រាជរដ្ឋាភិបាល ចេញអនុក្រឹត្យកំណត់ទម្រង់ថ្មី អត្តសញ្ញាណប័ណ្ណសញ្ជាតិខ្មែរ

ភ្នំពេញ ៖ រាជរដ្ឋាភិបាលកម្ពុជា បានចេញអនុក្រឹត្យកំណត់ទម្រង់អត្តសញ្ញាណប័ណ្ណសញ្ជាតិខ្មែរថ្មី ដោយកំណតទម្រង់ លក្ខណៈសម្គាល់ ព័ត៌មាន ការកំណត់សុពលភាព និងការកំណត់អាយុត្រូវផ្តល់អត្តសញ្ញាណប័ណ្ណសញ្ជាតិខ្មែរ ក្នុងគោលបំណងដើម្បីធានាការចុះបញ្ជីអត្តសញ្ញាណប័ណ្ណសញ្ជាតិខ្មែរ ឱ្យបានត្រឹមត្រូវ ស្របតាម គោលការណ៍កំណត់នៅក្នុងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

អនុក្រឹត្យរបស់រាជរដ្ឋាភិបាលកម្ពុជា លេខ ៤៧អនក្រ.បក ចុះថ្ងៃអង្គារ ៤កើត ខែចេត្រ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១ ខែមេសា ឆ្នាំ២០២៥ ដែលចុះហត្ថលេខាដោយសម្តេចនាយករដ្ឋមន្ត្រី ហ៊ុន ម៉ាណែត បានសម្រេច ដូចខាងក្រោម ៖

ជំពូកទី១

បទប្បញ្ញត្តិទូទៅ

មាត្រា១-

អនុក្រឹត្យនេះកំណត់អំពីទម្រង់ និងព័ត៌មានដែលមាននៅក្នុងបញ្ជីអត្តសញ្ញាណប័ណ្ណសញ្ជាតិខ្មែរ និងទម្រង់ លក្ខណៈសម្គាល់ ព័ត៌មាន ការកំណត់សុពលភាព និងការកំណត់អាយុត្រូវផ្តល់អត្តសញ្ញាណប័ណ្ណសញ្ជាតិខ្មែរ ក្នុងគោលបំណងដើម្បីធានាការចុះបញ្ជីអត្តសញ្ញាណប័ណ្ណសញ្ជាតិខ្មែរ ឱ្យបានត្រឹមត្រូវ ស្របតាមគោលការណ៍កំណត់នៅក្នុងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម។

មាត្រា២-

អនុក្រឹត្យនេះ មានវិសាលភាពអនុវត្តចំពោះការចុះបញ្ជីអត្តសញ្ញាណប័ណ្ណសញ្ជាតិខ្មែរ សម្រាប់បុគ្គលគ្រប់រូបដែលមានសញ្ជាតិខ្មែរ។

មាត្រា៣-

វាក្យសព្ទសំខាន់ៗដែលប្រើក្នុងអនុក្រឹត្យនេះ ត្រូវបានកំណត់និយមន័យដូចតទៅ ៖

១- អត្តសញ្ញាណប័ណ្ណសញ្ជាតិខ្មែរ សំដៅដល់ឯកសារផ្លូវការមួយសម្រាប់បញ្ជាក់អំពីអត្តសញ្ញាណបុគ្គលទាំងឡាយណាដែលមានសញ្ជាតិខ្មែរ។

២- ព័ត៌មានជីវមាត្រ សំដៅដល់ការវាស់ស្ទង់លក្ខណៈជីវសាស្ត្រ និងលក្ខណៈផ្សេងទៀត មានជាអាទិ៍ ស្នាមខ្មៅដៃ ប្រស្រីភ្នែក មុខ ហត្ថលេខា ឬសំឡេង ដែលអាចប្រមូលបានដោយឌីជីថល និងត្រូវបានប្រើប្រាស់សម្រាប់កំណត់អត្តសញ្ញាណរបស់បុគ្គលម្នាក់ៗ។

៣- លេខអត្តសញ្ញាណប័ណ្ណសញ្ជាតិខ្មែរ សំដៅដល់លេខសម្គាល់លើសន្លឹកអត្តសញ្ញាណប័ណ្ណសញ្ជាតិខ្មែរ ដែលផ្តល់ឱ្យប្រជាពលរដ្ឋខ្មែរ ម្នាក់ៗ តាមលំដាប់ នៅពេលស្នើសុំចុះបញ្ជីអត្តសញ្ញាណប័ណ្ណសញ្ជាតិខ្មែរដំបូង ឬស្នើសុំផ្តល់ថ្មីឡើងវិញ ក្នុងករណីខូចខាតឬបាត់បង់ ឬអស់សុពលភាព ឬកែតម្រូវទិន្នន័យ។

