ភ្នំពេញ៖នៅឆ្នាំ២០២៣ នេះតារាចម្រៀងលោកប៉ុន សុណារិន ហៅខេម មិនសូវមានបទខ្លាំងៗវាយលុកទីផ្សារឡើយ តែលោកនៅតែស្ថិតក្នុងចំណោមតារាប្រុសលំដាប់ជូរមុខរបស់Galaxy តទៅទៀត ព្រោះថាផលិតកម្មជើងថ្មី តែហ៊ានចាយលុយធំ នេះក៍គ្មានដំណឹងថាពួកគេគ្រោងទិញតារាប្រុសជើងខ្លាំងលើសខេម មកទៀតដែរ ក្រោយទទួលបានព្រាប សុវត្ថិ និងខេមរៈ សិរីមន្ដ មករួមទ្រនុំតែមួយ។យ៉ាងណាទស្សនិកជនភាគច្រើននៅតែយល់ថាការមកដល់របស់ឧកញ៉ាព្រាប សុវត្ថិ និងខេមរៈ សិរីមន្ដ ហាក់ធ្វើឲ្យខេម ធ្លាក់មកឈនៅលំដាប់លេខ៣ជាលើកដំបូងក្នុងអាជីព ព្រោះទាំងលោកសុវត្ថិ និងសេរីមន្ដ មានប្រៀងជាងលោកសុណារិន ទើបធ្វើឲ្យទីផ្សារអតីតតារាថោនរូបនេះលែងសូវលេចធ្លោរដូចមុនទៀត ។
អ្នកជំនាញធ្វើភ្លេង(Composer) ល្បីឈ្មោះម្នាក់ដែលនិយាយដោយសុំមិនឲ្យដាក់ឈ្មោះបានលើកឡើងថាខេម អាចនៅGalaxy តទៅទៀតបាន ព្រោះព្រាប សុវត្ថិ និងខេមរៈ សិរីមន្ដ នៅពីលើខ្លួននោះលោកអាចទទួលយកបាន ឬគ្មានការអាកអន់ចិត្តធំដុំទេ ដោយសារតែតារាGalaxy គឺគេរៀបចំតារាដូចទុកអមអ្នកនយោបាយ។លោកថាបើសិនជាGalaxy ទិញយកឆាយ វីរៈយុទ្ធ មួយទៀតចូលហើយខេម ធ្លាក់ទៅលេខ៤ នោះទើបពិបាកស្មាន ប៉ុន្ដែបច្ចុប្បន្នលោកសង្កេតឃើញថាខេម គោរពរៀមច្បងព្រាប សុវត្ថិ និងខេមរៈ សិរីមន្ដ ពោលគឺចាត់ទុកថាអ្នកទាំងពីរល្បីឈ្មោះជាង ឬល្បីមុន ហេតុនេះគ្មានបញ្ហាចោទទេ។
ថ្វីត្បិតែមានការលើកឡើងបែបនេះក្ដី ប៉ុន្ដែអ្នកចម្រៀងម្នាក់នៅថោន បានបង្ហើបប្រាប់ថាលោកបានស្គាល់ខេម ច្បាស់ពោលគឺលោកសុណារិន មិនចង់នៅក្រោម ឬធ្វើជាតួរងគេនោះទេ។តែលោកថាសព្វថ្ងៃអាចនិយាយបានថាខេម និងព្រាប សុវត្ថិ រួមទាំងខេមរៈ សិរីមន្ដ ម្យាងៗម្នាក់តែបើថាមានតួឯក មានតួរងនោះធ្វើឲ្យពួកគេពិបាកប្រឈមឬមិនដឹងថានៅជាមួយគ្នាបានយូឬយ៉ាងណាឡើយ។
