ខេត្តបាត់ដំបង ៖ ជនសង្ស័យម្នាក់ បានធ្វើសកម្មភាពលួចម៉ូតូ ១គ្រឿង បានសម្រេច រួចបានយកទៅប្លុងចោលក្នុងព្រៃ រង់ចាំឱកាសល្អ ដើម្បីយកទៅលក់ តែត្រូវបានកម្លាំងសមត្ថកិច្ចជំនាញស្រាវជ្រាវឃាត់ខ្លួនបាន នាំយកមកចាត់ការតាមច្បាប់។
ករណីលួចម៉ូតូនេះ បានកើតឡើង កាលពីវេលាម៉ោង ៤និង១០នាទីទៀបភ្លឺ ថ្ងៃទី២០ ខែមករា ឆ្នាំ២០២៥ នៅចំណុចក្រុមទី១ ភូមិស្វាយធំ ឃុំបឹងរាំង ស្រុកកំរៀង។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះឡេង សុធា ភេទប្រុស អាយុ១៧ឆ្នាំ មុខរបរកម្មករ រស់នៅភូមិស្វាយ ឃុំបឹងរាំង ស្រុកកំរៀង។ ចំណែកម៉ូតូដែលជនសង្ស័យលួចយកទៅ ម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាក លេខ បាត់ដំបង 1AH-0027 ជារបស់ជនរងគ្រោះឈ្មោះណុល ម៉េងឆុន ភេទប្រុស អាយុ៣៥ឆ្នាំ មុខរបរជាងដែក មានលំនៅ ភូមិស្វាយធំ ឃុំបឹងរាំង ស្រុកកំរៀង។
តាមប្រភពពីសមត្ថកិច្ច បានឱ្យដឹងថា កាលពីវេលាម៉ោង ៤និង១០នាទីទៀបភ្លឺ ថ្ងៃទី២០ ខែមករា ឆ្នាំ២០២៥ នៅចំណុចក្រុមទី១ ភូមិស្វាយធំ ឃុំបឹងរាំង ស្រុកកំរៀង មានករណីលួចមានស្ថានទម្ងន់ទោស (កាច់កម៉ូតូ) មួយកើតឡើង ប្រព្រឹត្តដោយជនសង្ស័យមិនស្គាល់អត្តសញ្ញាណ បានធ្វើសកម្មភាពលួចម៉ូតូរបស់ជនរងគ្រោះ ឈ្មោះ ណុល ម៉េងឆុន នៅចំណុចកើតហេតុខាងលើ យកទៅបាត់។
ប្រភពដដែល បន្តថា ក្រោយពីទទួលបណ្តឹងពីជនរងគ្រោះ កម្លាំងនៃអធិការដ្ឋាននគរបាលស្រុកកំរៀង រួមជាមួយកម្លាំងប៉ុស្តិ៍នគរបាលរដ្ឋបាលបឹងរាំង នៃអធិការដ្ឋាននគរបាលស្រុកកំរៀង ដឹកនាំដោយលោកវរសេនីយ៍ទោ វេ គឹមចត់ អធិការនគរបាលស្រុកកំរៀង បានចុះធ្វើការ ស៊ើបអង្កេតស្រាវជ្រាវ រហូតកំណត់អត្តសញ្ញាណ និងឈានដល់ការនាំខ្លួនជនសង្ស័យឈ្មោះឡេង សុធា នៅថ្ងៃដដែលនោះ យកមកសាកសួរនៅអធិការដ្ឋាននគរបាលស្រុកកំរៀង។
នៅចំពោះមុខសមត្ថកិច្ច ជនសង្ស័យខាងលើ បានឆ្លើយសារភាពថា ខ្លួនពិតជាបានធ្វើសកម្មភាពលួចកាច់កម៉ូតូរបស់ជនរងគ្រោះ យកទៅលាក់ទុកនៅក្នុងព្រៃ ប្រាកដមែន។
ជនសង្ស័យខាងលើ ត្រូវបានកម្លាំងនគរបាលស្រុកកំរៀង រៀបចំកសាងសំណុំរឿង បញ្ជូនទៅកាន់ការិយាល័យជំនាញខេត្ត ដើម្បីចាត់ការបន្ត តាមនីតិវិធី៕