ខេត្តកណ្តាល ៖ ស្ត្រីមេម៉ាយម្នាក់ បានអុជធូបសែនប្តីរបស់ខ្លួននៅក្នុងបន្ទប់ លុះសែនរួច មិននៅចាំមើលភ្លើងធូប បានទុកចោល ព្រោះរវល់ចេញមកមើលការងារខាងក្រៅ ស្រាប់តែកម្ទេចធូបបានធ្លាក់ចុះធ្វើឱ្យឆាបឆេះ កើតជាអគ្គិភ័យ ឆេះបំផ្លាញទ្រព្យសម្បត្តិក្នុងបន្ទប់អស់ទាំងស្រុង។
ករណីគ្រោះអគ្គិភ័យនេះ បានកើតឡើង កាលពីវេលាម៉ោង១០ព្រឹក ថ្ងៃទី២៧ ខែតុលា ឆ្នាំ២០២៤ ស្ថិតនៅចំណុចភូមិកណ្តាល ឃុំព្រែកអញ្ចាញ ស្រុកមុខកំពូល។
ម្ចាស់ផ្ទះរងគ្រោះ មានឈ្មោះធី នាន់ទី ភេទស្រី អាយុ៣៤ឆ្នាំ ជាស្ត្រីមេម៉ាយ ប្រកបរបរបើកជួសជុលរថយន្តនិងក្រឡឹង។ ចំណែកផ្ទះ ដែលរងការឆាបឆេះជាប្រភេទផ្ទះថ្ម ប្រក់ស័ង្កសី ទំហំ៥ម៉ែត្រ គុណនឹង ២៥ម៉ែត្រ។
តាមប្រភពសមត្ថកិច្ច បានឱ្យដឹងថា គ្រោះអគ្គិភ័យខាងលើ ផ្តើមមកពីស្ត្រីម្ចាស់ផ្ទះ ដុតធូបសែនខ្មោចប្តី ក្នុងបន្ទប់ ទុកចោល បណ្តាលឱ្យធ្លាក់ឆេះរាលដល់ទ្រព្យសម្បត្តិក្នុងបន្ទប់អស់ទាំងស្រុងតែម្តង។
បន្ទាប់ពីកើតហេតុភ្លាមៗ អាជ្ញាធរមូលដ្ឋាន និងកម្លាំងសមត្ថកិចជំនាញ បានចុះអន្តរាគមន៍ និងបញ្ជូនរថយន្តពន្លត់អគ្គិភ័យ ចំនួន២គ្រឿង ចុះទៅបាញ់ទឹកពន្លត់ភ្លាមៗ រហូតដល់ភ្លើងបានរលត់ទៅវិញទាំងស្រុង ដោយមិនបង្កឱ្យឆេះរាលទៅផ្ទះក្បែរខាងឡើយ៕
