ខេត្តបាត់ដំបង ៖ សត្វក្រពើធំ ១ក្បាល បានបង្ហាញខ្លួននៅក្នុងស្ទឹង ធ្វើឱ្យប្រជាពលរដ្ឋប្រទះឃើញ មានការភ្ញាក់ផ្អើលនិងភ័យខ្លាច ហើយជាមួយនេះរដ្ឋបាលឃុំមានជ័យ ស្រុកសំឡូត បានចេញសេចក្តីព័ត៌មានបន្ទាន់ ឱ្យប្រជាពលរដ្ឋមានការប្រុងប្រយ័ត្ន។
ការប្រកាសព័ត៌មានបន្ទាន់ដោយរដ្ឋបាលស្រុកសំឡូត ធ្វើឡើងក្រោយមានការភ្ញាក់ផ្អើលពីមន្ត្រីមូលដ្ឋាន និងប្រជាពលរដ្ឋដែលរស់នៅក្បែរដងស្ទឹង បានប្រទះឃើញសត្វក្រពើធំ ១ក្បាល នៅចំណុចភូមិកំពង់ទូក ឃុំមានជ័យ ស្រុកសំឡូត ខេត្តបាត់ដំបង កាលពីថ្ងៃទី២៧ ខែតុលា ឆ្នាំ២០២៤។
ប្រជាពលរដ្ឋដែលបានប្រទះឃើញសត្វក្រពើដ៏ធំ ១ក្បាលនោះ បានអះអាងថា សត្វក្រពើដែលខ្លួនប្រទះឃើញនេះ មានទម្ងន់ ប្រហែល ៦០ ទៅ៧០គីឡូក្រាម វាបានសំដិលខ្លួននៅលើកូនដើមឈើប៉ប្រះមាត់ទឹកស្ទឹង ហើយមួយសន្ទុះក្រោយមក វាក៏ចូលទៅក្នុងទឹកវិញបាត់តែម្តង។
ក្រោយកើតមានហេតុការណ៍ភ្ញាក់ផ្អើលខាងលើ អាជ្ញាធរស្រុកសំឡូត នៅថ្ងៃទី២៧ ខែតុលា ឆ្នាំ២០២៤ បានអំពាវនាវដល់ប្រជាពលរដ្ឋ ពិសេសពលរដ្ឋក្នុងភូមិសាស្ត្រខាងលើ ត្រូវបង្កើនការប្រុងប្រយ័ត្នខ្ពស់ ពេលដែលចុះទឹកនេសាទត្រី ឬចុះងូតទឹក ជាដើម ដើម្បីធានាបាននូវ សុវត្ថិភាព។
អាជ្ញាធរស្រុកសំឡូត បានបញ្ជាក់ថា តាមសេចក្តីរាយការណ៍របស់លោកមេភូមិកំពង់ទូក ឃុំមានជ័យ ស្រុកសំឡូត ខេត្តបាត់ដំបង បានឱ្យដឹងថា នៅវេលាពេលព្រឹក ម៉ោងប្រហែល ៧ៈ៤៨ នាទី លោកបានប្រទះឃើញសត្វក្រពើ មួយក្បាល តាមការប៉ាន់ស្មាន មានទម្ងន់ ៦០ ទៅ ៧០គីឡូក្រាម ប្រវែងប្រហែល ២ម៉ែត្រ កំពុងតែសំដិលខ្លួននៅនឹងកំពង់ទឹក មាត់ស្ទឹង ក្បែរផ្ទះរបស់គាត់ ស្ថិតនៅក្នុងភូមិកំពង់ទូក ឃុំមានជ័យ ស្រុកសំឡូត ខេត្តបាត់ដំបង។ អាស្រ័យហេតុនេះ សូមបងដែលរស់នៅតាមដងស្ទឹង សូមមានការប្រុងប្រយ័ត្ន ជាពិសេស ការចុះមុជទឹកលេងនៅក្នុងស្ទឹង៕