ភ្នំពេញ ៖ បក្សកាន់អំណាច (គណបក្សប្រជាជនកម្ពុជា) បានលើកឡើងថា ការព្យាយាមបំបែកបំបាក់ផ្ទៃក្នុងគណបក្សប្រជាជនកម្ពុជា ពីសំណាក់ក្រុមឧទ្ទាមក្រៅច្បាប់ ជ្រុលនិយម សម រង្ស៊ី ប្រៀបបាននឹងផ្សែង ឬខ្យល់ មិនអាចបានផលឡើយ ទោះពួកគេខិតខំរាប់សិបឆ្នាំមកហើយ តែផលវិបាកគឺវាបែរជាបែកបាក់ផ្ទៃក្នុងពួកវាទៅវិញ ។ ក្នុងន័យនេះ បក្សកាន់អំណាច បានហៅក្រុមឧទ្ទាមក្រៅច្បាប់ជ្រុលនិយមនោះ ដូចជាសត្វមមាចប្រឡែងភ្លើង ដោយមិនដឹងថាភ្លើងក្ដៅប៉ុនណា ។ លើសពីនេះ បក្សកាន់អំណាចថា ក្រុមឧទ្ទាមក្រៅច្បាប់ជ្រុលនិយម សម រង្ស៊ី ខំប្រឹងស្រែកកោកៗ អត់បានការ ដូចពាក្យចាស់ថា “កោកៗសឹកមាត់ត្រដោក ឆ្អែតពោះក្របី“។
លោកសុខ ឥសាន អ្នកនាំពាក្យគណបក្សប្រជាជនកម្ពុជា បានសរសេរនៅក្នុងទំព័របណ្ដាញសង្គម ហ្វេសប៊ុក “យុវជន៧មករា” នៅថ្ងៃទី១ ខែមេសា ឆ្នាំ២០២៥ ថា “ការព្យាយាមបំបែកបំបាក់ផ្ទៃក្នុងគណបក្សប្រជាជនកម្ពុជា ដែលក្រុមឧទ្ទាមក្រៅច្បាប់ជ្រុលនិយម ប្រៀបបាននឹងផ្សែងឬខ្យល់ មិនអាចបានផលឡើយ ទោះពួកវាខិតខំរាប់សិបឆ្នាំមកហើយ តែផលវិបាក គឺវាបែរជាបែកបាក់ផ្ទៃក្នុងពួកវាទៅវិញ។ អាសេង រតនា អាសៅ រ៉ាស៊ី ខិតខំទាល់តែងាប់ខ្លួនទៀត ក៏ឥតបានការដែរ។ ទោះបីក្រុមឧទ្ទាមក្រៅច្បាប់ជ្រុលនិយម ប្រែកាឡាខ្លួនទៅជាអ្វីក៏ដោយ ក៏គ្មានអ្វីប្លែកទេ វានៅតែជាឧទ្ទាមខុសច្បាប់ដដែល។ ប្រព័ន្ធឃោសនារបស់ក្រុមឧទ្ទាមក្រៅច្បាប់ជ្រុលនិយម អស់អីនិយាយមួលបង្កាច់រាជរដ្ឋាភិបាលកម្ពុជាហើយ ដោយសារការដឹកនាំមានការវិវត្តន៍រីកចម្រើនលើគ្រប់វិស័យ ផ្ទុយពីពួកវាឃោសនា ។ របស់ដែលហៅចលនាជាតិតស៊ូ អត់មានអីប្លែកទេ នៅបន្តតស៊ូឯក្រៅប្រទេស មួយជីវិត ដល់ងាប់ទៅ ។ ក្រុមឧទ្ទាមក្រៅច្បាប់ នៅតែធ្វើសកម្មភាពឯនាយសមុទ្រ បានតែស្រែកពីចម្ងាយ តើបានប្រយោជន៍អីខ្លះស្រែកប៉ុន្មានឆ្នាំហើយ បានផលអីខ្លះ? ហៅអ្នកនៅក្នុងស្រុក សុទ្ធតែឆ្កែខ្ញុំបម្រើបរទេស ចុះក្រុមឧទ្ទាមក្រៅច្បាប់ជ្រុលនិយម នៅបណ្តែតពោងពាយឯក្រៅប្រទេស យ៉ាងណាដែរ? ក្រុមឧទ្ទាមក្រៅច្បាប់ជ្រុលនិយម ថាមានសង្ឃឹម តើសង្ឃឹមអី? សង្ឃឹមនៅក្រៅប្រទេសមួយជីវិតទៅ? តែកុំចូលមកក្នុងស្រុក តែមក នឹងខ្នោះ! អាចារ្យហ្វី សារភាពថា នឹងឈប់ជេរ នៅជេរនិងឈប់ជេរ វានៅតែជាក្រុមឧទ្ទាមក្រៅច្បាប់ដដែល។ ក្រុមឧទ្ទាមក្រៅច្បាប់ថា ចង់ឃើញកម្មករនិយោជិត មានប្រាក់ឈ្នួលខ្ពស់ ប្រាក់ឈ្នួលខ្ពស់ បានមកពីការខិតខំ តែបើនៅស្រែកឯក្រៅប្រទេស អត់បានការទេ“ ។
