ភ្នំពេញ៖លោកប៉ុន សុណារិន ហៅខេម ដែលត្រូវបានគេបង្អាប់ថារបូតតំណែងជាតួឯកនៅGalaxy តាំងពីព្រាប សុវត្ថិ និងខេមរៈ សិរីមន្ដ មកដល់ ហើយពេលនេះមិនដឹងថាអាចរក្សារតំណែងលេខ៣បានឬអត់ ព្រោះតែមានខាន់ ជេមស៍ និងជុំ លីណូ នៅក្បែខ្លួនដែរនោះ គ្មានដំណឹងថាលោកសុណារិន គ្រោងហើរចោលទ្រនុំទី២របស់ខ្លួននេះឡើយ ព្រោះលោកខេម ថាទំនាក់ទំនងរវាងលោកនិងថៅកែផលិតកម្មនេះដូចជាបងប្អូនបង្កើត ហើយលោកក៍មិនដែលចាត់ទុកលោកព្រាប សុវត្ថិ ថាជាឆ្អឹងទទឹងករបស់ខ្លួនដែរ ។ដោយឡែកកាលពីថ្ងៃទី១៨ វិចិ្ឆកា លោកខេម ប្រហែលជាធុញថប់រឿងគេបង្អាប់ថាបានត្រឹមធ្វើតួរងនោះពេកទើបលោកចេញមកថ្លាថ្លែងវាចាថា«ខ្ញុំនិងរស់នៅដើម្បីខ្ញុំ ហើយនិងរស់នៅជាខ្ញុំ » ។ការចេញមុខអះអាងរបស់លោកខេម បែបនេះបញ្ជាក់ថាលោកប្រឹងល្បីដោយសម្ថភាពខ្លួន តាមបែបម្យាងៗម្នាក់នៅGalaxy គ្មានមហិច្ឆិតាវ៉ារៀមច្បងឡើយ ។
ទោះជាយ៉ាងណាបើតាមអ្នកដឹកនាំកម្មវិធីប្រគុំតន្រ្ដីម្នាក់ដែលធ្លាប់ធ្វើការជាមួយលោកខេម បង្ហើបដោយសុំមិនឲ្យដាក់ឈ្មោះថាលោកសុណារិន មិនដែលចង់ធ្វើជាតួរងឡើយ ពោលគឺចង់នៅលើគេ ។ប៉ុន្ដែលោកថាខេម ជ្រកនៅទ្រនុំរួមគ្នាជាមួយព្រាប សុវត្ថិ និងខេមរៈ សិរីមន្ដ បែបនេះចង់មិនចង់ថៅកែនិងមិនឲ្យលោកនៅលើតារាទាំងពីរទេ ហេតុនេះបើខេម ចង់ធ្វើជាតួឯក ឬលេខ១ដូចកាលនៅថោន គឺមានតែចេញពីផលិតកម្មនេះ ឬងាកមកធ្វើជាបទចម្រៀងដោយខ្លួនឯងទើបអាចទៅរួច ។
ខេម ក្រៅពីគ្មានឱកាសឈរនៅលើព្រាប សុវត្ថិ និងខេមរៈ សិរីមន្ដ នោះលោកសុណារិន ក៍នៅតែមិនទាន់ឡើងជាឧកញ៉ាដូចតារាទាំងពីរដែរ ហេតុនេះទាំងបទពិសោធន៍ក្នុងអាជីពចម្រៀងនិងឋានៈខេម នៅតែមិនអាចប្រៀបធៀបតារាកូន៣ទាំងពីរខាងលើបានទេ ។ប៉ុន្ដែគេជឿថាមិនយូទេខេម នឹងឡើងជាឧកញ៉ាជាមិនខានប្រសិនបើមានការជួយជ្រោមជ្រែងពីថៅកែ ព្រោះតាមដំណឹងថាតារាលំដាប់ជូរមុខរបស់Galaxy ទាំងអស់ស្ថិតក្នុងបញ្ជីដែលនឹងឡើងជាឧកញ៉ាដូចគ្នា ក្នុងនោះក៍មានទាំងលោកខាន់ ជេមស៍ ម្នាក់ផងដែរ ។
អ្នកជំនាញធ្វើភ្លេង(Composer)ម្នាក់នៅហង្សមាស ធ្លាប់ប្រាប់ថាទោះជាខេម មិនអាចដណ្ដើមបានលេខ១នៅGalaxyមែន ប៉ុន្ដែស្ទីលច្រៀងសម្លេងស្អករបស់លោកមិនអាចតារាណាដណ្ដើមតំណែងនេះបានទេ ដែលមានន័យថាលោកសុណារិន នៅតែស្ថិតក្នុងចំណោមតារាជូរមុខរបស់Galaxy តទៅទៀត តែក្រោមព្រាប សុវត្ថិ និងខេមរៈ សិរីមន្ដ ។អ្វីដែលគគួរឲ្យកត់សម្គាល់នោះខេម ដែលធ្លាប់ទទួលបានការចាប់អារម្មណ៍ពេលចាប់ដៃជាមួយនាងតន់ ច័ន្ទសីម៉ា ព្រោះច្រៀងស្អកដូចគ្នានោះពេលនេះបទចម្រៀងរបស់លោកក៍ស្បើយដែរ ដោយសារតែនាងសីម៉ា ខ្លួនតែមួយត្រូវងាកទៅចាប់ដៃជាមួយលោកសុវត្ថិ និងសិរីមន្ដ ដែរ។
គួរបញ្ជាក់ថាខេម ក្រៅពីមិនសូវលេចធ្លោខ្លាំងនៅGalaxy ដូចមុនឆ្នាំ២០២០ នោះរឿងស្នេហារបស់លោកជាមួយនារីរូបស្រស់ជាអាណិកជនខ្មែរមកពីបារាំងអ្នកនាងស្រីកា ក៍ស្ងប់ស្ងាត់ គ្មានដំណឹងរៀបការឡើយ ក្រោយអ្នកទាំងពីរចាប់ដៃគ្នាជាង១០ឆ្នាំ ។ខេម និយាយដដែលៗថាលោកមិនខា្លចរឿងរៀបការទេ ប៉ុន្ដែបែជាថាមិនអាចកំណត់ថាក្រាបផ្ទឹមឲ្យប្រាកដនាពេលណាទៅវិញ ។ប្រភពខ្លះថាខេម ចង់លេងស្ទីលតាមរៀមច្បងខេមរៈ សិរីមន្ដ ពោលគឺយកកូនមុនរៀបការ ព្រោះលោកសុណារិន ក៍ធ្លាប់បង្ហើបថាលោកស្រលាញ់ក្មេងៗខ្លាំងណាស់ តែគ្មានកូន២ដូចគេសង្ស័យនោះទេ ព្រោះក្មេងស្រីដែលលោកបីនោះជាក្មួយលោកនៅបារាំង ចំណែកក្មេងប្រុសដែលលោកធ្លាប់បង្ហោះនៅលើហ្វេសបុកនោះជាកូនអ្នកឧកញ៉ាឡេង ណាវ៉ាត្រា ថៅកែរបស់លោក៕
