ភ្នំពេញ៖លោកខែម ប៊ុនថៃ ដែលមួយរយៈនេះហាក់ស្ងប់ស្ងាត់បន្ដិចលែងសូវចេញមុខការពារថៅកែដូចមុននោះបានធ្វើឲ្យមានការវែកញែករឿងអតីតតារាU2 រូបនេះលេងខ្លួនហាក់ដូចជាប្លែកជ្រុលក្នុងការប្រគុំតន្រ្ដីធំមួយកាលពីថ្ងៃទី២៧ ខែមករា នៅកោះពេជ្រ ពិសេសគឺនៅពេលប៉ះឆាកតែមួយជាមួយលោកRain តារាល្បីលំដាប់អន្ដរជាតិរបស់កូរ៉េខាងត្បូងនោះលោកប៊ុនថៃ និងលោកលីយ៉ុងចេ ហៅរ៉េន មានការតុបតែងខ្លួនខុសគ្នាដាច់ស្រឡះ។ការតែងខ្លួនចម្លែកនៅដើមឆ្នាំ២០២៤ នេះលោកសិរីមន្ដ បានប្រើសក់ក្រញ៉ាញ់សំពោងបន្ដិច និងគ្រឿងអលង្ការជាមាសមានខ្សែក ជញ្ជៀនស្ទើគ្រប់ម្រាបដៃទាំងអស់ ខណៈដែលលោកRain វិញស្លៀកពាក់ធម្មតាតាមបែបបុរសកូរ៉េ ហើយគ្មានគ្រឿងមាសពេជ្រជ្រែកខ្លួនដូចលោកថៃ ឡើយ ។អ្វីដែលគូរឲ្យចាប់អារម្មណ៍នោះនៅលើឆាកតន្រ្ដីលោកប៊ុនថៃ បានរាំដោះអាវបង្ហាញសាច់ដុំហាក់ដូចជាចង់ធ្វើឲ្យនារីៗចាប់អារម្មណ៍លើដងខ្លួនរបស់គេ ប៉ុន្ដែនេះមិនមែនជាការដោះអាវលើកទី១នៅលើឆាកតន្រ្ដីឡើយ ពោលគឺអំឡុងពេលច្រៀងនៅហង្សមាសលោកថៃ ក៍ធ្លាប់រាំដោះអាវដែរ។ប្រភពថាការលេងខ្លួនបែបនេះសិរីមន្ដ ហាក់មិនបានបង្ហាញពីអត្ដសញ្ញាណប្រពៃណីជាតិ នៅលើឆាកប៉ះតារាអន្ដរជាតិនោះឡើយ។
យ៉ាងណាទន្ទឹមនិងមានការរិះគន់និងឌឺដងទៅលើលោកខេម ប៊ុនថៃ ថាលេងម៉ូដសក់ និងសម្ញែងគ្រឿងអលង្ការហាក់ជ្រុលដៃបន្ដិចនោះក៍មានFan របស់អតីតតារាសាន់ដេរូបនេះគាំទ្រលោកដែរ និងខ្លះថាលោកនៅតែមានទីផ្សារចម្រៀងខ្លាំង បើទោះជារយាលៗពីការច្រៀងសម្ដែង តាំងពីក្រោយឡើងជាឧកញ៉ាក្ដី ។ការលើកឡើងបែបនេះដោយសារតែរយៈពេលជាង១ឆ្នាំនៅGalaxy លោកប៊ុនថៃ បានល្បី២បទគឺ”រាំទយ “និង”Call Me PaPa “ ដែលធ្វើឲ្យលោកនៅតែស្ថិតក្នុងចំណោមតារាលំដាប់ជូរមុខរបស់ផលិតកម្មជើងថ្មីនេះ។ប៉ុន្ដែមានការលើកឡើងថាថៅកែGalaxy នឹងមិនឲ្យលោកប៊ុនថៃ ឡើងខ្ពស់ជាងលោកព្រាប សុវត្ថិ ឡើយ ព្រោះខ្លាច”ភ្នំ១ ខ្លា២” អាចមានសង្រ្គាមដូចកាលនៅហង្សមាស ហេតុនេះពួកគេអាចនៅត្រដុំត្រសងគ្នា។
ខេមរៈ សិរីមន្ដ អាយុ៣៨ឆ្នាំ បានវិវត្តន៍ខ្លួនពីតារាធ្លាប់ច្រៀងនៅក្លឹបU2 ១យប់តែ៣ដុល្លារ ឬស្មើ១ខែ៩០ដុល្លារ កាលពីឆ្នាំ២០០៤ តែនៅឆ្នាំ២០២៤ នេះរូបគេឡើងថ្លៃច្រៀងកម្មវិធីធំ១ស៊ីថ្លៃដល់ទៅ១ម៉ឺនដុល្លារឯណ្ណោះ ដែលតម្លៃនេះយូៗទើបសិរីមន្ដ ចេញច្រៀងម្ដងបានន័យថាម្ចាស់កម្មវិធីភាគច្រើនគ្មានលទ្ធភាពជួល