ភ្នំពេញ៖តារាសម្ដែងនិងបង្ហាញម៉ូដលោកសេង មង្គល ដែលត្រូវបានគេសង្ស័យថាលោកមានស្នេហាជាមួយអ្នកមេម៉ាយទ្រព្យស្ដុកនិងត្រូវបានគេចាត់ទុកថាជាសេដ្ឋីនីលោកស្រីទ្រី ដាណា នោះនៅទីបំផុតលោកមិនមែនជាកូនកំលោះពិតរបស់ថៅកែលក់មាសពេជ្រល្បីឈ្មោះលើOnline នេះឡើយ ព្រោះអនាគតស្វាមីលោកស្រីដាណា ជាបុរសរូបសង្ហារលោករស់ រជ្ជសាល តារាបង្ហាញម៉ូដ និងជាអតីតបុរសអូតែស ដែលបម្រើការងារនៅលើយន្ដហោះឯណ្ណោះទេ ហើយអ្នកទាំងពីរបានភ្ជាប់ពាក្យជាមួយគ្នាកាលពីព្រឹកថ្ងៃទី៩ ខែវិចិ្ឆកា ឆ្នាំ២០២៣ ។ ចំណែកលោកហូ ប៉ូសេង ហៅសេង មង្គល មិនបានទៅចូលរួមពិធីចូលចែចូវនោះទេ ហើយនៅលើហ្វេសបុករបស់លោកបង្ហាញថាលោកកំពុងមានតំណើរកម្សាន្ដនៅប្រទេសឡាវ និងថៃ ហាក់ដូចជាលោកបានដឹងនូវរឿងរ៉ាវអ្វីមួយដែលកើតមានចំពោះមុខធ្វើឲ្យស្មុគស្មាញរហូតត្រូវតែបង្ខំចិត្តទៅលំហែអារម្មណ៍នៅប្រទេសជិតខាងមួយរយៈ។លោកសេង ក៍មិនបានចែកចាយ(Share) នូវកម្មវិធីពិសេសរបស់លោកស្រីទ្រី ដាណា ដែរហើយលោកក៍មិនទាន់បានបង្ហាញសាទរ ឬភ្ញាក់ផ្អើលចំពោះពិធីនោះដូចសិល្បករដ៍ទៃទៀតដែរ ពោលគឺរក្សារភាពស្ងៀមស្ងាត់ និងថ្លែងសារខ្លីថា”បន្ដដំណើរទៅមុខទៀត “។
ដោយឡែកតារាសម្ដែងស្រីកញ្ញាបូរមី បានចេញសារភ្ជាប់ជាមួយរូបថតលោកមង្គោលថា”ភាសានយោបាយអស់អាណត្តិ ភាសារធ័មអស់កម្ម”។ចំណែកតារាកំពូលទើសលោកម៉ៃ សុគន្ធ បានបង្ហោះនិងកាត់តរូបលោកបែបខូចចិត្តផឹកស្រាជាមួយលោកសេង មង្គល ក្រោយដឹងដំណឹងលោកស្រីទ្រី ដាណា ភ្ជាប់ពាក្យជាមួយលោករជ្ជសាល ។
ទោះជាយ៉ាងណាលោកសេង មង្គល មិនទាន់មានប្រតិកម្មទាក់ទងរឿងគេឌឺដងឲ្យលោកថាកំពុងតែតុកស៊ិកព្រោះលោកស្រីទ្រី ដាណា ភ្ជាប់ពាក្យបុរសថ្មីចោលលោកនោះទេ ខណៈដែលតារាធ្វើជាBA ឲ្យផលិតផលថៅកែពេជ្រ រូបនេះដូចលោកមង្គល ដែរមានដូចជាឱក សុគន្ធកញ្ញា ,ពេជ្រ សោភា ,សួស វីសា និងលោកឆឹម សក្កដា ជាដើមបានសាទរចំពោះថ្ងៃពិសេសរបស់សេដ្ឋីនីរូបនេះរៀងៗខ្លួន ។