៤- កូដឆ្លើយតបរហ័ស (QR Code) សំដៅដល់សញ្ញាមានរាងបួនជ្រុង ដែលអាចអានបានដោយឧបករណ៍អេឡិចត្រូនិក ឬទូរសព្ទដៃ ដើម្បីបង្ហាញព័ត៌មានផ្សេងៗ។

៥- លេខកូដសម្គាល់អត្តសញ្ញាណបុគ្គល សំដៅដល់លេខកូដសម្រាប់សម្គាល់របស់បុគ្គលម្នាក់ៗ។ លេខកូដនេះត្រូវបានផ្តល់ជូនបុគ្គលម្នាក់ៗជាអចិន្ត្រៃយ៍ សម្រាប់ប្រើប្រាស់រហូតដល់បុគ្គលនោះទទួលមរណភាព។

៦- អត្តសញ្ញាណប័ណ្ណសញ្ជាតិខ្មែរ ទុតិយតា សំដៅដល់អត្តសញ្ញាណប័ណ្ណសញ្ជាតិខ្មែរដែលផ្តល់ថ្មីឡើងវិញ ក្នុងករណីអត្តសញ្ញាណប័ណ្ណនោះ មានការខូចខាត ឬបាត់បង់ ឬអស់សុពលភាព ឬកែតម្រូវទិន្នន័យ។

៧- អត្តសញ្ញាណឌីជីថលបុគ្គល សំដៅដល់ព័ត៌មានដែលបញ្ជាក់អត្តសញ្ញាណបុគ្គលក្នុងពិភពឌីជីថល ដែលព័ត៌មាននេះបានភ្ជាប់ទៅនឹងអត្តសញ្ញាណបុគ្គលក្នុងពិភពពិត។

ជំពូកទី២

ទម្រង់ និងព័ត៌មានដែលមាននៅក្នុងបញ្ជីអត្តសញ្ញាណប័ណ្ណសញ្ជាតិខ្មែរ

មាត្រា៤-

– បញ្ជីអត្តសញ្ញាណប័ណ្ណសញ្ជាតិខ្មែរ មានទម្រង់ជាអេឡិចត្រូនិក សម្រាប់កត់ត្រា រក្សាទុក និងបែងចែកទិន្នន័យបុគ្គលដែលប្រមូលបាននៅពេលចុះបញ្ជីអត្តសញ្ញាណប័ណ្ណសញ្ជាតិខ្មែរ តាមរយៈប្រព័ន្ធបច្ចេកវិទ្យាគមនាគមន៍ និងព័ត៌មាន។

– បញ្ជីអត្តសញ្ញាណបណ្ណសញ្ជាតិខ្មែរ ជាប្រភពទិន្នន័យសម្រាប់បង្កើតអត្តសញ្ញាណឌីជីថលបុគ្គល និងអាចធ្វើអន្តរកម្មជាមួយប្រព័ន្ធផ្សេងទៀតក្នុងទម្រង់ឌីជីថល។

មាត្រា៥-

ព័ត៌មានបុគ្គលក្នុងបញ្ជីអត្តសញ្ញាណប័ណ្ណសញ្ជាតិខ្មែរ មានដូចខាងក្រោម ៖

១- លេខកូដសម្គាល់អត្តសញ្ញាណបុគ្គលរបស់សាមីខ្លួន (បើមាន)។

២- លេខអត្តសញ្ញាណប័ណ្ណសញ្ជាតិខ្មែរ។

៣- ព័ត៌មានជីវប្រវត្តិរបស់សាមីខ្លួន មានដូចខាងក្រោម ៖

– នាមត្រកូលនិងនាមខ្លួន

– នាមត្រកូលនិងនាមខ្លួនជាអក្សរឡាតាំង

– ភេទ

– កម្ពស់

– ថ្ងៃខែឆ្នាំកំណើត

– ទីកន្លែងកំណើត

– ស្ថានភាពសញ្ជាតិខ្មែរ (សញ្ជាតិខ្មែរពីកំណើត ឬសញ្ជាតិខ្មែរដោយអាពាហ៍ពិពាហ៍ ឬសញ្ជាតិខ្មែរ ដោយសញ្ជាតូបនីយកម្ម)