ឬហៅតារាផ្សេងទៅច្រៀងដែលមានតម្លៃថោកជាងនេះក៍កម្មវិធីនៅតែតំណើរការធម្មតា។ចំណែកការឡើងឆាកតន្រ្ដីនិងលេងខ្លួនកាន់តែប្លែកទាំងម៉ូដសក់ និងពាក់ខ្សែកធំៗនាពេលនេះរបស់លោកថៃ គឺហាក់ផ្ទុយទៅនិងការសំណូមពររបស់លោកស៊ិន សិលា របស់អ្នកដឹកនាំការប្រគុំតន្រ្ដីប៉ុស្ដិ៍CTN ដែលធ្លាប់លើកឡើងថាតារាទាំងឡាយណាដែលឡើងជាឧកញ៉ារួចហើយគូរណាស់តែផ្ដាច់ខ្លួនពីសិល្បៈឲ្យដាច់ស្រឡះទៅ ព្រោះដើម្បីកុំឲ្យច្របូកច្របល់រឿងច្រៀងផងធ្វើឧកញ៉ាផងនាំឲ្យពិបាកឡើងអក្សរលើអេក្រង់ទូរទស្សន៍នោះពេលនេះលោកថៃ មិនត្រឹមតែអត់បន្ធូដៃនោះទេ ប៉ុន្ដែមានតែកាន់តែប្រឹងបុកទីផ្សារថែមទៀត ពិសេសគឺការលេងម៉ូដសក់ និងគ្រឿងអលង្ការនេះតែម្ដង។
គូរបញ្ជាក់ថាខេមរៈ សិរីមន្ដ ធ្លាប់ត្រូវអ្នកលេងបណ្ដាញសង្គមរិះគន់ស្ទួនៗអំឡុងពេលដែលលោកចេញមុខបបួលមហាជនទៅដាំកូនឈើនៅភ្នំតាម់ៅឡើងវិញ បន្ទាប់ពីក្រុមហ៊ុនឧកញ៉ាឡេង ណាវ៉ាត្រា បានកាប់រាបដល់ដីជាង៦០០ហិកតា កាលពីខែសីហា ឆ្នាំ២០២២ ព្រោះអ្នកលេងហ្វេសកបុកលើកឡើងថាអំឡុងពេលដែលពលរដ្ឋសំណូមពរទៅរដ្ឋាភិបាលឲ្យបញ្ឈប់ការបំផ្លាញព្រៃភ្នំតាម៉ៅនោះសិរីមន្ដ មិនដែលចេញសារណាមួយទេ ពោលគឺស្ងាត់ដូចចោរលួចសេះ តែពេលរដ្ឋាភិបាលចេញស.ជ.ណ ឲ្យបញ្ឈប់ការកាប់ព្រៃភ្នំតាម៉ៅ ទើបលេចមុខលោកប៊ុនថៃ ចេញយកមុខ ។អ្វីដែលទស្សនិកជនកាន់តែហួសចិត្តនោះសិរីមន្ដ ថាលោកមិនដែលស្គាល់ឧកញ៉ាណាកាប់បំផ្លាញព្រៃឈើហិនហោចនៅកម្ពុជាទេ ហើយបើមានអ្នកណាស្គាល់សូមបង្ហាញផង ដែលភ្លាមៗនោះអតីតតារាសម្ដែងលោកសុភ័ណ្ឌ ឡារី ដែលកំពុងតែភៀសខ្លួននៅអាមេរិកដើម្បីសុវត្ថិនោះបានឆ្លើយតបភ្លាមៗទៅសិរីមន្ដ ដោយចង្អុលថាឧកញ៉ា៣រូបទៀតដែលជាលោកអះអាងថាជាមេក្លោងបំផ្លាញព្រៃឈើទ្រង់ទ្រាយធំគឺឧកញ៉ាទី្រ ភាព ,ឧកញ៉ាខ្នា និងឧកញ៉ាសេង សំអុល ទើបធ្វើឲ្យសីរមន្ដ តបវិញថាលោកមិនមែនជាអ្នកនយោបាយទេ និងស្ងាត់មាត់រហូតមកដល់ពេលនេះ លែងសូវសកម្មចេញការពារថៅកែដូចមុនទៀត ។
ទាក់ទងការលេងខ្លួនរបស់ខេមរៈ សិរីមន្ដ រឿងម៉ូដសក់ និងគ្រឿងអលង្ការនារយៈពេលចុងក្រោយនេះអ្នកជំនាញសិល្បៈបានលើកឡើងថានេះជាសញ្ញាមួយបញ្ជាក់ថាលោកប៊ុនថៃ ចង់ពង្រឹងទីផ្សារចម្រៀងឡើងវិញ ហើយនៅឆ្នាំ២០២៤ នេះរូបគេត្រូវតែប្លែក។ប្រភពនោះថាសិរីមន្ដ ស្ពឹកមុខបន្ដិចរឿងចេញការពារថៅកែ រហូតមានFan ខ្លះបានប្លុកនិងព្រមានធ្វើពហិកាលែងស្ដាប់ចម្រៀងលោកទៀតផង ហេតុនេះដើម្បីយកបានបេះដូងអ្នកគាំទ្រទាំងនោះមកវិញរូបគេត្រូវតែមានតែមានបទខ្លាំងៗ និងការលេងខ្លួនឲ្យទាក់ទាញជាងមុនទើបអាចទៅរួច ៕
