ភ្នំពេញ៖ថ្វីត្បិតតែរយៈពេលចុងក្រោយនេះស្រីស្រស់តន់ ច័ន្ទសីម៉ា ស្ងាត់រឿងចេញមុខការពារថៅកែ និងមានគំនិតខ្វែងគ្នាជាមួយFan របស់នាងមួយចំនួនក្ដី តែតារាGalaxy រូបនេះលែងសូវមានភាពលេចធ្លោខ្លាំង បើប្រៀបធៀបសន្ទុះរបស់នាងកាលពីឆ្នាំ២០១៩ និង២០២០ ។ទោះជាយ៉ាងណានាងនៅតែជាតារាស្រីស្នូល របស់Galaxy ដដែល ព្រោះតែផលិតកម្មនេះមិនទាន់ទិញតារាស្រីជើងជើងខ្លាំងរូបណាមកប្រជែងឬជំនួសនាងនៅឡើយ ដែលធ្វើឲ្យតារាប្រុសជូរមុខរបស់ផលិតកម្មមួយនេះទាំង៣ដួងគឺព្រាប សុវត្ថិ ,ខេមរៈ សិរីមន្ដ និងខេម គ្មានជម្រើសផ្សេងក្រៅពីចាប់ដៃនាងតែម្នាក់តទៅទៀតនោះទេ ក្រោយពីដំណឹងពេជ្រ សោភា និងមាស សុខសោភា ចូលGalaxy ត្រូវបានស្ងប់ស្ងាត់។
អ្នកជំនាញសិល្បៈលើកឡើងថានាងតន់ ច័ន្ទសីម៉ា ច្រៀងស្ទីលស្រដៀងគ្នាទៅនិងអ្នកនាងខាត់ សុឃីម ហើយនាងផ្ដើមចេញពីអ្នកស្មូត ហេតុនេះការច្រៀងអឿនគឺបានល្អដូចគ្នាទៅនិងអ្នកនាងហ៊ឹម ស៊ីវន និងចំរើន សុភ័ក្រ្ដ ជាដើម។ចំណែកការមិនសូវលេចធ្លោរបស់នាងសីម៉ា នាពេលនេះអាចមកពីការធ្វើបទចម្រៀង ព្រោះនាងជាតារាដែលអាចច្រៀងបានជាច្រើនទម្រង់ ហេតុនេះឲ្យតែធ្វើបទត្រូវនឹងឡើងវិញភ្លាម។Composer ល្បីឈ្មោះម្នាក់នៅហង្សមាសដែលនិយាយស្នើរមិនឲ្យដាក់ឈ្មោះនោះថានាងច័ន្ទសីម៉ា នៅតែជាតារាដែលមានដៃគូល្អបំផុតនៅឆ្នាំ២០២៣ ព្រោះតារាប្រុសល្បីៗលំដាប់ជូរមុខក្លាយទៅជាដៃគូនាងតែម្នាក់គត់ ហេតុនេះតារាស្រីផ្សេងដែលចង់ចាប់ដៃគូជាមួយតារាប្រុសដែរ មិនអាចប្រៀបធៀបជាមួយនាងបានទេ ។ដោយឡែកចំពោះរឿងគេថានាងសីម៉ា ហាក់ចុះខ្សោយក្រោយនាងចេញមុខការពារថៅកែនោះត្រូវបានគ្រូភ្លេងរូបនោះថាវាជារឿងធម្មតា ព្រោះតែសីម៉ា ក៍ទទួលបានភាពល្បីល្បាញ ឬផលប្រយោជន៍ដោយសារតែថៅកែដែរ ។