– អាសយដ្ឋានបច្ចុប្បន្នរបស់សាមីខ្លួន

– លេខទូរសព្ទទំនាក់ទំនង

– អាសយដ្ឋានអ៊ីមែល (បើមាន)

– ឈ្មោះម្តាយ និងឬឪពុក និងលេខកូដសម្គាល់អត្តសញ្ញាណបុគ្គលរបស់ម្តាយ និងឬឪពុក (បើមាន)

– ព័ត៌មានផ្សេងទៀតតាមការកំណត់របស់រដ្ឋមន្ត្រីក្រសួងមហាផ្ទៃ។

៤- ព័ត៌មានជីវមាត្រ មានដូចខាងក្រោម ៖

– រូបថតឌីជីថល

– ស្នាមខ្ចៅដៃ

– ស្នាមស្កែនប្រស្រីភ្នែក (បើមាន)

– ហត្ថលេខាអេឡិចត្រូនិក

– ព័ត៌មានជីវមាត្រផ្សេងទៀតតាមការកំណត់របស់រដ្ឋមន្ត្រីក្រសួងមហាផ្ទៃ។

ក្នុងករណីព័ត៌មានជីវមាត្រ (ក្រៅពីរូបថតឌីជីថល) របស់បុគ្គលណាម្នាក់មិនអាចធ្វើការចាប់យកបានដោយមូលហេតុពិការភាព ឬមិនគ្រប់គ្រាន់តាមតម្រូវការនៃស្តង់ដាបច្ចេកទេស ក្រសួងមហាផ្ទៃ អាចកំណត់យកព័ត៌មានផ្សេងទៀតមកជំនួសព័ត៌មានជីវមាត្រដែលមិនអាចចាប់យកបាន។

៥- ព័ត៌មានអំពីការផ្តល់និងការគ្រប់គ្រងការផ្តល់អត្តសញ្ញាណប័ណ្ណសញ្ជាតិខ្មែរ មានដូចខាងក្រោម ៖

– ព័ត៌មានកាលបរិច្ឆេទដាក់ពាក្យស្នើសុំ

– កាលបរិច្ឆេទផ្តល់អត្តសញ្ញាណបណ្ណសញ្ជាតិខ្មែរដំបូង

– កាលបរិច្ឆេទផ្តល់ថ្មីឡើងវិញ ដោយមូលហេតុខូចខាត ឬបាត់បង់

– កាលបរិច្ឆេទផ្តល់ថ្មីឡើងវិញ ដោយមូលហេតុកែតម្រូវទិន្នន័យ

– កាលបរិច្ឆេទផ្តល់ថ្មីឡើងវិញ ពេលអស់សុពលភាព

– កាលបរិច្ឆេទមរណភាព

– កាលបរិច្ឆេទបាត់សញ្ជាតិខ្មែរ

– កាលបរិច្ឆេទនៃការដកហូតអត្តសញ្ញាណបណ្ណសញ្ជាតិខ្មែរ

– កាលបរិច្ឆេទអស់សុពលភាពអត្តសញ្ញាណបណ្ណសញ្ជាតិខ្មែរ

– ទិន្នន័យផ្សេងទៀត ដើម្បីបម្រើឱ្យការងារគ្រប់គ្រង

– ការចុះនិទ្ទេសផ្សេងៗ។

ជំពូកទី៣

ទម្រង់ លក្ខណៈសម្គាល់ ព័ត៌មាន ការកំណត់សុពលភាព និងការកំណត់អាយុត្រូវផ្តល់អត្តសញ្ញាណប័ណ្ណសញ្ជាតិខ្មែរ

មាត្រា៦-

– អត្តសញ្ញាណប័ណ្ណសញ្ជាតិខ្មែរ មានទម្រង់ជាសន្លឹកប្លាស្ទិក ឬធាតុផ្សំអំពីសារធាតុគីមីសំយោគផ្សេងទៀត និង/ឬជាទម្រង់អេឡិចត្រូនិក។

– សន្លឹកអត្តសញ្ញាណប័ណ្ណសញ្ជាតិខ្មែរ មានលក្ខណៈសម្គាល់ និងសុវត្ថិភាពពិសេស ដោយបង្កប់បន្ទះឈីបអេឡិចត្រូនិក និង/ឬកូដឆ្លើយតបរហ័ស ដែលផ្ទុកព័ត៌មានសំខាន់ៗលើអត្តសញ្ញាណប័ណ្ណសញ្ជាតិខ្មែរ។