គូរំលឹកថាអំឡុងពេលដែលលោកសេង មង្គល ស្និតស្នេហ៍លោកស្រីទ្រី ដាណា នោះស្រីស្អាតហ៊ិន ច័ន្ទនីរ័ត្ន ដែលពេលនោះមិនទាន់មានគូដណ្ដឹងហើយត្រូវបានគេសង្ស័យថានាងមានទំនាក់ទំនងលើសធម្មតាជាមួយប្រុសរូបសង្ហារនេះចេញសារថានៅពេលដែលនាងឃើញលោកមង្គល ចេញវីដេអូថតMV កៀកកើយជាមួយដៃគូថ្មីនេះនាងចង់តែទៅលោតទឹកសម្លាប់ខ្លួនលើស្ពានជ្រោយចង្វាទៀតផង ដែលការនិយាយបែបលេង បន្លំមែន នេះត្រូវបានគេសន្និដ្ឋានថានោះមកពីនាងហួសចិត្តខ្លាំងពេក។ចំណែកលោកមង្គល វិញមុនលោកស្រីទ្រី ដាណា ភ្ជាប់ពាក្យ៣ថ្ងៃគេឃើញលោកក៍បានជួបថៅកែពេជ្រ រូបនេះក្នុងកម្មវិធីប្រគល់រង្វាន់រួមគ្នាដែរ តែមិនស្និតគ្នាដូចមុនឡើយ ហើយរំលងបាន២ថ្ងៃលោកក៍ចេញទៅដើរដើរលំហែនៅឡាវ និងថៃ តែម្ដង គឺហាក់ដូចជាលោកកំពុងតែមានវិបត្តិអ្វីមួយ ។យ៉ាងណាតាមរយៈរូបរាងសង្ហារសាច់ដុំធំៗលោកមង្គល ច្បាស់ជាមិនខ្វះមេម៉ាយទ្រព្យស្ដុកផ្សេងទៀតចង់បានលោកមកធ្វើជាស្វាមីនោះទេ ប៉ុន្ដែបញ្ហាត្រង់ថាតើលើកក្រោយនេះលោកនឹងជ្រើសរើសក្រមុំ ឬមេម៉ាយ ព្រោះថាពេលនេះនារី២នាក់ដែលគេសង្ស័យថាមានស្នេហាជាមួយលោកគឺលោកស្រីទី្រ ដាណា និងហ៊ិន ច័ន្ទនីរ័ត្ន នោះសុទ្ធតែមានគូដណ្ដឹងរៀងៗខ្លួនអស់ទៅហើយដែលម្ចាស់បេះដូងរបស់ពួកគេមិនមែនជាលោកមង្គល នោះទេ ។
សូមបញ្ជាក់ថាលោកហូ ប៉ូសេង ហៅសេង មង្គល បានវិវត្តន៍ខ្លួនពីតារាបង្ហាញម៉ូដទៅជាតារាសម្ដែងម្នាក់ដ៍លេចធ្លោនៅតាមរឿងភាគជាច្រើនក្នុងតំណែងជាតួឯកហើយលោកអាចសម្ដែងជាមួយតារាស្រីគ្រប់គ្នាដោយមិនប្រកាន់ដៃគូ។ប៉ុន្ដែប៉ុន្មានឆ្នាំចុងក្រោយនេះលោកមង្គល ត្រូវបានគេចោទថាលោកបានផ្ដាច់ពីទំនាក់ទំនងស្និតស្នាលជាមួយស្រីស្អាតហ៊ិន ច័ន្ទនីរ័ត្ន ព្រោះតែចង់ក្លាយទៅជាអ្នកមានលឿន ទើបងាកទៅស្អិតល្មូតជាមួយអ្នកមេម៉ាយទ្រព្យស្ដុក តែដឹងអីលទ្ធផលចុងក្រោយបុរសសង្ហារ”ត្រីរ៉ស់ក៍រួច ទន្សាយក៍រួច “ ៕
