ភ្នំពេញ៖កែវ ពេជ្រពិសី មានកូនប្រុស១ឈ្មោះDura Peou អាយុជាង២ឆ្នាំហើយ ប៉ុន្ដែមិនទាន់សមតាមបំណងនាងទេ ហើយពេលនេះនាងរៀបគម្រោងយកកូនស្រីថែមម្នាក់ទៀតដើម្បីឲ្យសុភមង្គលក្នុងគ្រួសារកាន់តែមានភាពកក់ក្ដៅ ។ប៉ុន្ដែពេជ្រពិសី ថាបច្ចុប្បន្ននាងមិនទាន់ពពោះកូនទី២ឡើយ។
ក្នុងជំនួបផ្ទាល់កាលពីពេលថ្មីៗនេះកែវ ពេជ្រពិសី បានឲ្យដឹងថាស្វាមីនាងមានកូនមុន២នាក់រស់នៅប្រទេសកាណាដាសុទ្ធតែជាកូនប្រុស ហើយពេលនេះគាត់(ប្ដី)ចាប់ដៃនាងមានកូនប្រុសទៀតអីចឹងប្រាកដណាស់នាងថាពិតជាចង់បានកូនស្រីមែនទាំងនាងនិងប្ដីបានគិតរឿងនេះដូចគ្នា ។តែចូលដល់ចុងខែ១ដើមឆ្នាំ២០២៤ នេះនាងមិនទាន់មានផ្ទៃពោះទៀតនោះទេ ហើយទាក់ទងរឿងយកកូនស្រីនេះនាងក៍អាចទៅពិគ្រោះជាមួយគ្រូពេទ្យជំនាញផងដែរដើម្បីឲ្យបានកូនដូចបំណង។
កែវ ពេជ្រពិសី បានភ្ជាប់ពាក្យជាមួយបុរសពោះម៉ាយអាណិកជនខ្មែរមកពីកាណាដាលោកពៅ សម្បត្តិ អាយុជាង៥០ឆ្នាំកាលពីថ្ងៃទី១៧ ខែឧសភា ឆ្នាំ២០២០ និងបានសម្រាលកូនថ្ងៃទី១៤ ខែកញ្ញា ឆ្នាំ២០២១ ។ពេជ្រពិសី រក្សារជំហថានាងមិនមានគម្រោងរៀបការនោះទេ ព្រោះទាំងរូបនាងនិងស្វាមីសុទ្ធតែបានឆ្លងកាត់ជីវិតអាពាហ៍ ពិពាហ៍ ដូចគ្នា ហើយពេលនេះមានកូន១ទៅហើយ បើរៀបការគឺការមុនយកកូន តែពេលមានកូនហើយអីចឹង គឺមានតែចង់បានកូនថែមទៀត។
តាមព័តមានថាកែវ ពេជ្រពិសី អាចនឹងពពោះកូនទី២នៅកាណាដា ព្រោះថានាពេលដ៍ខ្លីខាងមុខនេះនាងចេញទៅរស់នៅលើទឹកដីខាងស្វាមីដើម្បីឲ្យបានសញ្ជាតិកាណាដាទើបចុះឡើងៗមកខ្មែរវិញ ។ប្រភពនោះបានឲ្យដឹងថាស្វាមីរបស់ពេជ្រពិសី ចង់នាំនាងទៅរស់នៅកាណាដា តាំងពីក្រោយពួកគេភ្ជាប់ពាក្យរួចម្លេះ តែពិសី រងចាំដល់កូនប្រុសធំបន្ដិចទើបនាងព្រមទៅ ។
កែវ ពេជ្រពិសី ទទួលស្គាល់ថានាងពិតជាត្រៀមខ្លួនទៅរស់នៅប្រទេសកាណាដាមែន ប៉ុន្ដែមិនមែនពេលនេះទេ ពោលគឺនៅឆ្នាំខាងមុខ។នាងថាទាល់តែកូនប្រុសនាងDura មានអាយុគម្រប់៥ឆ្នាំសិន ទើបអាចចេញទៅរស់នៅកាណាដាបានពោលគឺនៅឆ្នាំ២០២៦ ខាងមុខដើម្បីបានសញ្ជាតិកាណាដា ងាយចេញចូលមកខ្មែរ។ពិសី បន្ថែមថាតាំងពីចាប់ដៃស្វាមីនាងជាង៣ឆ្នាំមកនេះនាងមិនដែលបានចេញទៅដើរលេងនៅកាណាដានោះទេ ប៉ុន្ដែពេលដែលត្រូវចេញទៅគឺទៅរស់នៅតែម្ដង។
ទាក់ទងរឿងអាជីពសិល្បៈវិញកែវ ពេជ្រពិសី ថានាងនៅតែស្រលាញ់អាជីពមួយនេះដោយគ្មានការប្រែប្រួលចិត្តបន្ដិចឡើយ ព្រោះនាងមានថ្ងៃនេះដោយសារតែសិល្បៈ។នាងថាបច្ចុប្បន្នកំពុងព្យាយាមសម្រកទម្ងន់ឲ្យដល់គីឡូមួយដែលសមរម្យសាកសមនិងខ្លួនបានហើយនឹងទទួលការសម្ដែងភាពយន្ដឡើងវិញដូចមុន។ពេជ្រពិសី ដែលមានកូន១បានផ្លាស់ប្ដូរជំហពីធ្លាប់ប្រកែកក្នុងការធ្វើជាតួម្ដាយមុនពេលនាងមានកូននោះថានាងអាចសម្ដែងរឿងបានឲ្យតែតួនាងមានសកម្មភាពក្នុងរឿងមួយនោះច្រើន ពោលគឺមិនមែនចាំតែតួឯកបានថតនោះទេ ។ពេជ្រពិសី បានឲ្យដឹងដែរថាម៉ារយៈមុននេះក៍មានគេហៅនាងថតរឿងវិញដែរ តែដោយសារនាងឡើងគីឡូជ្រុលបន្ដិចអីចឹង មិនទាន់ហ៊ានទទួលថតសម្ដែង គឺរងចាំដល់សម្រកទម្ងន់បានមកវិញសិនទើបចូលថត។ក្រៅពីកែវ ពេជ្រពិសី តារាដែលភ្ជាប់ស្នេហាជាមួយអាណិកជនខ្មែរកាណាដាមានដូចជាអ្នកនាងសៀម ស្រីណុច ,មាស សុខសោភា ,រស់ ម៉ូនីកា និងម៉ុក អានីត ជាដើម ខណៈដែលអ្នកនាងឡាយ លក្ខិណា ទៅដល់កាណាដាពន្យាពេលវិលមកស្រុកវិញជាង៥ឆ្នាំហើយនិងមានដំណឹងថានាងអាចរស់នៅទីនោះជាមួយគូស្នេហាថ្មីជាអចិនត្រេយ៍ទៀតផង ។
ចំពោះកែវ ពេជ្រពិសី វិញនាងធ្លាប់បង្ហើបថាចង់បានកូន៣នាក់ បង្កើតគ្រួសារដ៍សាមញ្ញមួយរស់នៅជុំស្វាមីនិងកូនៗ ហេតុនេះហើយនាងត្រូវតាមយកកូន២នាក់ថែមទៀត មិនមែនបានកូនស្រី១គ្រប់គ្រាន់នោះទេ ៕
