ភ្នំពេញ ៖ អណ្តាតភ្លើងឆាបឆេះសន្ធោសន្ធៅចេញពីតូបនៅក្នុងផ្សារកណ្តាលបង្កឲ្យមានការ ភ្ញាក់ផ្អើលដល់សមត្ថកិច្ចនិងម្ចាស់តូបរត់ចូលទៅជញ្ជូនរបស់របរបានតិចតួចប៉ុណ្ណោះ ក្រៅពីនេះត្រូវ បានអណ្តាតភ្លើងលេបត្របាក់អស់ទាំងស្រុងចំនួន១៤តូបនិង៣តូបទៀត ឆ្លងរាលដាល កាលពីវេលាម៉ោង៣និង១៥នាទីទាបភ្លឺថ្ងៃទី២៣ ខែមករា ឆ្នាំ២០១៦ នៅក្នុងផ្សារកណ្តាលស្ថិតនៅសង្កាត់ផ្សារកណ្តាល១ ខណ្ឌដូនពេញ ។
តាមសម្តីពីសន្តិសុខដែលយាមនៅក្នុងផ្សារកណ្តាលបានឲ្យដឹងថា មុនពេលកើតហេតុពួកគាត់បានដេកយាមនៅក្នុងផ្សារ ស្រាប់តែមានធុំក្លិនឈ្ងៀម ពេលនោះពួកគាត់បានដើររកមើលនៅក្នុងផ្សារ ក៍ស្រាប់តែឃើញតូបមួយនៅកណ្តាលផ្សារដែលជាតូបអ៊ុតសក់បាន ឆាប ឆេះចេញជាអណ្តាតភ្លើងឡើងសន្ធោសន្ធៅ ពេលនោះដែរពួកគាត់ក៏បានរាយការណ៍ ទៅប្រាប់សមត្ថកិច្ចមូលដ្ឋានចុះមកដល់បានយកបំពង់ពន្លត់អគ្គីភ័យបាញ់អស់ជាង២០ បំពង់ នៅតែមិនរលត់ក៏បានទំនាក់ទំនងហៅរថយន្តសង្គ្រោះអគ្គីភ័យរបស់ស្នងការនគរបាលរាជធានីភ្នំពេញមកជួយអន្តរាគមន៍មានរថយន្តរបស់ស្នងការនគរបាល រាជធានីភ្នំពេញចំនួន១៨គ្រឿង រថយន្តស្រាបៀរកម្ពុជាមួយគ្រឿងគ្នាសរុបទាំងអស់១៩គ្រឿងបានបាញ់ទឹករលត់អស់ទៅវិញ ចំណែករថយន្តរបស់ក្រសួងមហាផ្ទៃ២គ្រឿងមកដល់តែមិនបានបាញ់ទឹកទេ ។ អណ្តាតភ្លើងបានរលត់អស់ទៅវិញនៅម៉ោង៤និង១៥នាទីថ្ងៃដដែល ។
ប្រភពព័ត៌មាននៅកន្លែងកើតហេតុមុនដំបូង បានឲ្យដឹងថា សង្ស័យមានអ្នកលួចចូលទៅដុត សមត្ថកិច្ចបានតាមចាប់ជនបង្កតែចាប់អត់បាន ។ ក្រោយកើតហេតុសមត្ថកិច្ចធ្វើការស្រាវ ជ្រាវបានឲ្យដឹងថា បណ្តាលមកពីទុស្សេខ្សែភ្លើងឆាបឆេះធ្វើឲ្យផ្ទុះធុងហ្គាសដែលទុកនៅ ក្នុងផ្សារទើបបង្កឲ្យមានការឆាបឆេះសន្ធោសន្ធៅបែបនេះ ។
អគ្គីភ័យខាងលើឆេះខូចខាតទាំងស្រុងអស់ចំនួន១៤តូចនិងឆ្លងរាលដាលរោលខ្មៅចំនួន៣ តូបទៀត រីឯរបស់របរដែលជញ្ជូនចេញមកខាងក្រៅបានតិចតួចប៉ុណ្ណោះ ។ តូបដែលឆេះ ខូចខាតភាគច្រើនជាតូបអ៊ុតសក់ ធ្វើក្រចក ម៉ាស្សា និងតូបលក់ខោអាវជាដើម ៕