ភ្នំពេញ ៖ បុរសម្នាក់ជិះម៉ូតូលឿនពេកចាប់ហ្រ្វាំងមិនទាន់ជ្រុលទៅបុករថយន្តកុងតឺន័រដែល កំពុងតែបើកឆ្លងផ្លូវចំពាក់កណ្តាលរថយន្តបណ្តាលឲ្យអ្នកបើកម៉ូតូដួលបោកនឹងរថយន្តរងរបួសធ្ងន់ កាលវេលាម៉ោង៩និង៥០នាទីព្រឹកថ្ងៃទី៨ ខែកុម្ភះ ឆ្នាំ២០១៧ នៅតាមបណ្តោយផ្លូវជាតិលេខ៤ ទល់មុខអគ្គបញ្ជាការកងទ័ពជើកគោគ ភូមិត្រពាំងទួល សង្កាត់កំបូល ខណ្ឌពោធិ៍សែនជ័យ។
រថយន្តបង្កជារថយន្តកុងតឺន័រ ម៉ាកនីសាន់ ឌីសែល ពណ៌លឿងពាក់ស្លាកលេខ ភ្នំពេញ 3C2883បើកឆ្លងផ្លូវក្នុងទិសដៅពីជើងទៅត្បូង។ចំណែកម៉ូតូរងគ្រោះម៉ាក ភូសា ពណ៌សលាយខ្មៅ ពាក់ស្លាកលេខភ្នំពេញ1CH ,7245 បើកបរដោយបុរសម្នាក់ ក្នុងទិសដៅពីកើតទៅលិច។
តាមប្រភពពត៌មានពីកន្លែងកើតហេតុបានអោយដឹងថាមុនពេលកើតហេតុ គេឃើញបុរសរងគ្រោះជិះម៉ូតូធំ ម៉ាកភូសា ពណ៌សលាយខ្មៅបើកបរក្នុងទិសដៅពីកើត ទៅលិច យ៉ាងលឿន លុះបើកមកដល់ចំណុចកើតហេតុ ស្រាប់តែមានរថយន្តកុងតឺន័រ មួយគ្រឿង បើកឆ្លងផ្លូវក្នុងទិសដៅពីជើងទៅត្បូង បន្ទាប់មកម៉ូតូរងគ្រោះខាងលើជាន់ ហ្រ្វាំងមិនទាន់បានជ្រុលទៅបុករថយន្តកុងតឺន័រចំពាក់កណ្តាលបណ្តាលអោយម៉ូតូដួល ចូលក្រោមរថយន្ត ចំណែកអ្នកបើកម៉ូតូដួលបោកនឹងរថយន្តកុងតឺន័ររងរបួសសន្លប់ ស្តូកស្តឹងនៅកន្លែងកើតហេតុ ដោយឡែកអ្នកបើករថយន្តកុងតឺន័រ ឃើញបុរសរងគ្រោះ មានសភាពធ្ងន់ធ្ងរ បានចុះពីរថយន្តរត់គេចខ្លួនបាត់ស្រមោល។
ក្រោយពេលកើតហេតុជនរងគ្រោះខាងលើត្រូវបានរថយន្តសង្គ្រោះគ្លីនិចរស្មី ដឹកយកទៅព្យាបាល។ ចំណែកម៉ូតូនិងរថយន្តកុងតឺន័រត្រូវបានជំនាញចរាចរណ៌ខណ្ឌធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌពោធិសែនជ័យរងចាំការដោះស្រាយថ្ងៃក្រោយ៕
ថោង ធីម