– ទម្រង់ លក្ខណៈសម្គាល់ និងសុវត្ថិភាពពិសេស លើសន្លឹកអត្តសញ្ញាណប័ណ្ណសញ្ជាតិខ្មែរជាឧបសម្ព័ន្ធនៃអនុក្រឹត្យនេះ។

– អត្តសញ្ញាណប័ណ្ណសញ្ជាតិខ្មែរអេឡិចត្រូនិក ជាទិន្នន័យសម្គាល់អត្តសញ្ញាណប្រជាពលរដ្ឋខ្មែរក្នុងទម្រង់ជាអេឡិចត្រូនិក ដែលអាចធ្វើអន្តរកម្មជាមួយប្រព័ន្ធផ្សេងទៀត សម្រាប់សេវាកម្មឌីជីថល។

មាត្រា៧-

ព័ត៌មានបុគ្គលនៅលើអត្តសញ្ញាណប័ណ្ណសញ្ជាតិខ្មែរ មានដូចខាងក្រោម ៖

១- រូបថតផ្ទៃមុខរបស់សាមីខ្លួន។

២- លេខអត្តសញ្ញាណប័ណ្ណសញ្ជាតិខ្មែរ។

៣- នាមត្រកូលនិងនាមខ្លួន។

៤- នាមត្រកូលនិងនាមខ្លួន ជាអក្សរឡាតាំង។

៥- ថ្ងៃខែឆ្នាំកំណើត។

៦- ភេទ។

៧- កម្ពស់។

៨- ទីកន្លែងកំណើត។

៩- អាសយដ្ឋាន។

១០- សុពលភាព (ថ្ងៃផ្តល់ ដល់ថ្ងៃផុតកំណត់)។

១១- កិនភាគ។

១២- ហត្ថលេខា។

១៣- កូដទិន្នន័យសុវត្ថិភាពដែលអាចអានបានដោយម៉ាស៊ីន ឬឧបករណ៍អេឡិចត្រូនិក។

១៤- ព័ត៌មានផ្សេងៗទៀតតាមការកំណត់របស់រដ្ឋមន្ត្រីក្រសួងមហាផ្ទៃ។

មាត្រា៨-

អត្តសញ្ញាណប័ណ្ណសញ្ជាតិខ្មែរ ត្រូវផ្តល់ជូនបុគ្គលមានសញ្ជាតិខ្មែរគ្រប់រូប ដែលមានអាយុចាប់ពី ១៥ (ដប់ប្រាំ) ឆ្នាំ ឡើងទៅ។

មាត្រា៩-

អត្តសញ្ញាណប័ណ្ណសញ្ជាតិខ្មែរ មានសុពលភាពប្រើប្រាស់ ដូចខាងក្រោម ៖

ក- សុពលភាពរយៈពេល ១០ (ដប់) ឆ្នាំ គិតចាប់ពីកាលបរិច្ឆេទចេញអត្តសញ្ញាណប័ណ្ណសញ្ជាតិខ្មែរ ចំពោះបុគ្គលដែលមានអាយុចាប់ពី១៥ (ដប់ប្រាំ) ឆ្នាំ រហូតដល់ក្រោម ៦០ (ហុកសិប) ឆ្នាំ។

ខ-សុពលភាពអចិន្ត្រៃយ៍ គិតចាប់ពីកាលបរិច្ឆេទចេញអត្តសញ្ញាណប័ណ្ណសញ្ជាតិខ្មែរ ចំពោះបុគ្គលដែលមានអាយុចាប់ពី ៦០ (ហុកសិប) ឆ្នាំឡើង។

ជំពូកទី៤

អត្តសញ្ញាណប័ណ្ណសញ្ជាតិខ្មែរទុតិយតា

មាត្រា១០-

– ពាក្យសុំផ្តល់អត្តសញ្ញាណប័ណ្ណសញ្ជាតិខ្មែរទុតិយតា ត្រូវធ្វើជាលាយលក្ខណ៍អក្សរ និងត្រូវភ្ជាប់ឯកសារចាំបាច់មួយចំនួនតាមការកំណត់ដោយប្រកាសរបស់រដ្ឋមន្ត្រីក្រសួងមហាផ្ទៃ។

– បែបបទនិងនីតិវិធីនៃការផ្តល់អត្តសញ្ញាណប័ណ្ណសញ្ជាតិខ្មែរទុតិយតា ត្រូវកំណត់ដោយប្រកាសរបស់រដ្ឋមន្ត្រីក្រសួងមហាផ្ទៃ។

