ភ្នំពេញ ៖ វ៉ាលិសធំ១ ត្រូវបានប្រជាពលរដ្ឋប្រទះឃើញប្លុងចោលក្បែរមាត់ប្រឡាយ បង្កឱ្យមានការភ្ញាក់ផ្អើល មិនដឹងមានរបស់អ្វីនៅក្នុងនោះ ណាមួយខ្លាចមានវត្ថុគ្រោះថ្នាក់ ឬពាក់ព័ន្ធនឹងបទល្មើសផង ទើបមិនហ៊ានទៅជិត ក៏ប្រញាប់រាយការណ៍ប្រាប់អាជ្ញាធរពាក់ព័ន្ធ ចុះទៅពិនិត្យទាំងយប់។
ហេតុការណ៍នេះ បានបង្កឱ្យមានការភ្ញាក់ផ្អើលឡើង កាលពីវេលាម៉ោង ១១និង៣០នាទីយប់ ថ្ងៃទី០១ ខែធ្នូ ឆ្នាំ២០២៤ នៅចំណុចផ្លូវប្រឡាយលូ១០៥ កែងផ្លូវ៤៣២ សង្កាត់បឹងត្របែក ខណ្ឌចំការមន។
តាមប្រភពព័ត៌មានពីមន្ត្រីពាក់ព័ន្ធ ដែលបានចុះទៅពិនិត្យជាក់ស្តែងដល់ទីតាំងខាងលើ បានឱ្យដឹងថា មុនពេលកើតហេតុ ពួកគាត់បានទទួលដំណឹងពីបងប្អូនប្រជាពលរដ្ឋដែលធ្វើដំណើរឆ្លងកាត់តាមផ្លូវខាងលើ បានប្រទះ ឃើញវ៉ាលិសធំមួយ បានទុកចោលនៅមាត់ប្រឡាយ ហើយដោយសារតែមានការសង្ស័យថាក្នុងវ៉ាលិសនោះមានរបស់របរឬជាអ្វីផ្សេងៗនៅក្នុងនោះ មិនហ៊ានទៅប៉ះពាល់ ក៏សម្រេចរាយការណ៍ជូនកម្លាំងអាជ្ញាធរពាក់ព័ន្ធ មានទាំងមន្ត្រីសាលាខណ្ឌ និងកម្លាំងអាវុធហត្ថខណ្ឌចំការមន ដើម្បីចុះអន្តរាគមន៍ភ្លាមៗ។
បន្ទាប់ពីទទួលបានសេចក្តីរាយការណ៍ខាងលើ សមត្ថកិច្ច សហការជាមួយមន្ត្រីមូលដ្ឋាន បានចុះទៅដល់ទីតាំងខាងលើភ្លាមៗ និងបានចូលទៅពិនិត្យមើលវ៉ាលិសនោះ ពេលបើកវ៉ាលិសនោះទេ មិនមានអ្វីនៅក្នុងនោះទាល់ តែសោះ ទើបបានត្រឹមគ្រវីក្បាលហួសចិត្តគ្រប់គ្នា៕
