ខេត្តកំពង់ចាម ៖ លំនៅឋានរបស់ប្រជាពលរដ្ឋ មួយខ្នង ត្រូវបានអគ្គិភ័យលេបត្របាក់យ៉ាងសន្ធោសន្ធៅ ហើយ ភ្លាមៗនោះ បុរសជាម្ចាស់ផ្ទះ បានស្ទុះរត់ចូលទៅបីកូនតូចៗ ២នាក់ គេចចេញពីភ្នក់ភ្លើង បានទាន់ ពេលវេលា រួចស្ទុះចូលទៅអូសម៉ូតូ បាន១គ្រឿង ចេញមកក្រៅ ក៏ត្រូវរងើកភ្លើងធ្លាក់ចំខ្នង បណ្តាលឱ្យរងរបួស។ ចំណែក ផ្ទះទាំងមូល ត្រូវបានក្លាយជាចំណីភ្លើងអស់គ្មានសល់។
ករណីអគ្គិភ័យនេះ បានកើតឡើង កាលពីវេលាម៉ោង ១១និង៣០នាទីព្រឹក ថ្ងៃទី២៦ វិច្ឆិកា ឆ្នាំ២០២៣ នៅចំណុច ភូមិប្រសំ ឃុំរអាង ស្រុកកំពង់សៀម។
ផ្ទះដែលរងការឆាបឆេះ ជាប្រភេទផ្ទះឈើប្រក់ក្បឿង មានទំហំទទឹង៦ម៉ែត្រ គុណនឹង ១០ម៉ែត្រ ជាកម្មសិទ្ធិរបស់ ឈ្មោះឆាន លឹមហេន អាយុ៣៧ឆ្នាំ ភេទប្រុស មានប្រពន្ធឈ្មោះហាស ឡូត អាយុ៤២ឆ្នាំ មានលំនៅភូមិប្រសំ ឃុំរអាង ស្រុកកំពង់សៀម។
លោកម៉ន រ៉េត មេឃុំរអាង បានឱ្យដឹងថា ពេលដែលភ្លើងឆាបឆេះដំបូង ត្រូវបានលោកមេភូមិប្រសំ រាយការណ៍ មកលោក។ ក្រោយពីទទួលព័ត៌មាននេះ លោកបានប្រញាប់ចុះមកដល់ផ្ទះកើតខេត្ត ពេលនោះឃើញភ្លើងបាន ឆាបឆេះយ៉ាងពេញបន្ទុកទៅហើយ។ បន្ទាប់មកក៏មានរថយន្តពន្លត់អគ្គិភ័យ របស់អធិការដ្ឋាននគរបាលស្រុក កំពង់សៀម ១គ្រឿង ចុះមកបាញ់ទឹកពន្លត់ និងរថយន្ត ២គ្រឿងទៀត របស់ស្នងការដ្ឋាននគរបាលខេត្ត បានចុះ មកបន្តបន្ទាប់។
លោកមេឃុំរអាង ឱ្យដឹងបន្តថា បុរសជាម្ចាស់ផ្ទះ នៅពេលដែលភ្លើងកំពុងតែឆាបឆេះនោះ បានរត់ចូលទៅ ក្នុងផ្ទះ ឱបបីកូនតូចៗ ចំនួន២នាក់ ពីក្នុងបន្ទប់ក្រោមផ្ទះ យកមកដាក់នៅខាងក្រៅផ្ទះ បានទាន់ពេល។ បន្ទាប់មកបុរសម្ចាស់ផ្ទះ បានស្ទុះចូលទៅអូសម៉ូតូចេញមកក្រៅ ប៉ុន្តែចៃដន្យត្រូវភ្លើងធ្លាក់លើ បណ្តាលឱ្យ រលាកខ្នង។
នៅក្នុងហេតុការណ៍នេះ កម្លាំងសមត្ថកិច្ចពន្លត់អគ្គិភ័យ បានប្រើប្រាស់រថយន្ត ចំនួន៣គ្រឿងបាញ់ទឹកពន្លត់ ដើម្បីទប់ស្កាត់មិនឱ្យឆេះរាលដាលទៅដល់ផ្ទះអ្នកភូមិនៅក្បែរខាង។
តាមប្រភពសមត្ថកិច្ច បានឱ្យដឹងថា គ្រោះអគ្គិភ័យខាងលើ បានបណ្តាលឱ្យបាត់បង់និងខូចខាតសម្ភារៈ រួមមាន ផ្ទះ ១ខ្នងទាំងស្រុង ប្រាក់ ២០០ដុល្លារ មាស ៥ជី និងសម្ភារៈ ឯកសារមួយចំនួន។ ជាមួយនេះ ក៏បណ្តាលឱ្យម្ចាស់ផ្ទះ រងរបួសរលាកខ្នង កម្រិតស្រាលផងដែរ។
សមត្ថកិច្ច បានបន្តថា អគ្គិភ័យនេះ មិនបណ្តាលឱ្យឆេះរាលដាលដល់ផ្ទះប្រជាពលរដ្ឋក្បែរនោះឡើយ ហើយ ចំពោះមូលហេតុ គឺបណ្តាមកពីឆ្លងចរន្តអគ្គិសនី។
ក្រោយពីទទួលព័ត៌មានពីករណីអគ្គិភ័យភ្លាមនោះ លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្តកំ ពង់ចាម បញ្ជាដោយផ្ទាល់ និងចង្អុលបង្ហាញដល់លោកវរសរនីយ៍ឯក យ៉ន ឌីន នាយការិយាល័យអគ្គិភ័យ និងលោកវរសេនីយ៍ឯក ឯក ប៉ាន់ដន អធិការនគរបាលស្រុកកំពង់សៀម បានដឹកនាំកម្លាំងជំនាញ និងកម្លាំង អន្តរាគមន៍របស់ស្នងការនគរបាលខេត្តកំពង់ចាម និងស្រុកកំពង់សៀម សហការជាមួយកម្លាំងប៉ុស្តិ៍ នគរបាល រដ្ឋបាលរអាង ចុះធ្វើការអន្តរាគមន៍ផ្ទាល់ និងបានពន្លត់អគ្គិភ័យឱ្យរលត់ជាស្ថាពរ ដោយប្រើប្រាស់រថយន្ត ពន្លត់អគ្គិភ័យ របស់ស្នងការដ្ឋាននគរបាលខេត្តកំពង់ចាម ចំនួន២គ្រឿង និងឡានរបស់អធិការដ្ឋាននគរបាល ស្រុកកំពង់សៀម ចំនួន១គ្រឿង ចំនួនសរុប ៣គ្រឿង ដោយប្រើប្រាស់ទឹកអស់ ៣រថយន្ត៕