គេកត់សម្គាល់ដែរថាតន់ ច័ន្ទសីម៉ា ហាក់មិនសូវលេចធ្លោរខ្លាំងដូចមុននេះមួយផ្នែកក៍ដោយសារតែនាងបាត់មុខពីឆាកតន្រ្ដីតាមស្ថានីយ៍ទូរទស្សន៍ស្ទើតែទាំងស្រុងដែរ ព្រោះតែអ្នកដឹកនាំកម្មវិធីសិល្បៈភាគច្រើនថ្ងូរថាគ្មានលទ្ធភាពជួលនាង ដោយសារថ្លៃពេក ឬបើជួលនាងម្នាក់អាចស្មើតារាល្បីល្មមៗជិត១០នាក់ជាដើម ។ប៉ុន្ដែនាងសីម៉ា នៅតែចេញមុខភាគច្រើនតាមបណ្ដារកម្មវិធីដែលរៀបចំដោយផលិតកម្មរបស់នាងហើយចំពោះការមិនព្រមទម្លាក់តម្លៃខ្លួនឲ្យសមល្មមតាមអ្នកដឹកនាំសិល្បៈនៅតាមស្ថានីយ៍ទូរទស្សន៍អាចមានលទ្ធភាពហៅនាងច្រៀងបាននោះគឺដោយសារតែអ្នកគ្រប់គ្រងមិនចង់ឲ្យនាងចេញមុខច្រើនពេក នាំតែសាំ។
គូរកត់សម្គាល់ថានាងតន់ ច័ន្ទសីម៉ា អាយុ២៥ឆ្នាំ ក្លាហានហ៊ានសារភាពថានាងបានកែសម្រស់ដល់ទៅ៣ចំណុចគឺទី១៖ចាក់ចង្កា ទី២៖ធ្វើច្រមុះ និងទី៣៖ពត់ធ្មេញ ដែលខុសពីតារាមួយចំនួនទៀតទោះជាកែច្រើនផ្នែកជាងនាងផង តែពួកគេអត់ហ៊ានទទួលស្គាល់ការពិតឡើយ។ប៉ុន្ដែតារាមួយចំនួនហ៊ានបង្ហាញជាចំហដូចជាការលាតត្រដាងរឿងស្នេហាជាសាធារណៈ និងកៀកកើយប្រុសស្នេហ៍ដោយទូលាយនោះបែជានាងសីម៉ា ខ្លាចទៅវិញហើយជាញឹកញាប់នាងថ្ងូរអត់សង្សារបើទោះជាគ្មានអ្នកណាជឿរជាក់លើនាងក្ដី ។ប្រភពបានឲ្យដឹងថានាងច័ន្ទសីម៉ា អាចកំពុងមានស្នេហាមិនសូវច្បាស់លាស់ទើបនាងមិនហ៊ានបញ្ចេញឲ្យគេបានស្គាល់មុខសង្សារបែបនេះ ក្រោយពីដំណឹងមានលោកឧកញ៉ាពោះម៉ាយម្នាក់ធ្លាប់តាមស្នេហានាងនោះបានស្ងប់ស្ងាត់ទៅវិញ។តែសីម៉ា ដឹងខ្លួនច្បាស់ថាការនិយាយពាក្យថាអត់សង្សាររបស់នាងនាពេលកន្លងមកនោះគ្មានអ្នកណាជឿរជាក់លើនាងឡើយ ព្រោះតែFan ថានាងស្អាតនិងល្បីប៉ុណ្ណឹងដែររឿងអីអត់សង្សារទៅ ?
អ្នកជំនាញសិល្បៈបានលើកឡើងដែរថាទោះជានាងតន់ ច័ន្ទសីម៉ា ល្បីល្បាញនាយុគសម័យថ្មីនេះយ៉ាងណាក៍គេមិនអាចយកនាងទៅប្រៀបធៀបជាមួយឱក សុគន្ធកញ្ញា ,ពេជ្រ សោភា ឬមាស សុខសោភា បានទេ ព្រោះតារារៀមច្បងទាំងអស់នោះបានសាងស្នាដៃជាច្រើនមកហើយ មុននាងសីម៉ា ត្រូវបានគេស្គាល់។ប៉ុន្ដែអតីតអ្នកចាត់ការទូទៅGalaxy លោកយឹម តាស្រង់ ធ្លាប់ប្រាប់ថាបច្ចុប្បន្នតន់ ច័ន្ទសីម៉ា ជាតារាស្ថិតក្នុងលំដាប់Grade A ៕
