ភ្នំពេញ៖ដាញ់ ម៉ូនីកា បានសម្ពោធហាង Cosmetic ផ្ទាល់ខ្លួននៅខ្មែរកាលពីថ្ងៃទី២០ ខែមករា ឆ្នាំ២០២៤ នៅភូមិទួលពង្រ សង្កាត់ចោមចៅ ខណ្ឌដង្កោ រាជធានីភ្នំពេញ ។តាមព័តមានថាការទិញផ្ទះជាប់ផ្លូវធំនោះបានដេគ័ររៀបចំហាងឡើងម៉ូនីកា បានចំណាយលុយដល់ទៅខ្ទង់៣០ម៉ឺនដុល្លារ ទើបនាងឈានទៅបើកក្រុមហ៊ុនម៉ូនីកា អេច ខសមេធីក ឯ.ក ដែលនាំចូលផលិតផលផ្នែករក្សារសម្រស់ពីកូរ៉េ មកលក់នៅខ្មែរ។ប៉ុន្ដែម៉ូនីកា មិនប្រាប់ថាការចំណាយសរុបអស់ទឹកប្រាក់ប៉ុន្មានឡើយ ដោយថាទាំងផ្ទះនិងនាំចូលផលិតផលមកលក់នៅខ្មែរពិតជាអស់ទឹកប្រាក់ចំនួនច្រើនមែន។អតីតតារាសម្ដែងរូបនេះថាក្រោយមានហាងផ្ទាល់ខ្លួននៅភ្នំពេញនេះនាងនឹងចុះមកខ្មែរញឹកញាប់ជាងមុន ហើយក៍សង្ឃឹមថានាពេលខាងមុខអាចនឹងឆ្លៀតថតភាពយន្ដឡើងវិញផងដែរ ប្រសិនបើមានឱកាស ។
ឆ្លើយតបសំណួរថាតើម៉ូនីកា គ្រោងមករស់នៅខ្មែរវិញនាពេលខាងមុខឬយ៉ាងណាបានជាចំណាយលុយធំរកស៊ីផ្នែកCosmetic នៅភ្នំពេញនេះនាងថានៅតែទៅរស់នៅអូស្រ្ដាលីដូចមុន ហើយចុះឡើងៗមកខ្មែរ តែពេលមានមុខរបរនេះអាចនឹងមកស្រុកច្រើនលើកជាងមុន។នាងថាបានរកស៊ីលក់ផលិតតាមOnline រយៈពេលជាង៦ឆ្នាំមកហើយទើបឈានមកបើកហាងនាពេលនេះបានសម្រេចដូចបំណង។ប៉ុន្ដែនៅថ្ងៃសម្ពោធហាងនោះម៉ូនីកា បែជាថានាងបានហៅមិត្តភក្ដិអ្នកសិល្បៈស្និតស្នាលតែ៤ទៅ៥នាក់ប៉ុណ្ណុះចូលរួម ដោយសារតែមិនហ៊ានហៅច្រើន ខ្លាចរំខានដល់គេ ហើយក្នុងនោះនាងថាបានស្រលាញ់រាប់អានគ្នាជាមួយកែវ ពេជ្រពិសី ជាច្រើនឆ្នាំមកហើយដោយចាត់ទុកដូចជាបងស្រីបង្កើតរបស់នាងតែម្ដង ។
ដាញ់ ម៉ូនីកា និងស្វាមីរួមទាំងកូនទាំងពីរ(ស្រី១)បានមកដល់ខ្មែររយៈពេលជាង២សប្ដាហ៍ហើយ និងមានគម្រោងវិលទៅអូស្រា្ដលីវិញនៅពាក់កណ្ដាលខែកុម្ភៈ ហើយនាងថាLive លក់ផលិតផលតាមហ្វេសបុកជាធម្មតាដូចមុន ខណៈដែលបុគ្គលិករបស់នាងប្រចាំការនៅហាងបើកលក់នៅខ្មែរធម្មតា ។ម៉ូនីកា ថារយៈពេលជាង១០ឆ្នាំនៅលើទឹកដីអូស្រា្ដលីនេះនាងបានជួបសិល្បករខ្មែរនៅពេលដែលពួកគាត់ទៅសម្ដែងនៅទីនោះ តែសម្រាប់រូបនាងផ្ទាល់មិនដែលបានចេញច្រៀងសម្ដែងនៅអូស្រា្ដលីនោះទេ គឺតាំងពីមានសា្វមីមកម្លេះ ព្រោះគ្មានពេលវេលាគ្រប់គ្រាន់។
