ភ្នំពេញ៖សួស វីសា ត្រូវបានថៅកែហង្សមាសរុញឲ្យទៅជំនួសកៅអីរបស់តារាចម្រៀងនីកូ ក្នុងតួនាទីជាគណៈកម្មាការ(Judge) កម្មវិធីBeat The Best រដូវកាលទី២ ដ៍គូរឲ្យភ្ញាក់ផ្អើល ខណៈដែលគណៈកម្មាការ៣រូបផ្សេងទៀតគឺពេជ្រ សោភា ,ផន ស្រីខួច និងលោកឆន សុវណ្ណារាជ នៅរក្សារដដែល ។ការឡើងទៅអង្គុយកៅអីថ្មីរបស់វីសា នាពេលនេះក្រោយពេលដែលនាងបាត់បង់តំណែងជាគ្រូបង្វឹគ(Coach) កម្មវិធីThe Voice Cambodia រដូវកាលទី៣ ជំនួសដោយសុគន្ធ និសា ទើបឥឡូវនេះថៅកែបានលួងចិត្តនាងឡើងវិញតាមរយៈការឲ្យរ៉ាបងរងតំណែងលោកនីកូ ដែលគេរំពឹងថាការងារថ្មីនេះនាងអាចស្ដារមុខមាត់ឡើងវិញបានខ្លះជាមិនខាន។ដោយឡែកសម្រាប់មហាជនហាក់ពេញចិត្តចំពោះវីសា ដែលមានបទពិសោធន៍ច្រៀងជាង១០ឆ្នាំ និងមានសម្ថភាពខ្លាំងម្នាក់នៅហង្សមាសក្នុងការឡើងទៅធ្វើជាគណៈកម្មាការការប្រលងចម្រៀងលំដាប់អន្ដរជាតិមួយនេះដែលខុសពីនីកូ មានបទពិសោធន៍នៅខ្ចីហើយក៍មិនទាន់ឡើងដល់ចំណុចកំពូលមិនទាន់សាកសមក្នុងតួនាទីនេះឡើយ ព្រោះតែមានការលើកឡើងពីទស្សនិកជនអំឡុងកម្មវិធីBeat The Best រដូវកាលទី១ចាប់ផ្ដើមនោះថាបើសិនជានីកូ ធ្វើជាគណៈកម្មាការ ឬគ្រូង្វឹគកម្មវិធីប្រលងចម្រៀងធំៗបែបនេះបាននោះតារាចម្រៀងប្រុសស្រីទាំងឡាយរបស់ហង្សមាសម្នាក់ណាក៍អាចកាន់តួនាទីនេះបានដែរ ព្រោះថាបេក្ខភាពដែលចូលរួមប្រកួតភាគច្រើនមានសម្ថភាពលើសពីនីកូ ។
តាមព័តមានថាមូលហេតុដែលសួស វីសា លែងត្រូវបានថៅកែមើលរំលងទៀតនោះដោយសារតែហង្សមាសមិនចង់បាត់បង់តារាចម្រៀងសំខាន់របស់ខ្លួនធ្លាក់ទៅកណ្ដាប់ដៃផលិតកម្មផ្សេងទៀតទេ ក្រោយពីថ្លោះធ្លោយបណ្ដោយឲ្យតារាប្រុសដល់ទៅ៣ដួងចាកចេញព្រមគ្នានោះគឺលោកព្រាប សុវត្ថិ ,ខេមរៈ សិរីមន្ដ និងដួង វីរៈសិទ្ធ ទើបឥឡូវធ្វើឲ្យផលិតកម្មនេះលែងសូវខ្លាំងដូចមុន។យ៉ាងណាចំពោះសួស វីសា វិញការវិលវិញពេលនេះគឺស្របពេលដែលនាងមានសុខភាពអំណោយផលឡើងវិញក្រោយបានធូស្រាលពីជំងឺរលាកបំពង់កធ្ងន់ធ្ងរទៅព្យាបាលដល់ពេទ្យថៃ ហើយចេញច្រៀងសម្ដែងពេញទំហ៊ឹងវិញកាលពីចុងឆ្នាំ២០២២ ហេតុនេះការទទួលបានតំណែងថ្មីនេះពិតជាសំខាន់សម្រាប់តារាកូន១ ព្រោះធ្វើឲ្យនាងមានសកម្មភាពសិល្បៈច្រើនឡើងវិញនិងជាពិសេសបង្ហាញថាហង្សមាសនៅតែចង់លើកស្ទួយនាងជាតារាសំខាន់របស់ខ្លួន មិនចង់ឲ្យនាងធ្លាក់ទៅផលិតកម្មផ្សេងឡើយ បើទោះជាពេលនេះវីសា ក្រោយមានស្វាមីនិងកូន១ ទីផ្សារចម្រៀងលែងសូវស្ទុះដូចមុនក្ដី ។
