ភ្នំពេញ៖នៅឆ្នាំ២០២៣ នេះមានស្រីស្អាត២ដួងដែលបរាជ័យក្នុងការលាក់បាំងកំណាន់ចិត្តបានតទៅទៀតនោះគឺពិធីការិនីធ្មេញចំពើសរូបស្អាតនាងហ៊ិន ច័ន្ទនីរ័ត្ន និងស្រីស្រស់ឃីន ស្រីនាថ ហៅអ៊ីវ៉ា ដែលពេលនេះពួកគេផ្អែមល្ហែមជាមួយគូស្នេហ៍និងស្អិតល្មូតដូចស្កតាំងម៉ែដោយបើកចំហ ។
១៖ហ៊ិន ច័ន្ទនីរ័ត្នៈពិធីការិនីវ័យ៣២ឆ្នាំ រូបនេះបានបង្ហាញគូស្នេហ៍ថ្មីបែបលាក់លៀមជាមួយលោកគ្រូពេទ្យសុវណ្ណារិទ្ធ កាលពីដើមឆ្នាំ២០២២ ដើម្បីទប់ទល់រឿងគេបង្អាប់នាងថាប៉ះតែស្នេហាមិនសមប្រកបចុងក្រោយត្រូវលោកចេន ដែលគេសង្ស័យថាមានស្នេហាជាមួយនាងរៀបការប្រពន្ធចោល និងលោកសេង មង្គល លែងស្និតស្នេហ៍នាងដោយងាកទៅកៀកកើយជាមួយអ្នកមេម៉ាយទ្រព្យស្ដុកម្នាក់ទៅវិញ។ប៉ុន្ដែរឿងដែលគូរឲ្យភ្ញាក់ផ្អើលនៅពេលដែលនីរ័ត្ន ស្ងាត់រឿងស្នេហ៍គ្រូពេទ្យក្មេងមិនទាន់ទាំងដល់១ឆ្នាំផង ពេលនេះនាងបែជាកៀកកើយបុរសម្នាក់មានហ្វេសបុកឈ្មោះថាដាយមិន ឌី ទៅវិញ ដែលរឿងស្នេហាមួយនេះទប់លែងជាប់នៅពេលដែលស្រីស្អាតរូបនេះបានទទួលគ្រឿងឥស្សរិយយស ថ្នាក់មហាសេរីវឌ្ឍន៍ កាលពីថ្ងៃទី១០ តុលា បន្ទាប់ពីថតចប់រឿង”កូនប្រុសក្រោមពន្លឺព្រះច័ន្ទពេញបូណ័មី “ ហើយភ្លាមនោះលោកឌី បានចេញសារខមិនសាទរ នាងហើយស្រាប់តែនាងបានហៅបុរសនោះថាជាកំពូលស្នេហ៍”Huni “។មានភស្ដុតាងជាច្រើនទៀតដែលបែកធ្លាយដូចជារូបភាពជាច្រើនដែលអ្នកទាំងពីរបានទៅដើរលេងកម្សាន្ដនៅអាមេរិកថ្មីៗជាមួយគ្នាជាច្រើនកន្លែងគឺមើលទៅអ្នកទាំងពីរចិត្ត១ ថ្លើម១ ទៅហើយ។សម្រាប់តារារួមអាជីពវិញភាគច្រើនបានសរសើរថានីរ័ត្ន និងសង្សារសាកសមគ្នាហើយជម្រុញឲ្យនាងគូរតែដឹកដៃគូស្នេហ៍ចូលរោងការឆាប់ៗ ដើម្បីបិទបញ្ចប់រឿងមានអ្នកថានាងជាតារាអភ័ព្វស្នេហ៍ ។ប៉ុន្ដែខ្លះទៀតដាក់ជាចម្ងល់ថាពេលនេះច័ន្ទនីរ័ត្ន បានថ្មីចោលចាស់មែន ?តើនាងទុកលោកគ្រូពេទ្យសុវណ្ណារិទ្ធ នៅត្រង់ណាទៅ ?
