ភ្នំពេញ ៖ ក្មេងស្រីកម្សត់ម្នាក់ បានកើតជំងឺរលាកតម្រងនោម និងហើមសួត ក្នុងសភាពធ្ងន់ធ្ងរបំផុត ត្រូវបានក្រុមគ្រួសារដឹកបញ្ជូនមកសង្គ្រោះនៅមន្ទីរពេទ្យគន្ធបុប្ជា ត្រូវបានក្រុមគ្រូពេទ្យជំនាញ ជួយព្យាបាលនិងសង្គ្រោះ យ៉ាងយកចិត្តទុកដាក់ រហូតដល់អាការជំងឺបានសះស្បើយ។
តាមប្រភពមន្ទីរពេទ្យគន្ធបុប្ផាភ្នំពេញ បានឱ្យដឹងនៅព្រឹកថ្ងៃទី២៧ ខែសីហា ឆ្នាំ២០២៥ ថា ក្មេងស្រីអាយុ១២ឆ្នាំ ម្នាក់ មកពីខេត្តតាកែវ បានកើតមានជំងឺរលាកតម្រងនោម និងហើមសួតយ៉ាងធ្ងន់បំផុត។
ក្មេងស្រីជាអ្នកជំងឺនេះ ត្រូវបានក្រុមគ្រួសារដឹកបញ្ជូនមកសង្គ្រោះនៅមន្ទីរពេទ្យគន្ធបុប្ជា និងត្រូវបានក្រុមគ្រូ ពេទ្យជំនាញនៃមន្ទីរពេទ្យគន្ធបុប្ជាភ្នំពេញ ជួយពិនិត្យព្យាបាលយ៉ាងយកចិត្តទុកដាក់។ ក្មេងស្រីរូបនេះ ត្រូវបានសង្គ្រោះជីវិតដោយជោគជ័យ ក្រោយសម្រាកព្យាបាលអស់រយៈពេល១៣ថ្ងៃ ដោយម៉ាស៊ីនជំនួយដង្ហើម។
ពេលនេះ ក្មេងស្រីខាងលើ បានជាសះស្បើយពីជំងឺ និងអាចវិលត្រឡប់ទៅកាន់លំនៅឋានវិញ ប្រកបដោយស្នាមញញឹម៕