លោកសុខ ឥសាន បានសរសេរបន្ថែមថា “ការយកទ្រឹស្តីកែម ឡី មកផ្សព្វផ្សាយ អត់បានប្រយោជន៍អីទេ បានត្រឹមជាប់ខ្នោះឥតប្រយោជន៍ សមដូចពាក្យចាស់ពោលថា នៅមិននៅ យកជ័រព្នៅមកត្បៀតក្លៀក។ នៅមិននៅ ចង់ជាប់ខ្នោះ នេះជាជំងឺអផ្សុក ។ ក្រុមឧទ្ទាមក្រៅច្បាប់ជ្រុលនិយម កំពុងប្រឡែងលេងនឹងភ្លើង ដូចសត្វមមាច បានត្រឹមឆេះខ្លួនខ្ទេច ។ ក្រុមឧទ្ទាមក្រៅច្បាប់ ចូលចិត្តកោកៗ សឹកឯមាត់ត្រដោក ឆ្អែតឯមាត់ក្របី ខំស្រែកជេររាល់ថ្ងៃ តើបានផលអី?…“ ។
បន្ថែមលើសំណេរតាមបណ្ដាញសង្គម ខាងលើនេះ លោកសុខ ឥសាន បានបញ្ជាក់ប្រាប់ “នគរធំ” នៅថ្ងៃទី៣ ខែមេសា ឆ្នាំ២០២៥ថា អ្វីដែលលោកថា ការព្យាយាមបំបែកបំបាក់ផ្ទៃក្នុងគណបក្សប្រជាជនកម្ពុជា ពីសំណាក់ក្រុមឧទ្ទាមក្រៅច្បាប់ជ្រុលនិយម ប្រៀបបាននឹងផ្សែងឬខ្យល់ មិនអាចបានផលឡើយ ទោះពួកគេខិតខំរាប់សិបឆ្នាំមកហើយ តែផលវិបាក គឺវាបែរជាបែកបាក់ផ្ទៃក្នុងពួកវាទៅវិញ និងថាក្រុមឧទ្ទាមក្រៅច្បាប់ជ្រុលនិយម ដូចជាសត្វមមាចប្រឡែងភ្លើង ខំប្រឹងស្រែកកោកៗ សឹកមាត់ត្រដោក ឆ្អែតពោះក្របីនោះ គឺលោកចង់បញ្ជាក់ក្នុងន័យជារួមថា ទោះក្រុមឧទ្ទាមក្រៅច្បាប់ជ្រុលនិយម ខំស្រែកជេរពីក្រៅមកយ៉ាងណាក៏ដោយ ក៏ផលវិបាកធ្លាក់ទៅលើខ្លួនវិញ ហើយអ្វីជាការពិត គឺរាជរដ្ឋាភិបាល ដឹកនាំកម្ពុជា មានការកសាង អភិវឌ្ឍរីកចម្រើន ដូចដែលជាតិនិងអន្តរជាតិ មានការវាយតម្លៃហើយ ។
លោកសុខ ឥសាន បានមានប្រសាសន៍ថា “បាទ! ការដែលខ្ញុំថា ការព្យាយាមបំបែកបំបាក់ផ្ទៃក្នុងគណបក្សប្រជាជនកម្ពុជា ដែលក្រុមឧទ្ទាមក្រៅច្បាប់ជ្រុលនិយម ប្រៀបបាននឹងផ្សែងឬខ្យល់ មិនអាចបានផលឡើយ ទោះពួកវាខិតខំរាប់សិបឆ្នាំមកហើយ តែផលវិបាកគឺវាបែរជាបែកបាក់ផ្ទៃក្នុងពួកវាទៅវិញនោះ អាហ្នឹងជាការជាក់ស្ដែង យើងឃើញហើយ មិនបាច់ទៅបកស្រាយឯណាឲ្យវាពិស្ដារទេ ។ តើសម រង្ស៊ី រត់ចេញទៅក្រៅប្រទេស ប៉ុន្មានឆ្នាំហើយ? ១០ឆ្នាំហើយ ហើយតស៊ូនយោបាយ ជាង៣០ឆ្នាំហើយ សួរថាបានផលប្រយោជន៍អី ក្នុងការបំបែកបំបាក់គណបក្សប្រជាជន នោះ? តែផ្ទុយទៅវិញទេ វាមានផលពិបាក ដោយសារក្រុមខ្លួនឯងហ្នឹង