ភ្នំពេញ៖ព្រាប សុវត្ថិ នឹងផុតកុងត្រា ជាមួយផលិតកម្មGalaxy ក្នុងកុងត្រាលើកទីមួយ៥ឆ្នាំ នៅខែសីហា ឆ្នាំ២០២៥ ចំពេលដែលអតីតតារាហង្សមាសរូបនេះគម្រប់អាយុ៥០ឆ្នាំគត់។មជ្ឈដ្ឋានមហាជនសង្កេតឃើញថាជិត៥ឆ្នាំ ដែលព្រាប សុវត្ថិ ចាកចេញពីហង្សមាស ជ្រកនៅGalaxy នេះលោកសុវត្ថិ ប្រែប្រួលសឹងតែ៣៦០ ដឺក្រេ ពោលគឺពេលខ្លះច្រៀងបទដែលគេមិននឹកស្មានថាលោកព្រមច្រៀង ហើយលោកគង់ វិសាល អ្នកដឹកនាំកម្មវិធីសិល្បៈរបស់ប៉ុស្ដិ៍បាយ័នធ្លាប់ថាលោកសុវត្ថិ មនុស្ស១០០នាក់ ស្រលាញ់ទាំង១០០នាក់ នោះពេលនេះបែជាមានអ្នកហ៊ានជេរ លោកឧកញ៉ារូបនេះនៅលើបណ្ដាញសង្គមដោយបើកចំហតែម្ដង ខណៈដែលអាណិកជនខ្លះ នៅក្រៅស្រុកដូចជាប្រទេសកូរ៉េខាងត្បូង ,អូស្រា្ដលី និងអាមេរិក ជាដើមព្រមានធ្វើពហិការ ឈប់ស្ដាប់បទចម្រៀងលោកទៀតផង ដែលរឿងបែបនេះលោកមិនដែលជួបប្រទះឡើយអំឡុងពេលច្រៀងនៅហង្សមាស២៣ឆ្នាំ(១៩៩៧-២០២០) ។
សំណួរដែលមហាជនចង់ដឹងថាតើព្រាប សុវត្ថិ នឹងដើរចេញពីផលិតកម្មGalaxy នៅពេលចប់កុងត្រា ៥ឆ្នាំ២០២៥ នេះឬមួយក៍លោកនៅមានក្ដីសុខជាមួយទ្រនុំថ្មីហើយតកុងត្រាថ្មីថែម៥ឆ្នាំ ទៀត ?
អ្នកស្រីយឹម សុជាតា អ្នកចាត់ការទូទៅរបស់Galaxy មិនឆ្លើយតបចំពោះសំណួររបស់អ្នកយកព័តមានយើងថាតើផលិតកម្មនេះបានចរចាកុងត្រាថ្មីជាមួយព្រាប សុវត្ថិ ឬអត់នោះឡើយដោយលើកទូរស័ព្ទហើយស្ដាប់សំណួរចប់ ក៍ដាច់ទៅវិញ។ចំណែកការតេជាថ្មីចូលជាច្រើនសារតែគ្មានអ្នកលើក។យ៉ាងណាទស្សនិកជនមើលឃើញថាព្រាប សុវត្ថិ ជ្រកនៅGalaxy ជិត៥ឆ្នាំអ្វីដែលលោកមិនធ្លាប់មានពីមុននោះគឺតែ១គត់នោះគឺគោរម្យងារជា«ឧកញ៉ា» ដែលតារាកូន៣រូបនេះទទួលបានកាលពីថ្ងៃទី២៩ ខែមេសា ឆ្នាំ២០២២ ក្រៅពីនេះកេរ្ដិ៍ឈ្មោះនិងទ្រព្យសម្បត្តិលោកមានតាំងពីនៅផលិតកម្មចាស់ម្លេះ ។តែព្រាប សុវត្ថិ ដែលប្រាប់អ្នកកាសែតថាគេអាចហៅលោកដូចពីមុនក៍បាន ជាឧកញ៉ាក៍បាននោះចាប់ផ្ដើមបង្ហាញពីឥទ្ធិពល