ភ្នំពេញ ៖ បន្ទាប់ពីព្រះគ្រូធម្មវិជ្ជា ជួន កក្កដា ព្រះវិន័យធរគណខេត្តតាកែវ និងជាព្រឹទ្ធបុរសរងនៃពុទ្ធិកសាកលវិទ្យាល័យព្រះសីហនុរាជ នាយកសាលាពុទ្ធិកនាងខ្មៅ និងជាព្រះចៅអធិការវត្តប្រាសាទនាងខ្មៅ ដែលសាង ផ្នួសអស់កាល២៧ឆ្នាំ បានសម្រេចលាចាកសិក្ខាបទ (សឹក) ក្រោមហេតុផល “អស់បុណ្យជាព្រះសង្ឃ” រួចមក នៅថ្ងៃទី២៨ ខែមីនា ឆ្នាំ២០២៥ ត្រូវបានតែងតាំងជាអនុរដ្ឋលេខាធិការក្រសួងធម្មការនិងសាសនា ធ្វើឲ្យមហា ជនលាន់មាត់ថា អតីតព្រះធម្មកថិក ជួន កក្កដា ល្បីតាំងពីនៅភេទជាព្រះសង្ឃ លុះសឹករួច ទទួលបានងារជាឯកឧត្តមភ្លាម។
យោងតាមព្រះរាជក្រឹត្យ លេខ នស រកត ០៣២៥ ៤៤៥ ដែលចុះហត្ថលេខាដោយសម្តេចហ៊ុន សែន ប្រមុខរដ្ឋស្តីទី ក្នុងព្រះបរមនាម និងតាមព្រះរាជត្រាស់បង្គាប់របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចុះថ្ងៃទី២៨ ខែមីនា ឆ្នាំ២០២៥ បានត្រាស់បង្គាប់តែងតាំង មុខតំណែង លោកជួន កក្កដា ជាអនុរដ្ឋលេខាធិការ នៃក្រសួងធម្មការនិងសាសនា។
គួរបញ្ជាក់ថា បន្ទាប់ពីអន្ទិត ជួន កក្កដា បានសម្រេចលាចាកសិក្ខាបទ កាលពីវេលាព្រឹកថ្ងៃទី១៩ ខែមីនា ឆ្នាំ២០២៥ រួចមក ក៏កើតមានការវែកញែកជាបន្តបន្ទាប់ ជុំវិញការសឹករបស់លោក ដោយមតិខ្លះបានចោទប្រកាន់ថា អន្ទិត ជួន កក្កដា ត្រូវបានសឹកដោយបង្ខំ ធ្វើឱ្យអន្ទិត ជួន កក្កដា បានចេញមុខបកស្រាយបំភ្លឺចំពោះការចោទ ប្រកាន់ខាងលើ ដោយអះអាងថា ការសឹករបស់លោក គឺពុំមានការបង្ខិតបង្ខំពីអ្នកណាម្នាក់ឡើយ គឺជាការសម្រេចចិត្ត និងជាការដាក់គោលដៅជីវិតផ្ទាល់ខ្លួនរបស់លោក។
សូមរំលឹកថា ភិក្ខុព្រះធម្មវិជ្ជា ជួន កក្កដា បានសម្រេចលាចាកសិក្ខាបទ (សឹក) កាលពីព្រឹកថ្ងៃទី១៩ ខែមីនា ឆ្នាំ២០២៥ ដោយបញ្ជាក់មូលហេតុថា «អស់បុណ្យជាព្រះសង្ឃ» បន្ទាប់ពីព្រះអង្គបានបួសជាព្រះសង្ឃ តាំងពីអាយុ១៣ឆ្នាំ ហើយបានស្ថិតនៅក្នុងភេទជាព្រះសង្ឃ អស់កាល២៧ឆ្នាំ៕