ភ្នំពេញ៖ស្រីស្អាតហ៊ិន ច័ន្ទនីរ័ត្ន បានទៅដើរកម្សាន្ដនៅទីក្រុងNew York តំបន់Time Square កាលពីចុងខែកញ្ញា ដោយបង្ហាញភាពរីករាយជាខ្លាំង ហើយនាងទើបតែវិលត្រឡប់មកបន្ដការងារសិល្បៈសារជាថ្មីឡើងវិញកាលពីពេលថ្មីៗនេះទេ។ទាំងនៅលើហ្វេសបុក និងTik Tok ស្រីស្រស់ហ៊ិន ច័ន្ទនីរ័ត្ន មិនបង្ហាញឲ្យគេឃើញថានាងរួមតំណើរជាមួយអ្នកណាឡើយ តែក្នុងពេលកម្សាន្ដជាលក្ខណៈឯកជននោះនាងមានគេតាមថតរូបភាពឲ្យជាប់ជានិច្ច ដែលបញ្ជាក់ថាមិនមែនស្រីស្អាតទៅតែម្នាក់ឯងឡើយ។ចំពោះអ្នកដែលរួមដំណើរជាមួយស្រីស្រស់នេះគេសង្ស័យថាជាលោកគ្រូពេទ្យសុវណ្ណារិទ្ធ ដែលជាសង្សារថ្មីនាងព្រោះប្រុសក្មេងមានអាយុតិចជាងនាង១ឆ្នាំនេះក៍ធ្លាប់ត្រូវបាននាងបង្ហាញការរួមដំណើរជាមួយនាងទៅកម្សាន្ដនៅកោះមួយនៅប្រទេសថៃកាលពីចុងខែធ្នូ ឆ្នាំ២០២២ ផងដែរ ខណៈដែលតាមព័តមានថាអំឡុងពេលដែលនាងច័ន្ទនីរ័ត្ន ទៅដើរលេងនៅបារាំងនោះលោកគ្រូពេទ្យក្មេងក៍ធ្វើជាអង្គរក្សតាមការពារនាងដល់ទីនោះដែរ។
អ្នកយកព័តមានយើងបានទូរស័ព្ទទៅហ៊ិន ច័ន្ទនីរ័ត្ន កាលពីពេលថ្មីៗនេះ តែតេមិនចូលទេ ទើបមិនអាចសុំការបំភ្លឺពីនាងអំពីដំណើរទេសចរលើទឹកដីអាមេរិក និងចំណងស្នេហានាងជាមួយគ្រូពេទ្យលោកសុវណ្ណារិទ្ធ នោះបានឡើយ ។យ៉ាងណាគេកត់សម្គាល់ថារយៈពេលជាង១ឆ្នាំទៅហើយ ដែលច័ន្ទនីរ័ត្ន បានផ្អាកបង្ហាញភាពផ្អែមល្ហែមស្នេហ៍ជាមួយលោកគ្រូពេទ្យសុវណ្ណារិទ្ធ ព្រោះនាងបានបង្ហាញទំនាក់ទំនងពិសេសជាមួយលោកគ្រូពេទ្យសង្សាររូបនេះកាលពីខែឧសភា ឆ្នាំ២០២២ ដែលពេលនេះដោយសារតែមានព័តមានបោកបក់លើស្រីស្អាតថានាងស្អាតប៉ុណ្ណឹងដែរ មិនគូរណាលោកចេន រៀបការប្រពន្ធចោលនាង ហើយលោកមង្គល ងាកទៅកៀកកើយជាមួយអ្នកមេម៉ាយ គ្មានស្រណោះជាមួយនាងបែបនេះសោះ ។ជាការឆ្លើយតបច័ន្ទនីរ័ត្ន បង្ខំចិត្តបង្ហាញសង្សារថ្មីនាងគឺលោកគ្រូពេទ្យសុវណ្ណារិទ្ធ ដែលនាងនិងលោកបានទាក់ទងគ្នាតាំងពីឆ្នាំ២០២០ ម្លេះ។Fan ជាច្រើនសរសើរថានីរ័ត្ន ភ្នែកមុត ឬពូកែរកបានសង្សារជាប្រុសស្អាត ហើយនៅក្មេងជាងនាងទៅទៀត ។ប៉ុន្ដែគ្មានដំណឹងអ្នកទាំងពីរគ្រោងដឹកដៃគ្នាចូលរោងការនៅពេលណាឡើយ ។ចំពោះការផ្អាកកៀកកើយម្ចាស់ចិត្តថ្មីរបស់នីរ័ត្ន រយៈពេលជាង១ឆ្នាំនេះ ត្រូវបានគេជឿរថានោះដោយសារតែនាងខ្លាចប៉ៈពាល់ដល់អាជីព និងបារម្ភខ្លាចចំណងស្នេហាមានការប្រែប្រួលនាំឲ្យមានអ្នកថានាងជាតារាអភ័ព្វស្នេហ៍ដូចមុនទៀតជាដើម ។ប៉ុន្ដែការចេញមុខគ្រូពេទ្យស្អិតល្មូតជាមួយនាងកាលពីពាក់កណ្ដាលឆ្នាំ២០២០ នោះក៍ធ្វើឲ្យបុរសមិនតិចនាក់ទេដែលលួចស្នេហ៍នាងស្រងាកចិត្ត តែពេលនេះនាងលែងបង្ហាញជាចំហធ្វើឲ្យពួកគេនៅតែមានឱកាសដណ្ដើមបេះដូងស្រីស្អាតរូបនេះតទៅទៀត។
ហ៊ិន ច័ន្ទនីរ័ត្ន ត្រូវបានគេចាត់ទុកថានាងជាតារាមិនសូវកាក់កបរឿងស្នេហាព្រោះនាងធ្លាប់បានបែកបាក់ស្នេហ៍ជាបន្ដបន្ទាប់ តែស្រីស្រស់មិនដែលបង្ហាញពីទុក្ខសោកបេះដូងឈឺចាប់ព្រោះស្នេហ៍ម្ដងណាឡើយ ដោយសារតែនាងមានជម្រើសស្នេហ៍ច្រើន។អ្វីដែលតារារួមអាជីពជាច្រើននៅតែសរសើរច័ន្ទនីរ័ត្ន នោះគឺបើប្រុសតាមស្នេហានាងនោះនាងមិនមានអារម្មណ៍ស្នេហ៍ទោះជាបុរសនោះមានទ្រព្យច្រើនយ៉ាងណាក៍នាងអត់ចាប់អារម្មណ៍ដែរ។ប្រភពបានឲ្យដឹងថាមានមន្រ្ដីធំៗមួយចំនួនចង់ប្រគល់តំណែងជំទាវជូននីរ័ត្ន តែពិធីការិនីធ្មេញចំពើសរូបនេះអត់ចាប់អារម្មណ៍ ខណៈដែលបុរសធ្លាប់ប៉ៈស្នេហាជាមួយនាងនាពេលកន្លងមកនោះគឺសុទ្ធតែមានរូបរាងសង្ហារទាំងអស់។
ហ៊ិន ច័ន្ទនីរ័ត្ន បានចាប់អាជីពសម្ដែងរយៈពេល១៦ឆ្នាំមកហើយ តែតាំងពីនាងក្លាយជាពិធីការិនីបាយ័នមកនាងមិនសូវសម្រុកថតរឿងនិងខារ៉ាអូខេ ទេពោលគឺទាំងបទចម្រៀងនិងភាពយន្ដទាល់តែនាងពេញចិត្តដែរទើបទទួលថត។ពិធីការិនីរូបស្រស់នេះមិនទាន់លេចឭថានាបានកែកុនសម្រស់ផ្នែក១ណាឡើយ ហើយនាងក៍មិនដែលលេងខ្លួនស៊ិចស៊ីដូចជាស្លៀកបញ្ចេញគល់ភ្លៅ និងលេចគល់សុដន់ឲ្យគេព្រឺព្រួចដែរ គឺតែងខ្លួនសាមញ្ញៗតែគេចាប់អារម្មណ៍នាងច្រើន។តារារួមអាជីពចង់ឃើញនីរ័ត្ន និងគ្រូពេទ្យសុវណ្ណារិទ្ធ ដឹកដៃគ្នាចូលរោងការ ព្រោះតែពួកគេចាត់ទុកថាអ្នកទាំងពីរសាកសមគ្នា តែរហូតមកដល់ពេលនេះដំណឹងតារាវ័យ៣៣ឆ្នាំ រូបនេះរៀបការនៅតែសូន្យឈឹងដដែល ៕