និងសម្ភារៈនិយមលើសមុន ដូចជារាល់ពេលលោកទៅច្រៀងឬកម្មវិធីណាមួយធ្វើឲ្យអ្នកដំណើរតាមផ្លូវមានការភ្ញាក់ផ្អើលតាមរយៈក្បួនរថយន្ដរបស់លោកដូចជាអ្នកធំមានដូចជារថយន្ដRolls Royce ,Bmw ,Ford ,Escalade ,Range Rover និងIsuzu ជាដើម រួមជាមួយកងអង្គរក្សជិះម៉ូតូធំអមពីក្រោយ ។ដោយមានទាំងអំណាច និងលុយបែបនេះហើយទើបអ្នកដឹកនាំកម្មវិធីប្រគុំតន្រ្ដីប៉ុស្ដិ៍CTN លោកស៊ិន សិលា ធ្លាប់ប្រាប់អ្នកយកព័តមានយើងថាលោកសំណូមពរឲ្យតារាទាំងឡាយដែលឡើងជាឧកញ៉ាហើយគួរតែឈប់ពីសិល្បៈឲ្យដាច់ស្រឡះទៅ ព្រោះដើម្បីកុំឲ្យពេលឡើងច្រៀងទៅពិបាកឡើងអក្សរ។ប៉ុន្ដែលោកសុវត្ថិ ថាលោកចាប់អាជីពចម្រៀងនិងមុខជំនួញឲ្យស្មើគ្នា ពោលគឺនៅតែទទួលច្រៀងដូចមុនដដែល ព្រោះបើមិនរកស៊ីទេក៍មិនទៅមុខដែរ ។
បើទោះជាអ្នកតំណាងGalaxy មិនហ៊ាននិយាយថាព្រាប សុវត្ថិ នឹងកុងត្រាថ្មី ឬ«No » ក៍ដោយតែគេអាចសន្និ ដ្ឋានបានថាលោកស្នាយ នឹងមិនវិលទៅផលិតកម្មចាស់ហង្សមាសវិញទេ ព្រោះគេឃើញទំនាក់ទំនងរវាងលោកនិងថៅកែស្អិតល្មូតគ្នាណាស់ បើទោះជាមកដល់ទ្រនុំថ្មីនេះលោកត្រូវប្រជែងយ៉ាងស្វិតស្វាញជាមួយខេមរៈ សិរីមន្ដ ជាលើកទី២ក៍ដោយ ។រឿងដែលព្រាប សុវត្ថិ មិនអាចដើរចេញពីGalaxy នោះដែរបញ្ហាសំខាន់គឺកូនប្រុសរបស់លោក២នាក់សុវត្ថិ មុនីវណ្ណ និងសុវត្ថិ សិរីវុឌ្ឍ ក៍ច្រៀងនៅផលិតកម្មជាមួយឪពុកដែរ ហេតុនេះលោកសុវត្ថិ នឹងមិនធ្វើឲ្យកូនរងាឡើយ ហើយក៍គ្មានជម្រើសណាក្រៅពីត្រៀមតកុងត្រាថ្មីទៀតទេ។
ទោះជាយ៉ាងណាបើតាមអ្នកជំនាញសិល្បៈលើកឡើងថាព្រាប សុវត្ថិ ច្រៀងឲ្យផលិតកម្មថ្មីនេះ៥ឆ្នាំ គេនៅតែមិនអាចដឹងច្បាស់ថាតើបទ១ណាដែលលោកល្បីល្បាញបំផុតនោះឡើយ ។ប៉ុន្ដែមានការលើកឡើងថាបើព្រាប សុវត្ថិ ចេញបុកច្រើនបទលើទីផហ្សារនោះប្រាកដជាគង់តែមានបទណាមួយត្រូវចិត្តអ្នកស្ដាប់ជាមិនខាន ដូចជាបទ«ពេលណាជួបគេម្ដងទៀត? » និងបទ«បំផ្លាញបេះដូង»មានការគាំទ្រគួរសម ៕
