ភ្នំពេញ ៖ បុរសម្នាក់ ទើបនឹងចេញពីផឹកស៊ីស្រវឹងជោក ជិះម៉ូតូទៅផ្ទះមិនរួច ក៏ឈប់ម៉ូតូនៅចិញ្ចើមផ្លូវ រួចប្រះ ខ្លួនដេក ស្រាប់តែត្រូវជនសង្ស័យឃើញឱកាសល្អ លួចយកម៉ូតូ ១គ្រឿង និងទូរស័ព្ទ គេចខ្លួនបាត់។ ចំណែកជនរងគ្រោះ ចេះតែបន្តដេក រហូតដល់ប្រជាពលរដ្ឋរាយការណ៍ប្រាប់សមត្ថកិច្ច ចុះអន្តរាគមន៍ ដាស់ហៅឱ្យក្រោក ទើបដឹងថា ត្រូវចោរលួចម៉ូតូ និងទូរស័ព្ទអស់ពីខ្លួន។
ករណីនេះ បានកើតឡើង កាលពីវេលាម៉ោង ១២និង២០នាទីរំលងអធ្រាត្រ ឈានចូលថ្ងៃ២៦ ខែវិច្ឆិកា ឆ្នាំ២០២៤ ស្ថិតនៅតាមបណ្តោយផ្លូវបេតុង ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនកើតហេតុ គេឃើញបុរសរងគ្រោះ ជិះម៉ូតូ ១គ្រឿង ម៉ាកស៊ុយស៊ូគី និច មិនចាំស្លាកលេខ ធ្វើដំណើរមកដល់ចំណុចខាងលើ ស្រាប់តែឈប់ម៉ូតូ រួចប្រះខ្លួនដេកលក់នៅលើចិញ្ចើមខឿនមុខផ្ទះសំណាក់ លាភហេង ។ លុះក្រោយមក មានជនសង្ស័យប្រុសស្រី ២នាក់ ដើរមកដល់ ឃើញឱកាសល្អ ក៏បានលួចយកទូរស័ព្ទ និងម៉ូតូ ជិះចេញទៅបាត់ស្រមោល។ បន្ទាប់មក ប្រជាពលរដ្ឋឃើញដូច្នេះ ក៏នាំគ្នារាយការណ៍ទាក់ទងទៅសមត្ថកិច្ចមូលដ្ឋានភ្លាមៗ។
ក្រោយពេលកើតហេតុ បន្ទាប់ពីកម្លាំងសមត្ថកិច្ចមូលដ្ឋានចុះមកដល់ ដាស់បុរសស្រវឹង សួរនាំ រួចហើយនាំយកទៅប៉ុស្តិ៍ ដើម្បីទាក់ទងទៅក្រុមគ្រួសារ ឱ្យមកទទួលយកផ្ទះវិញ៕