ខេម ធ្លាប់ធ្វើជាតួឯកនៅថោន អំឡុងពេលដែលរូបគេបានសាងកេរ្ដិ៍ឈ្មោះល្បីល្បាញនៅទីនោះ ហើយលោកធ្លាប់និយាយថាមិនរត់នៅចោលថោន ឡើយលើកលែងតែថៅកែដេញចេញ ។ប៉ន្ដែពេលខេម ដើរចេញពីថោន បែជាមានភាពចម្រូងចម្រាសជាមួយថៅកែ ហើយតារាថោនភាគច្រើននៅថោន មិនពេញចិត្តលោកទេ ។ដោយឡែកការជ្រកនៅGalaxy ជិត៤ឆ្នាំនេះលោកខេម លេចធ្លោខ្លាំងតែមុនពេលព្រាប សុវត្ថិ និងខេមរៈ សិរីមន្ដ មកដល់គឺចាប់ពីចុងឆ្នាំ២០២០ លោកមិនសូវរៈត្រដែតទៀតទេ។ប៉ុន្ដែលោកសុណារិន ធ្លាប់បានប្រាប់អ្នកយកព័តមានយើងថាលោកមិនដែលចាត់ទុកលោកព្រាប សុវត្ថិ ជាឆ្អឹងទទឹងករបស់លោកឡើយ ពោលគឺតារាGalaxy ស្រលាញ់គ្នាណាស់ អត់មានកាច់កុងគ្នា។ចំណែកអ្នកនិពន្ធល្បីឈ្មោះម្នាក់នៅហង្សមាសបាននិយាយថាទោះជាGalaxy ទិញតារាណាចូលក៍មិនប៉ៈពាល់ដល់ខេម ខ្លាំងដែរ ព្រោះលោកច្រៀងស្ទីលស្អក តែពិរោះដែលតារាផ្សេងមិនអាចធ្វើបានដូច។
ខេម បានផ្លាស់ប្ដូរជីវភាពដូចមេឃនិងដីបើប្រៀបធៀបពីមុននិងបច្ចុប្បន្នតាមរយៈសិល្បៈ ហើយសព្វថ្ងៃលោករស់នៅផ្ទះវីឡារប្រណិត និងជិះរថយន្ដទំនើបៗមិនចាញ់តារាល្បីៗផ្សេងទៀតទេ។តារាដែលកាន់គ្រីស្ទាន រូបនេះបានសាងស្នេហ៍ជាមួយនារីអាណិកជនខ្មែរបារាំង នាងស្រីកា ជាច្រើនជាង៨ឆ្នាំមកហើយតែនៅមិនទាន់គ្រោងដឹកដៃគ្នាចូលរោងការនោះទេ ខណៈដែលបច្ចុប្បន្នភរិយាលោកកំពុងរស់នៅខ្មែរ។ជាទូទៅក្នុង១ឆ្នាំខេម ត្រូវដឹកដៃប្រពន្ធទៅសាសងស្នេហ៍នៅអ៊ឺរ៉ុបម្ដងនៅរដូវធ្លាក់ភ្លៀងដែលស្បើយពីការច្រៀងសម្ដែងក្នុងស្រុកដើម្បីរឹតចំណងស្នេហាឲ្យកាន់តែរឹងមាំ ។លោកតែងតែនិយាយប្រាប់អ្នកសារព័តមានដដែលៗថាមិនយូទេ នឹងដឹកដៃភរិយារៀបអាពាហ៍ ពិពាហ៍ ប៉ុន្ដែនៅពេលសួរពីពេលវេលាច្បាស់លាស់បែជាលោកថាមិនទាន់កំណត់ទៅវិញ។តែលោកថាចិត្តលោកគ្មានបំណងចង់ទៅរស់នៅបារាំងតាមគ្រួសារនោះទេគឺអាចចេញចូលៗបាន ព្រោះរវល់ការងារច្រើននៅខ្មែរ។
ក្រៅពីខេម តារាដែលសាងស្នេហ៍ជាមួយនារីអាណិកជនមានដូចជាលោកសុភា ដេវីត,ខៀវ សំភេទ ,ស៊ុក សុភា ,ហង្ស ឈា ,សុវណ្ណ មុន្នី ,យស បូវណ្ណៈ និងនៅ ស៊ីនឿន ជាដើម ៕