុទ្ធ ធ្លាប់ប្រាប់អ្នកយកព័តមានយើងដែរថាលោកពិតជានៅមានកុងត្រាជាមួយសាន់ដេមែន ប៉ុន្ដែលោកថានាពេលខាងមុខគ្មានអ្នកណាម្នាក់ដឹងថាមានរឿងអ្វីកើតឡើងទេ។អតីតតារាBlue Diamond ,M និងBig man រូបនេះថាលោកសុំមិននិយាយថាតើហង្សមាសពិតជាបានទាក់ទងមកលោកមែន ឬយ៉ាងណានោះទេ តែបច្ចុប្បន្នលោកនៅតែច្រៀងឲ្យសាន់ដេ ។
ប្រភពបានឲ្យដឹងថាផលិតកម្មសាន់ដេក៍មិនចង់ឲ្យឆាយ វីរៈយុទ្ធ ចាកចេញនោះដែរដោយសារតែខ្លួនបានបាត់បង់តារាប្រុសជាបន្ដបន្ទាប់ទៅហើយ ក្នុងនោះមានដូចជាខេមរៈ សិរីមន្ដ ,ខាន់ ជេសម៍ ,អនុស្សាវរីយ៍ និងនីកូ ជាដើម។ប៉ុន្ដែអ្នកជំនាញសិល្បៈថារឿងនេះសំខាន់នៅលើតារាចម្រៀងទេជាអ្នកសម្រេចចិត្តក្រោយពេលផុតកុងត្រាថាគូតែបន្ដនៅច្រៀងផលិតកម្មចាស់ទៀត ឬទៅទ្រនុំថ្មី។សម្រាប់មហាជនមើលឃើញថាក្រោយព្រាប សុវត្ថិ និងខេមរៈ សិរីមន្ដ ចាកចេញព្រមគ្នាៗនោះ ពេលនេះហង្សមាសពិបាករកអ្នកជំនួសព្រោះតារាចម្រៀងវ័យក្មេងដែលខ្លួនជ្រើសបាននោះភាគច្រើនល្បីតែ១ឆាវក៍បាត់មុខទៅវិញ ខណៈដែលលោកឆាយ វីរៈយុទ្ធ វិញគឺជាតួឯករបស់សាន់ដេ។
លោកនូ ស៊ឹប បន្ថែមថាតាមលោកមើលមិនអាចរកតារាណាអាចយកមកជំនួសព្រាប សុវត្ថិ បានទេ ព្រោះសម្ថភាពខ្លាំងណាស់ ។ចំណែកតារាថ្មីៗនៅហង្សមាសលោកឃើញល្បីម៉ាល្មមៗ មិនទាន់មានតារាណាល្បីលេចធ្លោខ្លាំងដាច់គេឡើយ ។
ឆាយ វីរៈយុទ្ធ នៅសាន់ដេគឺជាដៃគូរបស់ស្រីស្អាតសុខ ពិសី ហើយភាពល្បីល្បាញរបស់តារាកូន១រូបនេះក៍នៅលើការកំណត់របស់ភរិយាលោកអ្នកស្រីសែ ចាន់ឌី ដែរដោយសារតែអ្នកនាងគឺជាអ្នកនិពន្ធឲ្យប្ដីច្រៀងហើយពេលនេះនៅសាន់ដេលោកស្ទើតែជាតារាប្រុសម្នាក់ទោលដែលគ្មានគូប្រជែងទៅហើយ ព្រោះតែគ្មានតារាប្រុសណាមានភាពត្រដមត្រសងខ្លួនទេ តាំងពីខេមរៈ សិរីមន្ដ ចាកចាញកាលពីឆ្នាំ២០០១៧ ម្លេះ។ប្រភពបានឲ្យដឹងថាលោកឆាយ ចាន់ឆោម ហៅវីរៈយុទ្ធ នៅតែមានភាគរយអាចទៅរួចក្នុងការទៅហង្សមាសនាពេលអនាគត ព្រោះថាពីមុនលោកគ្មានគម្រោងទៅផលិតកម្មមួយនេះដោយសារតែមិនចង់ប្រជែងជាមួយព្រាប សុវត្ថិ ព្រោះលោកជាក្មួយសាច់ថ្លៃរបស់លោកសុវត្ថិ ដោយសារតែលោកសុវត្ថិ ត្រូវជាឪពុកមាបង្កើតរបស់ភរិយា(ប្រពន្ធមុន)លោកដែរ ។យ៉ាងណាលោកចាន់ឆោម ពេលនេះទៅច្រៀងនៅផលិតកម្មថ្មីឬនៅផ្ទះចាស់នោះគេជឿរថាក៍ទាក់ទងនិងការយល់ព្រមពីភរិយាលោកដែរ ព្រោះថាអ្នកស្រីចាន់ឌី ប្រៀបដូចជាជំនួយការរបស់ប្ដីទៅហើយ គឺនាងតែងតែជួយស្វាមីនៅក្រោយខ្នងគ្រប់ពេល៕