ភ្នំពេញ៖ កម្មការិនីកាត់ដេរម្នាក់ត្រឡប់មកពីសួរសុខទុក្ខបងប្អូនឈឺ នៅមន្ទីរពេទ្យវិញត្រូវចោរឆក់កាបូបយកទៅបាត់ បណ្តាលឲ្យដួលម៉ូតូរងរបួសស្រាល ដែលហេតុការណ៍នេះបានកើតឡើងកាលពីវេលាម៉ោង០៤និង៣៥នាទីទៀបភ្លឺ ថ្ងៃទី១០ ខែមិថុនា តាមបណ្តោយផ្លូវជាតិលេខ៤ ទល់វិទ្យាល័យជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះមានឈ្មោះហេង រ៉ៃយ៉ា ភេទស្រី អាយុ២៥ឆ្នាំ មុខរបរជាកម្មកររោងចក្រ កាត់ដេរស្នាក់នៅភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅស្រុកអង្គស្នួលខេត្តកណ្តាល ជិះម៉ូតូម៉ាកស្កុកពី ពណ៌ក្រហម ។
ប្រភពព័ត៌មានពីនារីរងគ្រោះបានឲ្យដឹងថា នៅមុនពេលកើតហេតុ រូបនាងបានជិះម៉ូតូមកពី សួរសុខទុក្ខបងឈឺនៅមន្ទីរពេទ្យព្រះកុសមៈ ហៅមន្ទីរពេទ្យលោកសង្ឃ គោលបំណង
ត្រឡប់ទៅធ្វើការវិញ តាមបណ្តោយផ្លូវជាតិលេខ៤ ក្នុងទិសដៅកើតទៅលិច លុះមកដល់ម៉ោងកើតហេតុខាងលើ ស្រាប់តែមានជនសង្ស័យមានគ្នា២នាក់ ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស្លាកលេខ បានជិះម៉ូតូអែបជាប់ រួចបានធ្វើសកម្មភាពឆក់យកកាបូបយកទៅបាត់ ហើយជិះគេចខ្លួនបាត់តែម្តង ធ្វើឲ្យជនរងគ្រោះដួលម៉ូតូរងរបួសស្រាល។
ជនរងគ្រោះបានឲ្យដឹងថា នៅក្នុងកាបូបដែលជនសង្ស័យឆក់យកទៅបាត់នោះ មានលុយចំនួនលុយ៣០០$ និងលុយខ្មែរមួយចំនួនទៀត និងប័ណ្ណបសស មួយសន្លឹក។
ក្រោយពេលកើតហេតុ អ្នកឃើញហេតុការណ៍បានដឹកជនរងគ្រោះទៅដាក់ពាក្យបណ្តឹងនៅ ប៉ុស្តិ៍នគរបាលចោមចៅ រីឯម៉ូតូនារីរងគ្រោះវិញ បានទុកផ្ញើនៅការ៉ាស់សាំងតេលា បន្ទាប់ពីដាក់ពាក្យបណ្តឹងរួច ទើបទៅយកម៉ូតូវិញ ៕