ឆ្លើយតបសំណួរថាតើម៉ូនីកា មានគម្រោងយកកូនទី៣ឬអត់អំឡុងមានពេលនៅខ្មែរកាន់តែច្រើននោះនាងថាអត់មានផែនការណ៍យកកូនថែមឆាប់ៗឡើយ។ម៉ូនីកា ថាឆ្នាំនេះកូនស្រីរបស់នាងមានអាយុ១៣ឆ្នាំ ខណៈកូនប្រុសអាយុ៨ឆ្នាំ ហើយនាងយល់ថាមានកូន២គ្រប់គ្រាន់។នាងបន្ថែមថានៅពេលដែលនាងមានពេលនៅខ្មែរច្រើនជាងមុននេះក៍អាចនឹងទទួលថតរឿងថ្មីណាមួយនាពេលខាងមុខនេះ ប៉ុន្ដែរឿងនេះគ្រាន់តែជាការគិតប៉ុណ្ណោះ អត់ទាន់បានយល់ព្រមជាមួយផលិតករណាម្នាក់ទេ ។ម៉ូនីកា ថាទោះជានាងបានចាកចេញពីអាជីពសិល្បៈជាច្រើនឆ្នាំមែន ប៉ុន្ដែនាងបានតាមដានសកម្មភាពរបស់អ្នកសិល្បៈខ្មែរជាប្រចាំ ហើយឃើញប្អូនៗសម័យក្រោយនេះមានសម្ថភាពល្អរៀងៗខ្លួន និងសម្រស់ស្អាតមិនធម្មតាឡើយ។
គូររំលឹកថាដាញ់ ម៉ូនីកា បានចេញទៅរស់នៅប្រទេសអូស្រា្ដលីតាមស្វាមីនាងលោកប៊ុន ថែល រយៈពេល១៣ឆ្នាំមកហើយ ក្រោយពួកគេបានរៀបការកាលពីខែកុម្ភៈ ឆ្នាំ២០១០ ហើយទទួលបានចំណងដៃកូន២នាក់(ស្រី១) ។ម៉ូនីកា ស្ថិតក្នុងចំណោមតារាដែលយកស្វាមីជាបុរសអាណិកជនខ្មែរអូស្រា្ដលីមានដូចជាអ្នកនាងអឿន ដាលីស ,សុខ ច័ន្ទណានូ និងគឹម លីហ្សា ជាដើម ។
ទាក់ទងការសម្ពោធហាងរបស់ដាញ់ ម៉ូនីកា តែមិនហ៊ានហៅភ្ញៀវច្រើននេះដែរ កែវ ពេជ្រពិសី បានឆ្លើយជំនួសម៉ូនីកា ថានៅពេលមានកម្មវិធីរបស់នីកា លើកក្រោយៗទៀតនាងច្បាស់ជាហៅភ្ញៀវច្រើនជាងនេះជាមិនខាន ព្រោះថាពេលនេះគាត់មានមុខរបរនៅស្រុកខ្មែរហើយ ។ ដាញ់ ម៉ូនីកា សង្ឃឹមថាមុខជំនួញថ្មីរបស់នាងនឹងទទួលបានការគាំទ្រទាំងអតិថិជនក្នុងនិងក្រៅសិល្បៈជាមិនខាន ហើយនាងជាBA ផ្ទាល់របស់ក្រុមហ៊ុនខ្លួនឯងតែម្ដង ៕