គូរបញ្ជាក់ថាអតីតតារាRock សួស វីសា ត្រូវបានអ្នកជំនាញសិល្បៈលើកឡើងថានាងមានសម្ថភាពមិនចាញ់ឱក សុគន្ធកញ្ញា ឡើយ ប៉ុន្ដែវីសា បែជាមិនអាចសម្រេចបំណងធំចង់ធ្វើជាតារាជើងខ្លាំងលំដាប់ទី២នៅហង្សមាសបន្ទាប់ពីសុគន្ធកញ្ញា បានទេ ព្រោះតែពេជ្រ សោភា នៅបន្ដរក្សារតំណែងរបស់ខ្លួន ខណៈដែលសុគន្ធ និសា បានផ្អាកពីការសម្ដែងភាពយន្ដមកពង្រឹងចម្រៀងឡើងវិញ ដែលនាំឲ្យវីសា ហាក់នៅទ្រឹង។មិនត្រឹមតែខកចិត្តរឿងពិបាកប្រជែងចម្រៀងនៅទ្រនុំធំដែលប្រជុំទៅដោយតារាល្បីៗនោះទេ តែវីសា នៅមិនទាន់សម្រេចបានបំណងសំខាន់មួយទៀតនោះគឺការទិញរថយន្ដក្នុងក្ដីស្រម៉ៃម៉ាកRolls Royce បន្ទាប់ពីនាងទិញបានឡានម៉ាកLexus Lx570 ,Bmw, Lexus Nx2oot និងMazda ជាដើម។ប្រភពបានឲ្យដឹងថាក្រៅពីរីករាយចំពោះការបានតំណែងធំត្រឡប់មកវិញនេះវីសា កំពុងសម្ងំរៀនជំនាញផ្នែកគ្រប់គ្រងសហគ្រិនដើម្បីពង្រឹងអាជីវកម្មរបស់នាងបន្ថែមខាងក្រៅសិល្បៈផងដែរ។ដោយឡែកសម្រាប់តារារួមអាជីពភាគច្រើនបានហៅវីសា ថាជំទាវៗ បន្ទាប់ពីមុននេះស្វាមីនាងលោកប៊ុនថុល ប៊ុនថង ហៅថមមី ត្រូវបានពិធីករលោកប៉ែន ចំរ៉ុង ប្រកាសជាសាធារណៈក្នុងកម្មវិធីដ៍ធំមួយថាលោកជា”ឧកញ៉ា” នោះមក។
សូមរំលឹកថាសួស វីសា បានរៀបការជាមួយលោកថមមី កាលពីចុងខែកញ្ញា ឆ្នាំ២០១៩ ហើយពេលនេះនាងមានកូនស្រី១អាយុជាង៣ឆ្នាំ ។មិនមានដំណឹងវីសា ត្រៀមពពោះយកកូនទី២ឡើយ អំឡុងពេលដែលនាងកំពុងចាប់ផ្ដើមពង្រឹងទីផ្សារចម្រៀងនិងតួនាទីជាគណៈកម្មាការជាលើកទី២ នេះ។យ៉ាងណាវីសា តែងតែចាត់ទុកថានាងជានារីមានសំណាងព្រោះមានស្វាមីថ្នមនាងដូចព្រះនាង ហើយមុននេះនាងមានលេងស្ទីលមាស សុខសោភា នោះគឺសរសើរប្ដីពេញៗមាត់ថាមើលពីត្រង់ណាក៍ស្អាតសង្ហារដែរ ប៉ុន្ដែនាងមិនទាន់ផលិតជាMV លើកពីគុណសម្បត្តិប្ដីដូចសោភា ឡើយ ៕
