ភ្នំពេញ ៖ ឃ្លាំងលក់រថយន្តធុនធំមួយកន្លែងត្រូវបានឆាបឆេះយ៉ាងសន្ធោសន្ធៅ ឆាបឆេះអស់ក្បាល រថយន្តចំនួន៤គ្រឿងនិងតួរថយន្តមួយគ្រឿង បង្កអោយមានការ ភ្ញាក់ផ្អើលដល់រថយន្តពន្លត់អគ្គីភ័យបាញ់ពន្លតអស់៤គ្រឿងទើបរលត់ដែលហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី៣០ ខែមីនាឆ្នាំ២០១៧តាមបណ្តោយផ្លូវ៥៩៨ស្ថិតនៅក្នុងចំណុចដីឡូត៍មួយកន្លែងក្រុម៣ភូមិពោងពាយសង្កាត់ទួលសង្កែ ខណ្ឌឬស្សីកែវ។
សមត្ថកិច្ចបានឲ្យដឹងថា ម្ចាស់ឃ្លាំងមានឈ្មោះ លី អាន ភេទប្រុស អាយុ៤៧ឆ្នាំស្នាក់នៅកន្លែងកើតហេតុខាងលើ។
តាមប្រភពពត៌មានពីកម្មករនៅក្នុងឃ្លាំងលក់រថយន្តសុំមិនបញ្ចេញឈ្មោះបានប្រាប់អោយដឹងថា ឃ្លាំងរថយន្តនេះលក់តែរថយន្តធុនធំៗដូចជារថយន្តហ៊ីយ៉ាន់ដាយ និងរថយន្តកូរ៉េ ជាច្រើនគ្រឿង មានទាំងរថយន្តថ្មីនិងរថយន្តចាស់ផងដែរ ។ មុនពេលកើតហេតុ គាត់ជាមួយកម្មករដទៃទៀតកំពុងតែសំរាកយ៉ាងលង់លក់នៅក្នុងឃ្លាំងស្រាប់តែធុំក្លិនឈ្ងៀមនិងមានផ្សែងហុយចេញមកពីក្បាលរថយន្តភ្លាមៗនោះគាត់បានស្រែកហៅកម្មករដទៃទៀតនាំគ្នាយកបំពុងពន្លត់អគ្គីភ័យបាញ់និងខ្លះទៀតរត់ទៅអូសទុយោទឹកយកមកបាញ់ ប៉ុន្តែភ្លើងបានឆេះខ្លាំងពេកមិនអាចទប់ស្កាត់បានទើបផ្អើលដល់សមត្ថកិច្ចមូលដ្ឋានរាយការណ៍ទៅប្រាប់ខាងរថយន្តពន្លត់អគ្គីភ័យចុះមកអន្តរាគមន៍បាញ់ពន្លត់បានទាន់ពេលវេលា។
អគ្គីភ័យខាងលើនេះមានរថយន្តពន្លត់អគ្គីភ័យសរុបចំនួន7គ្រឿង ប្រើប្រាស់អស់៤គ្រឿងបានរលត់អស់ទាំងស្រុង និងឆេះខូចខាតក្បាលរថយន្តហ៊ីយ៉ាន់ដាយថ្មីៗចំនួន ៤គ្រឿង ព្រមទាំងឆេះខូចខាតតួរថយន្ត១គ្រឿងផងដែរ ។ អគ្គីភ័យខាងលើបានរលត់អស់ទាំងស្រុងនៅវេលាម៉ោង១២និង២០នាទីរំលងអាធ្រាត្រឈានចូលថ្ងៃទី៣១ខែមីនាឆ្នាំ២០១៧។
ចំពោះមូលហេតុដែលបង្កឲ្យមានអគ្គីភ័យឆាបឆេះនៅក្នុងរថយន្តខាងលើនេះទាំងសមត្ថកិច្ចនិងម្ចាស់ឃ្លាំងលក់រថយន្តមិនទាន់ដឹងពីមូលហេតុពិតប្រាកដទេ ៕ ឥន សាន់ស៊ី