ភ្នំពេញៈ តុលាការ បានកោះហៅលោករ៉ុង ឈុន ទីប្រឹក្សាគណបក្សកម្លាំងជាតិ នៅថ្ងៃទី២៣ ខែមេសា ឆ្នាំ២០២៥ ក្រោយចូលឆ្នាំថ្មី ប្រពៃណីជាតិខ្មែរ ពីបទចោទ ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម (ការមិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម) ។
យោងតាមដីកាកោះឱ្យចូលសវនាការ របស់អយ្យការអមសាលាដំបូងរាជធានីភ្នំពេញ ចុះថ្ងៃពុធ ៥កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០២ ខែមេសា ឆ្នាំ២០២៥ បានបញ្ជាក់ថា “ យើង សេង ហៀង តំណាងអយ្យការអមសាលាដំបូងរាជធានីភ្នំពេញ ក្រោយពីបានពិនិត្យសំណុំរឿងព្រហ្មទណ្ឌលេខ ៥៥៧៨/រ ចុះថ្ងៃទី២៣ ខែសីហា ឆ្នាំ២០២៤ ដែលមានជនជាប់ចោទឈ្មោះ រ៉ុង ឈុន ភេទប្រុស កើតនៅថ្ងៃទី១៥ ខែកក្កដា ឆ្នាំ១៩៦៩ ជនជាតិខ្មែរ ជាប់ចោទបទ ញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម (ការមិនរាងបាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម) ប្រព្រឹត្តនៅប្រទេសកម្ពុជា ក្នុងឆ្នាំ២០២៤ តាមបទល្មើសដែលមានចែងឱ្យផ្ដន្ទាទោសតាមហេត្រា ៨៨ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។ ហេតុដូច្នេះសម្រេច បង្គាប់ឱ្យឈ្មោះ រ៉ុង ឈុន ភេទប្រុស កើតនៅថ្ងៃទី១៥ ខែកក្កដា ឆ្នាំ១៩៦៩ ជនជាតិខ្មែរ មានអាសយដ្ឋាននៅផ្ទះលេខ៨៨ ផ្លូវលេខ៩ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ឱ្យចូលមកកាន់សាលាដំបូងរាជធានីភ្នំពេញ នៅថ្ងៃទី២៣ ខែមេសា ឆ្នាំ២០២៥ វេលាម៉ោង ៨:៣០ នាទីព្រឹក ដើម្បីចូលរួមសវនាការ។ ដំណើររឿងពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម (ការមិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម) ប្រព្រឹត្តនៅប្រទេសកម្ពុជា ក្នុងឆ្នាំ២០២៤ “ ។
ចំពោះសមាសភាពជំនុំជម្រះ រួមមាន លោក លី សុខា ចៅក្រមជំនុំជម្រះ លោកសេង ហៀង តំណាងអយ្យការ និងលោក តិច ប៉ូ ក្រឡាបញ្ជីសវនាការ ។
ដីកាកោះឲ្យចូលសវនាការ ខាងលើ បញ្ជាក់ពីសិទ្ធិរបស់ជនជាប់ចោទ មានដូចតទៅ៖
-សិទ្ធិទទួលដឹងឮពីលិខិតចោទប្រកាន់ទោស និងដីកាកោះឱ្យចូលរួមសវនាការ
-សិទ្ធិបង្ហាញភស្តុតាង សំអាងសាក្សី និងធ្វើសំណូមពរផ្សេងៗ
-សិទ្ធិប្តឹងបដិសេធចៅក្រមជំនុំជម្រះ
-សិទ្ធិការពារខ្លួនដោយខ្លួនឯង ឬពឹងមេធាវីជួយការពារ
-សិទ្ធិនិយាយសម្តីចុងក្រោយបង្អស់ ។
សូមរំលឹកថា កាលពីខែកក្កដា ឆ្នាំ២០២០ លោក រ៉ុង ឈុន ត្រូវបានតុលាការឃុំខ្លួនពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ក្រោយពីលោកបាននិយាយរិះគន់ការបោះបង្គោលព្រំដែនកម្ពុជា-វៀតណាម ក្នុងខេត្តត្បូងឃ្មុំ។ បន្ទាប់មក នៅខែវិច្ឆិកា ឆ្នាំ២០២១ សាលាឧទ្ធរណ៍បានសម្រេចដោះលែង បន្ទាប់ពីលោក រ៉ុង ឈុន ជាប់ពន្ធនាគាររយៈពេល ១៥ខែ និង១១ថ្ងៃ នៃរយៈពេលឃុំខ្លួន សរុបចំនួន ២៤ខែ។ ចំណែកទោសដែលនៅសល់ ត្រូវបានព្យួរ។ ក្រោយមក លោករ៉ុង ឈុន ក៏បានធ្វើសកម្មភាពនយោបាយជាហូរហែ ពិសេសធ្វើការជាមួយគណបក្សកម្លាំងជាតិ ក្នុងនាមជាទីប្រឹក្សា។ ក្រោយមកទៀត ពោលគឺនៅថ្ងៃទី ២០ ខែកញ្ញា ឆ្នាំ២០២៤ សាលាដំបូងរាជធានីភ្នំពេញបានចេញដីកាសម្រេចឲ្យលោក រ៉ុង ឈុន នៅក្រៅឃុំ និងស្ថិតក្រោមការត្រួតពិនិត្យរបស់តុលាការ។ ដីកានេះបានបង្គាប់បញ្ជាមិនឲ្យលោក រ៉ុង ឈុន ចាកចេញពីប្រទេសកម្ពុជា និងមិនត្រូវផ្លាស់ប្តូរលំនៅឋាន ដោយគ្មានការអនុញ្ញាតពីចៅក្រមស៊ើបសួរ ។
កាលពីថ្ងៃទី៣១ ខែធ្នូ ឆ្នាំ២០២៤ នៅក្នុងសំណុំរឿងក្នុងបទមិនរាងចាលក្នុងបទមជ្ឈិម បន្ទាប់ពីលោកត្រូវបានផ្តន្ទាទោសក្នុងបទញុះញង់បង្កឲ្យមានភាពវឹកវរធ្ងន់ធ្ងរក្នុងសង្គម កាលពីឆ្នាំ២០២៤ ដូចខាងលើនេះ លោករ៉ុង ឈុន ត្រូវបានអយ្យការអមសាលាដំបូងរាជធានីភ្នំពេញ ចេញដីកាបង្គាប់ឲ្យចូលខ្លួនបំភ្លឺក្នុងសវនាការជាកំហិត នៅថ្ងៃទី១៧ ខែមករា ឆ្នាំ២០២៥ ។
លោក រ៉ុង ឈុន បានលើកឡើងថា នេះជារឿងចម្លែក ដែលតុលាការចោទប្រកាន់លោកពីបទមិនរាងចាល និងថា លោកមិនបានធ្វើអ្វីផ្ទុយពីបម្រាមរបស់តុលាការទាល់តែសោះ ព្រោះសកម្មភាពរបស់លោកកន្លងមក ជាការឈឺឆ្អាលនឹងសុខទុក្ខប្រជាពលរដ្ឋ ចុះជួបប្រជាពលរដ្ឋ និងជួយដោះស្រាយបញ្ហាដល់អ្នករងអយុត្តិធម៌ក្នុងសង្គមតែប៉ុណ្ណោះ៕