ជំពូកទី៥

អន្តរប្បញ្ញត្តិ

មាត្រា១១-

– អត្តសញ្ញាណប័ណ្ណសញ្ជាតិខ្មែរ ដែលធ្វើឡើងមុនពេលមានអនុក្រឹត្យនេះ ហើយនៅមានសុពលភាព ត្រូវបន្តប្រើប្រាស់រហូតដល់អស់សុពលភាព។

– ក្រោយពេលអនុក្រឹត្យនេះត្រូវបានអនុវត្ត នីតិវិធីណាដែលបានចាប់ផ្តើមហើយដោយអនុលោមតាម លិខិតបទដ្ឋានគតិយុត្តចាស់តែមិនទាន់ចប់ ត្រូវបន្តនីតិវិធីដោយអនុលោមតាមលិខិតបទដ្ឋានគតិយុត្តចាស់។

ជំពូកទី៦

អវសានប្បញ្ញត្តិ

មាត្រា១២-

បញ្ជីអត្តសញ្ញាណប័ណ្ណសញ្ជាតិខ្មែរ ដែលធ្វើឡើងមុនពេលមានអនុក្រឹត្យនេះ ត្រូវបន្តសុពលភាពអនុវត្តដូចនឹងបញ្ជីអត្តសញ្ញាណប័ណ្ណសញ្ជាតិខ្មែរ ដែលបានធ្វើឡើងតាមអនុក្រឹត្យនេះ។

មាត្រា១៣-

អនុក្រឹត្យលេខ៦០ អនក្រ.បក ចុះថ្ងៃទី១២ ខែមិថុនា ឆ្នាំ២០០៧ ស្តីពីអត្តសញ្ញាណប័ណ្ណសញ្ជាតិខ្មែរ អនុក្រឹត្យលេខ១៥៧ អនក្រ.បក ចុះថ្ងៃទី១៣ ខែតុលា ឆ្នាំ២០០៨ ស្តីពីអត្តសញ្ញាណប័ណ្ណសញ្ជាតិខ្មែរ អនុក្រឹត្យលេខ១៣២ អនក្រ.បក ចុះថ្ងៃទី២៣ ខែមិថុនា ឆ្នាំ២០១១ ស្តីពីការផ្តល់អត្តសញ្ញាណប័ណ្ណសញ្ជាតិ ខ្មែរទុតិយតា អនុក្រឹត្យលេខ២៧០ អនក្រ.បក ចុះថ្ងៃទី៣០ ខែវិច្ឆិកា ឆ្នាំ២០១១ ស្តីពីការកែសម្រួលមាត្រា១ និងមាត្រា៧ នៃអនុក្រឹត្យលេខ៦០ អនក្រ.បក ចុះថ្ងៃទី១២ ខែមិថុនា ឆ្នាំ២០០៧ ស្តីពីអត្តសញ្ញាណប័ណ្ណសញ្ជាតិខ្មែរ អនុក្រឹត្យលេខ១៩៨ អនក្រ.បក ចុះថ្ងៃទី៤ ខែមិថុនា ឆ្នាំ២០១៤ ស្តីពីការកែសម្រួលមាត្រា៤ នៃ អនុក្រឹត្យលេខ១៣២ អនក្រ.បក ចុះថ្ងៃទី២៣ ខែមិថុនា ឆ្នាំ២០១១ ស្តីពីការផ្តល់អត្តសញ្ញាណប័ណ្ណសញ្ជាតិ ខ្មែរទុតិយតា អនុក្រឹត្យលេខ១០៦ អនក្រ.បក ចុះថ្ងៃទី១៧ ខែកក្កដា ឆ្នាំ២០២០ ស្តីពីការកែសម្រួលមាត្រា១ថ្មី នៃអនុក្រឹត្យលេខ២៧០ អនក្រ.បក ចុះថ្ងៃទី៣០ ខែវិច្ឆិកា ឆ្នាំ២០១១ ស្តីពីការកែសម្រួលមាត្រា១ និងមាត្រា៧ នៃអនុក្រឹត្យលេខ៦០ អនក្រ.បក ចុះថ្ងៃទី១២ ខែមិថុនា ឆ្នាំ២០០៧ ស្តីពីអត្តសញ្ញាណប័ណ្ណសញ្ជាតិខ្មែរ និងបទប្បញ្ញត្តិទាំងឡាយណាដែលផ្ទុយនឹងអនុក្រឹត្យនេះ ត្រូវទុកជានិរាករណ៍។

មាត្រា១៤-

រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងមហាផ្ទៃ រដ្ឋមន្ត្រីគ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ… ៕ ខៀវទុំ