វាបែកបាក់ខ្លួនឯង ។ អ៊ីចឹងខ្ញុំលើកនេះ បញ្ហាហ្នឹងវាផ្សារភ្ជាប់ការជាក់ស្ដែងហើយ ដែលខិតខំបំបែកបំបាក់គណបក្សប្រជាជន ក៏ប៉ុន្តែជាផលវិបាកធ្លាក់មកលើខ្លួនឯង អ្នកដែលខិតខំបំបែកបំបាក់ហ្នឹង ។ អាហ្នឹងមានតែបញ្ហាប៉ុណ្ណឹងទេ វាអត់មានអីបកស្រាយឲ្យវាពិស្ដារទេ ។ និយាយទៅ ធ្លាក់ហ្នឹង គឺគាត់បែកបាក់ខ្លួនឯង ព្រាត់ប្រាសខ្លួនឯងហ្នឹង មានស្អីទៀត? ធ្វើនយោបាយ តាំងពីនៅក្នុងស្រុក រហូតដល់ក្រៅស្រុក ។ ដល់ក្រៅស្រុកហើយ អត់មានកម្លាំងនយោបាយគាំទ្រ ទាំងក្នុងប្រទេសក៏ធ្លាក់ចុះ ពីមុនមកហើយ យើងដឹងហើយ ២០១៣ ប៉ុន្មាន? ជិតកន្លះនគរ តែឥឡូវសួរថា កន្លះនគរ នៅឯណា? នៅ១០% វាមិនបានផង ។ អាហ្នឹងទៅសង្ឃឹមអី? ទៅធ្វើនយោបាយ វាដាំក្បាលចុះរហូត“ ។
លោកសុខ ឥសាន បានមានប្រសាសន៍បន្តថា “ភ្ជាប់ជាមួយចំណុចនេះហើយ ដែលខ្ញុំលើកឡើងថា ក្រុមឧទ្ទាមក្រៅច្បាប់ជ្រុលនិយម កំពុងប្រឡែងលេងនឹងភ្លើង ដូចសត្វមមាច បានត្រឹមឆេះខ្លួនខ្ទេចនោះ គឺខ្ញុំចង់បញ្ជាក់ថា អាហ្នឹងហើយ សភាពការណ៍ទាំងអស់ហ្នឹងហើយ ដែលវាជាការធ្លាក់ចុះរបស់ក្រុមឧទ្ទាមក្រៅច្បាប់ជ្រុលនិយមហ្នឹង គឺវាឃើញជាក់ស្ដែងហើយ ។ គេធ្វើនយោបាយ ឲ្យវាឡើង ក៏ប៉ុន្តែក្រុមឧទ្ទាមក្រៅច្បាប់ជ្រុលនិយមហ្នឹង ធ្វើនយោបាយធ្លាក់ចុះរហូត អាហ្នឹងហើយដូចមមាច ប្រលែងលេងនឹងភ្លើងអ៊ីចឹង វាអត់ស្គាល់ភ្លើង ។ ប៉ុន្តែរឿងថាអត់ស្គាល់ភ្លើង គឺអត់ស្គាល់គ្រោះថ្នាក់ដល់ខ្លួននោះ អាហ្នឹងមិនបាច់បកស្រាយអីទៀតទេ អាហ្នឹងយើងមើលជាក់ស្ដែងទៅតាមលទ្ធផលដែលជាទង្វើរបស់គាត់ដែលធ្វើកន្លងទៅនោះ។ ប៉ុន្តែយ៉ាងណា ខ្ញុំបានសង្កត់ធ្ងន់ហើយថា ក្រុមឧទ្ទាមក្រៅច្បាប់ ចូលចិត្តកោកៗ សឹកឯមាត់ត្រដោក ឆ្អែតឯមាត់ក្របី ខំស្រែកជេររាល់ថ្ងៃ តើបានផលអី? នោះ គឺអ៊ីចឹងហើយបានជាគណបក្សប្រជាជន មិនចង់ឆ្លើយតបជាមួយនឹងឧបាយកលរបស់ពួកជ្រុលនិយមទេ ។ អ៊ីចឹងហើយយើងមិនបាច់ឆ្លើយតបទេ អ៊ីចឹងវាស្របទៅតាមពាក្យសុភាសិតខ្មែរ “កោកៗសឹកឯមាត់ត្រដោក ឆ្អែតពោះក្របី អាហ្នឹងវាស្រែកជេរពីក្រៅមកយ៉ាងណាក៏ដោយ ក៏ប៉ុន្តែផលវិបាក ធ្លាក់ទៅលើវាវិញ តែតាមពិតថា រាជរដ្ឋាភិបាល ដឹកនាំកម្ពុជា មានការកសាង អភិវឌ្ឍរីកចម្រើន ដូចដែលជាតិនិងអន្តរជាតិ គេមានការវាយតម្លៃហើយ អាហ្នឹងមានពិបាកអីនឹងយល់?” ៕ កុលបុត្រ