ភ្នំពេញ៖ក្រៅពីមានសម្ថភាពផ្ទាល់ខ្លួនតារាចម្រៀងមួយដួងល្បីទៅបានដោយកត្តាជាច្រើនគួបផ្សំដូចជាផលិតកម្ម ,គ្រូភ្លេង ,អ្នកនិពន្ធ ,អ្នកដឹកនាំសម្ដែង និងអ្នកផ្ដល់ឱកាសឲ្យឡើងឆាកតន្រ្ដីជាដើម ។សម្រាប់ឆ្នាំ២០២៤ នេះគេឃើញតារា៤ដួង មានឈ្មោះបោះសម្លេងដោយសារមួយផ្នែកបងប្រុសនៅក្រោយខ្នងធ្វើជាអ្នកនិពន្ធទំនុក ច្រៀងឲ្យ។
១៖មាស សុខសោភាៈចាប់អាជីពចម្រៀងរយៈពេល២០ឆ្នាំ មាស សុខសោភា មានបងប្រុសនាងលោកមាស សុខរតនៈ ចាំជួយនិពន្ធឲ្យច្រៀង បន្ថែមពីលើអ្នកនិពន្ធផ្សេងទៀតរហូតដល់ចប្ចុប្បន្ននាងច្រៀងនៅCamtrax Music ក៍លោករតនៈ នៅតែជាអ្នកដឹកនាំសម្ដែងMV និងសរសេរបទចម្រៀងឲ្យប្អូនលោកច្រៀងដដែល ។ប៉ុន្ដែសម្រាប់ឆ្នាំ២០២៥ ខាងមុខនេះគេនៅមិនទាន់ដឹងច្បាស់ទេថាតើសុខសោភា នៅតែបន្ដច្រៀងផលិតកម្មខ្លួនឯងហើយឲ្យបងប្រុសនាងនិពន្ធឲ្យច្រៀងតទៅទៀត ឬក៍ស្វែងរកទ្រនុំថ្មី ព្រោះ២ឆ្នាំក្រោយចេញពីរាម សោភា នៅទ្រឹងពោលគឺមិនសូវមានបទណាផ្ទុះដូចមុនទៀតទេ ខណៈដែលហង្សមាស ,Galaxy និងថោន បើកទ្វាររងចាំនាងគ្រប់ពេល ។
២៖ឆាយ វីរៈយុទ្ធៈតារាចម្រៀងមានឈ្មោះដើមថាឆាយ ចាន់ឆោម រូបនេះក៍មានបងប្រុសរបស់ខ្លួនជាអ្នកនិពន្ធឲ្យច្រៀងដែរនោះគឺលោកឆាយ ចាន់ម៉ៅ ដែលមានបទល្បីៗជាច្រើននាំឲ្យលោកវីរៈយុទ្ធ មានឈ្មោះបោះសម្លេងដល់បច្ចុប្បន្ន។លោកចាន់ឆោម ក្លាយជាតារាជូរមុខគេរបស់សាន់ដេ ហើយមិនទាន់មានដំណឹងថាលោកចេញពីផលិតកម្មនេះទេ បើទោះជាមានផលិតកម្មធំៗជាច្រើនពេញចិត្តលើសម្ថភាពសម្លេងរបស់លោកក្ដី ។តាមប្រភពថាលោកវីរៈយុទ្ធ ទុកចិត្តបងប្រុសរបស់ខ្លួនខ្លាំងណាស់ ហើយការនៅបន្ដច្រៀងឲ្យសាន់ដេជាបន្ដទៀត ឬត្រូវដើរចេញនោះមួយផ្នែកក៍នៅលើការសម្រេចចិត្តរបស់លោកចាន់ម៉ៅ ផងដែរ ។យ៉ាងណាពេលនេះលោកចាន់ឆោម កំពុងតែកាន់ទុក្ខម្ដាយរបស់លោកឧបាសិកាគង់ ស៊ឹង ដែលទទួលមរណភាពកាលពីថ្ងៃទី៨ ខែធ្នូ ឆ្នាំ២០២៤ ហើយត្រូវធ្វើបុណ្យគម្រប់ខួប៧ថ្ងៃនៅថ្ងៃទី១៣ ធ្នូ រួចរាល់ទើបលោកវិលរកឆាកតន្រ្ដីវិញ ។
