ភ្នំពេញ៖លោកហាវ លីហូវ អាយុ៣០ឆ្នាំជាអតីតបេក្ខភាពប្រលងចម្រៀងCambodian Idol រដូវកាលទី៤ តែបានជ្រុះចេញពីជម្រុះតាំងពីវគ្គTheaters Rounds II នោះពេលនេះបានសម្រេចចិត្តវិលទៅរស់នៅទឹកដីកំណើតខេត្តបាត់ដំបងវិញ បន្ទាប់ពីចប់ការច្រៀងកុងត្រានៅផាប់មួយកន្លែងនៅខេត្តសៀមរាបក្នុងរយៈពេល១ឆ្នាំ ។លោកលីហូវ ថាលោកមិនទាន់រកកន្លែងថ្មីច្រៀងទេ ទើបត្រូវបង្ខំចិត្តវិលទៅស្រុកវិញ ដើម្បីដោះស្រាយរឿងក្នុងគ្រួសារ។លោកថានៅខេត្តក្រុមគ្រួសារលោកក៍គ្មានផ្ទះសម្បែងនៅពិតប្រាកដដែរគឺរស់នៅជាមួយបងជីដូនមួយនិងយាយ ខណៈដែលលោកកំព្រាឪពុកតាំងពីលោកមានអាយុជាង៥ឆ្នាំម្លេះ ។
លោកលីហូវ ថ្លែងថា”ខ្ញុំបានរៀនត្រឹមថ្នាក់ទី៥ទេ ហើយគ្រួសារខ្ញុំពិបាកណាស់គ្មានផ្ទះសម្បែងដូចគេ ទៅនៅជាមួយបងប្អូន ដោយសារតែពិបាកពេកពេលខ្លះខ្ញុំចង់បញ្ចប់ជីវិតម្ដងៗ ព្រោះរស់នៅពិបាកជាងស្លាប់ ។ប៉ុន្ដែមានកូនចិត្តមួយនឹកអាណិតដល់ម្ដាយ ទើបប្រឹងតស៊ូ ហើយឥឡូវជីវិតខ្ញុំនៅតែលំបាក…”។
លោកហាវ លីហូវ មានបងប្អូន៤នាក់(ស្រី២)លោកជាកូនទី២ ដែលមុនចូលប្រលងCambodian Idol រដូវកាលទី៤ នោះលោកធ្លាប់ធ្វើការជាង២ឆ្នាំនៅក្រុមហ៊ុនកំណប់សម្រស់ តែគ្មានប្រាក់ខែ ពោលគឺបានតែអាហារ ហើយក្រោយមកលោកគិតថាខ្លួនស្រលាញ់សិល្បៈ ចង់ក្លាយទៅជាតារាចម្រៀងទេ ម៉េចបានមកធ្វើខាងក្រុមហ៊ុនសម្រស់?ដោយសារតែចង់បំពេញក្ដីស្រម៉ៃខ្លួនឯងទើបលោកងាកមកចាប់អាជីពជាអ្នកចម្រៀងនៅហាងម្ហូបខ្មែរគាប់ចិត្ត ហើយក៍ឈានទៅប្រលងកម្មវិធីCambodian Idol រដូវកាលទី៤ ប៉ុន្ដែបរាជ័យ …ទាំងដែលពេលនោះរូបលោកកំពុងតែមានជីវភាពខ្វះខាតគ្មានលុយទិញខោអាវស្អាត និងខ្ចីលុយគេទិញអាវធំពាក់ឡើងឆាកទៀតផង។
លោកលីហូវ ថាជីវិតជាតារាចម្រៀងអត់ល្បី គឺអត់ទីផ្សារ ហើយបច្ចុប្បន្នជីវិតក្រុមគ្រួសារលោកដីមួយដុំ ផ្ទះខ្ទមមួយក៍គ្មានដែរ ធ្វើការនៅកន្លែងណា ដេកនៅទីនោះ ។លោកថាដោយសារតែក្រុមគ្រួសារកំពុងជួបផលវិបាកទើបពេលនេះលោកមិនអាចបន្ដអាជីពចម្រៀងបានទៀតទេ គឺផ្អាកមួយរយៈសិន ហើយមានការងារណាអាចធ្វើបានលោកត្រូវធ្វើសិន ដើម្បីជួយខ្លួនឯង និងក្រុមគ្រួសារ ។ប៉ុន្ដែលោកមិនបោះបង់ចោលអាជីពចម្រៀងជារៀងរហូតនោះទេ គឺគ្រាន់តែផ្អាកមួយរយៈហើយនឹងវិលវិញនៅពេលដែលខ្លួនអាចក្រោកឈងើបឡើងវិញបាន ។
លោកហាវ លីហូវ បន្ថែមថាលោកអាចច្រៀងបានជាច្រើនទម្រង់ដូចជាស្លូវ ,កន្ទ្រឹម ,រ៉ក និងបទរាំវង់ សារ៉ាវ៉ាន់ជាដើម។លោកថាតារាចម្រៀងជាIdol របស់លោកគឺលោកកែវ វាសនា ដែលពីមុនលោកច្រៀងស្ទើតែដូចលោកវាសនា ដល់ទៅ៩៩% តែក្រោយមកប្រឹងបត់មករកសម្លេងស្ទីលខ្លួនឯងវិញ ។ដោយឡែកតារាក្នុងដួងចិត្តលោកម្នាក់ទៀតគឺលោកព្រាប សុវត្ថិ តែលោកថាសម្លេងលោកច្រៀងបទរៀមច្បងរូបនេះគឺមិនដល់ទេ ហេតុនេះហើយបានជាលោកច្រៀងតែបទលលោកកែវ វាសនា ភាគច្រើនជាងតារាផ្សេង៕
