ភ្នំពេញ ៖ នារីម្នាក់ កំពុងបើកបររថយន្ត ១គ្រឿង ក្នុងល្បឿនលឿនដល់ចំណុចផ្លូវកោង រវល់ឱនរើសទូរស័ព្ទ ទើបធ្វើឱ្យរេចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្តាលឱ្យរថយន្តក្រឡាប់ផ្ងារជើង តែសំណាងល្អមិនបង្កឱ្យអ្នកបើកបររងរបួសអ្វីធ្ងន់នោះទេ។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤ទៀបភ្លឺ ឈានចូលថ្ងៃទី០២ ខែធ្នូ ឆ្នាំ២០២៤ នៅតាមបណ្តោយផ្លូវបឹងកក់ ទល់មុខរដ្ឋាករទឹកស្វ័យ័តក្រុងភ្នំពេញ សង្កាត់ស្រះចក ខណ្ឌដូនពេញ។
តាមសម្តីនារីជាម្ចាស់រថយន្តខាងលើ បានឱ្យដឹងថា មុនពេលកើតហេតុ នាងបានបើកបររថយន្ត១គ្រឿងម៉ាក Lexus NX-200t ពណ៌ស ធ្វើដំណើរឆ្លងកាត់បឹងកក់ លុះមកដល់ចំណុចផ្លូវកោង បានជ្រុះទូរស័ព្ទ ក៏ឱនរើសទូរស័ព្ទ បណ្តាលឱ្យរេចង្កូតជ្រុលទៅបុកក្បាលនាគពុះចែកទ្រូងផ្លូវពេញទំហឹង និងធ្វើឱ្យក្រឡាប់រថយន្តភ្លាមៗតែម្តង។
គួរបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មិនបានបង្ករបួសស្នាមដល់អ្នកដទៃនោះទេ ជាក់ស្តែងគឺខូចខាតតែរថយន្តបង្កដែលក្រឡាប់ និងបង្គោលស្លាកសញ្ញាបង្ហាញផ្លូវតែប៉ុណ្ណោះ ចំណែកម្ចាស់រថយន្ត ក៏មិនមានរងរបួសនោះដែរ។
ក្រោយពេលកើតហេតុ នារីម្ចាស់រថយន្តបង្កហេតុ បានធ្វើការសងសំណងរាល់ការខូចខាតភ្លាមៗ ទៅកាន់ភាគីខាងគ្រប់គ្រងនៅក្នុងបឹងកក់ ព្រមទាំងហៅរថយន្តស្ទូច មកស្ទូចយករថយន្តរបស់ខ្លួនទៅជួសជុលដោយខ្លួនឯង៕