២៖អ៊ីវ៉ាៈ តារាចម្រៀងឃីន ស្រីនាថ បានលាក់ស្នេហ៍ជាមួយលោកលី សេងហួរ ម្ចាស់ក្លឹបបាល់ទាត់សៀមរាប យូណាយធីត រយៈពេល៧ឆ្នាំ គឺទើបតែនៅខែឧសភា ឆ្នាំ២០២៣ ដែលចំណងស្នេហានេះលែងអាចបិទបាំងបានតទៅទៀត ព្រោះតែកូនអ្នកមានទ្រព្យស្ដុករូបនោះមានចេតនាចង់បង្ហាញស្នេហ៍ជាសាធារណៈ ហើយហាក់ដូចជាធុញទ្រាន់ចំពោះការសាងស្នេហ៍ដោយលួចលាក់តទៅទៀត បើទោះជាស្រីនាថ ហាក់ស្ទាក់ស្ទើក្នុងការបញ្ចេញមុខម្ចាស់ស្នេហ៍ជាចំហព្រោះខ្លាចប៉ៈពាល់ដល់អាជីពក្ដី ប៉ុន្ដែដើម្បីសម្របខ្លួនតាមសង្សារនាងមិនអាចបន្ដលេងស្នេហាដោយអាថ័កំបាំងតទៅទៀតបានទេ ។ប្រភពបានឲ្យដឹងថាស្រីនាថ និងលោកសេងហួរ បានភ្ជាប់ពាក្យជាមួយគ្នាដោយមានចាស់ទុំទាំងសងខាងដឹងឭទៅហើយ មុនពេលពួកគេហ៊ានបណ្ដើរគ្នាដោយបើកចំហ កាលពីខែឧសភា ឆ្នាំ២០២៣ នោះតែអ្នកទាំងពីរនៅមិនទាន់បញ្ចេញរូបភាពបំពាក់ជញ្ជៀនឲ្យគ្នាទៅវិញទៅមកនោះឲ្យគេឃើញឡើយ។ដោយឡែកនៅថ្ងៃខួបកំណើតអ៊ីវ៉ា គម្រប់អាយុ៣០ឆ្នាំ កាលពីថ្ងៃទី១០ តុលា នោះក្រៅពីជូនពរម្ចាស់ស្នេហ៍លោកសេងហួរ ក៍បានធ្វើការរំលឹកនិងដាស់តឿនស្រីនាថ ថាកុំឲ្យភ្លេចរឿងថ្ពត់ដៃសន្យាជាមួយគ្នាហើយលោកចង់ឲ្យការព្រមព្រៀងគ្នាមួយនោះក្លាយជាការពិតក្នុងពេលឆាប់ៗខាងមុខនេះ ដែលរឿងសម្ងាត់នោះគេជឿរថាគ្មានរឿងអ្វីផ្សេងក្រៅពីមង្គលការឡើយ ព្រោះតារាសាន់ដេរូបនេះត្រូវបានឪពុកនាងលោកអ៊ូ វ៉ាវ ជម្រុញឲ្យរៀបការប្ដី៣ឆ្នាំទៅហើយតែនាងចេះតែពន្យាពេលជាបន្ដបន្ទាប់ព្រោះតែខ្លាចប៉ៈពាល់ដល់អាជីពនេះឯង។តែយ៉ាងណាអ៊ីវ៉ា ធ្លាប់ប្រាប់អ្នកយកព័តមានយើងថានាងចង់រៀបការនៅអាយុ៣០ឆ្នាំ ពោលគឺត្រូវនិងឆ្នាំ២០២៣ នេះតែម្ដង ដោយសារខ្លួនយល់ថាមនុស្សស្រីការប្ដីនៅអាយុនេះមិនចាស់ពេក ឬក្មេងពេក តែម៉ាល្មដល់វ័យមានគ្រួសារ។ចំណែកលោកវ៉ាវ មិនចង់ឃើញកូនស្រីសំណព្វចិត្តលោកលើកពេលការប្ដីទៀតទេ ព្រោះលោកចង់បានកូនប្រសារមកជំនួសដៃជើងលោកពិសេសគឺការបើករថយន្ដជូននាងទៅច្រៀងតាមគ្រប់ឆាកតន្រ្ដីទាំងឡាយនោះតែម្ដង។
មជ្ឈដ្ឋានមហាជនរងចាំមើលថាតើហ៊ិន ច័ន្ទនីរ័ត្ន អាចនឹងបិទបញ្ចប់ដានស្នេហ៍ចាស់តាមរយៈការជួបស្នេហ៍ថ្មី ដោយដឹកដៃលោកឌី ចូលរោងការនៅចុងឆ្នាំ២០២៣ ឬដើមឆ្នាំ២០២៤ ខាងមុខ ឬមួយអ៊ីវ៉ា ឯណ្ណោះទេដែលក្លាហានហ៊ានធ្វើជាកូនក្រមុំមែនទែនរបស់លោកសេងហួរ តាមរយៈការគ្រងឈុតអាពាហ៍ ពិពាហ៍ មុនច័ន្ទនីរ័ត្ន ?