៣៖ខេមរៈ សិរីមន្ដៈ អ្នកណាក៍បានដឹងដែរថាលោកខែម ប៊ុនថៃ មានយ័នការពារអាជីពរបស់លោកមួយផ្នែកធំគឺលោកខេមរៈ ភារុណ ដែលជាអ្នកនិពន្ធទំនុកច្រៀងឲ្យលោកតាំងពីលោកថៃ ចូលសិល្បៈឆ្នាំ២០០៤ម្លេះ ។បើទោះជាពេលនេះលោកភារុណ ឡើងឋានៈជាឯកឧត្តម និងពាក់ផ្កាយ១លើស្មាមែន តែលោកប្រាប់អ្នកយកព័តមានយើងថ្មីៗនេះថានៅតែសរសេរបទចម្រៀងឲ្យប្អូនលោកច្រៀង ដោយធ្វើការ ក្រៅម៉ោង(Part Time ) នៅGalaxy ។ចំណែកសិរីមន្ដ វិញក្រោយដើរដល់ចំណុចមួយធ្វើអ្វីក៍មានគេជេរប្រមាថលើបណ្ដាញសង្គមនោះមកពេលនេះតារាកូន៣បានងាកមកច្រៀងបទកម្សត់ៗស្ដារកេរ្ដិ៍ឈ្មោះឡើងវិញ តែគេនៅមិនទាន់ដឹងថាតើលោកថៃ មានការគាំទ្រដូចមុន ឬនៅតែមានគេជេរទៀតនោះទេ ។
៤៖យឿន សូត្រអនុស្សាវរីយ៍ៈ អតីតតារាសាន់ដេរូបនេះមានកេរ្ដិ៍ឈ្មោះល្បីគួរសម ព្រោះមានបងប្រុសខ្លួនជាអ្នកនិពន្ធឲ្យច្រៀងគឺលោកសុន រដ្ឋា ។ប៉ុន្ដែអនុស្សាវីយ៍ បច្ចុប្បន្ន កំពុងតែច្របូកច្របល់រឿងប្រពន្ធកូន១លែង ធ្វើឲ្យគេយំតាមតាមTik Tok ដែលនាំឲ្យអ្នកលេងបណ្ដាញសង្គមហួសចិត្តថាលោកមិនសមជាតារានោះទេ ព្រោះតែបង្ហាញពីជីវិតត្រូវប្រពន្ធលែងឲ្យគេឃើញអស់ គ្មានលទ្ធភាពផ្សះផ្សារគ្រួសារខ្លួនឯងឲ្យបានល្អ ហែកទ្រូងឲ្យក្អែកចឹក …។ អ្នកជំនាញសិល្បៈបានលើកឡើងថាតារាដែលមានបងប្រុសខ្លួននិពន្ធទំនុកច្រៀងឲ្យអាចនឹងល្បីបានយូជាងតារាដែលពឹងគេឲ្យសរសេរចម្រៀងឲ្យច្រៀង ព្រោះជាទូទៅពួកគេដឹងការប្រើប្រាស់សម្លេងរបស់ប្អូនខ្លួនហើយផលិតបទចម្រៀងឲ្យត្រូវតាមនោះតែម្ដង ។ម្យាងទៀតគេជឿថាក្រុមអ្នកិពន្ធទាំងនោះមុននឹងសរសេរទម្លាក់បទទៅឲ្យតារាផ្សេងៗច្រៀង ច្បាស់ជានិពន្ធឲ្យបទល្អៗឲ្យប្អូនខ្លួនឯងច្រៀងមុនគិតដល់តារាផ្សេងជាមិនខាន ៕
