ភ្នំពេញ ៖ ស្រ្តីជាប្រពន្ធស្លាប់នៅកន្លែងកើតហេតុ និងបុរសជាប្តីស្លាប់ ពេលបញ្ជូនដល់គ្លីនិក ឯកជន បន្ទាប់ពីជនរងគ្រោះជិះម៉ូតូដេញតាមជនសង្ស័យឆក់កាបូបនៅមុខសាលាបឋមសិក្សាភូមិឬស្សី សង្កាត់ស្ទឹងមានជ័យ ខណ្ឌមានជ័យ រហូតដល់មុខរោងចក្រផលិតមីម៉ាម៉ា ចំការដូងបានធាក់ម៉ូតូជនសង្ស័យឲ្យដួល ធ្វើឲ្យម៉ូតូជនរងគ្រោះជ្រុលទៅបុកគូទរថយន្ត បណ្តាលឲ្យដួលបោកក្បាលនឹងគូទរថយន្តស្លាប់២នាក់ប្តីប្រពន្ធ បន្សល់ទុកកូនប្រុសអាយុ២ឆ្នាំម្នាក់ រងរបួសស្រាល ដែលហេតុការណ៍គួរឲ្យរន្ធត់នឹកស្មានមិនដល់នេះ កើតឡើងនៅមុខរោងចក្រផលិតមីម៉ាម៉ាចំការដូង តាមផ្លូវលេខ២១៧ ហៅផ្លូវចំការដូង ក្នុងភូមិសំបួរ សង្កាត់ដង្កោ ខណ្ឌដង្កោ កាលពីវេលាម៉ោង៩យប់ ថ្ងៃទី២៨ ខែមិថុនា ឆ្នាំ២០១៧ ។
ជនរងគ្រោះដែលស្លាប់ក្នុងហេតុការណ៍ត្រូវជនសង្ស័យឆក់កាបូប២នាក់ប្តីប្រពន្ធ គឺប្រពន្ធស្លាប់នៅកន្លែងកើតហេតុ មានឈ្មោះថាន់ ចាន់វតី អាយុ២៨ឆ្នាំ មុខរបរអាជីវករ រីឯបុរសជាប្តីស្លាប់ពេលបញ្ជូនទៅដល់គ្លីនិកឯកជន ក្បែរកន្លែងកើតហេតុ មានឈ្មោះ មាន ពិសី អាយុ២៩ឆ្នាំ មុខរបរអាជីវករ ស្នាក់នៅក្នុងបូុរីពិភពថ្មី សង្កាត់ដង្កោ ខណ្ឌដង្កោ បន្សល់ទុកកូនប្រុសម្នាក់មានឈ្មោះមាន ពេជ្រចរណៃ អាយុ២ឆ្នាំរងរបួសស្រាល ។
ចំណែកជនសង្ស័យដែលឃាត់ខ្លួនបានម្នាក់ មានឈ្មោះ ផាន់ ម៉ន ភេទប្រុស អាយុ២៧ឆ្នាំមុខរបរកម្មករលីសែងនៅផ្សារនាគមាស ស្នាក់នៅផ្ទះជួលអត់លេខ ភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ បើកបរម៉ូតូមួយគ្រឿងម៉ាក ហុងដាឌ្រីម សេរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ ១DB-១៣៣៤ ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញជនរងគ្រោះបីនាក់ប្តីប្រពន្ធនិងកូនប្រុស អាយុ២ឆ្នាំម្នាក់ បានជិះម៉ូតូមួយគ្រឿងម៉ាក PCX ពណ៍ខៀវ ពាក់ស្លាកលេខភ្នំពេញ1DC-5728 តាមបណ្តោយផ្លូវ២១៧ ផ្លូវចំការដូង ក្នុងល្បឿនយ៉ាងលឿនទិសដៅពីជើងទៅត្បូង និងបានស្រែកចោរៗឆក់កាបូប ដេញតាមជនសង្ស័យម្នាក់ ដែលជិះម៉ូតូហុងដាឌ្រីម លុះមកដល់ចំណុចកើតហេតុ មុខរោងចក្រផលិតមីម៉ាម៉ាចំការដូង ជនរងគ្រោះបានជិះម៉ូតូទៅទន្ទឹមនឹងជនសង្ស័យ បានលើកជើងធាក់ម៉ូតូជនសង្ស័យ បណ្តាលឲ្យដួលរងរបួសស្រាល ចំណែកម៉ូតូជនរងគ្រោះជ្រុលទៅបុកគូទរថយន្តម៉ាក Morning ពណ៌ស អត់មានស្លាកលេខ ដែលកំពុងបន្ថយល្បឿន បម្រុងបត់ឆ្វេងត្រឡប់ក្រោយ បណ្តាលឲ្យជនរងគ្រោះទាំងបីនាក់ដួលបោកនឹងរថយន្ត ខ្ទាតបោកនឹងថ្នល់ ធ្វើឲ្យស្រ្តីជាប្រពន្ធដួលបាក់ស្លាប់ភ្លាមនៅៗនិងកន្លែងកើតហេតុភ្លាមៗ ចំណែកបី្តបោកក្បាលនឹងកញ្ចក់រថយន្តរងរបួសធ្ងន់ធ្ងរ ពេលបញ្ជូនទៅដល់គ្លីនិកសួគ៌ា ក្បែរកន្លែងកើតហេតុ បានស្លាប់ នៅសល់តែកូនប្រុសអាយុ២ឆ្នាំ រងរបួសស្រាល ។
ប្រភពព័ត៌មានបានបន្តទៀតថា ភ្លាមៗនោះ រថយន្តដែលជនរងគ្រោះជិះបុកពីក្រោយនោះ បានព្យាយាមបើករត់គេចចូលទៅឈប់ក្នុងបូរី ឡាយគង់ ផ្លូវបេតុង លេខ៦ ភូមិម័ល សង្កាត់ដង្កោ ខណ្ឌដង្កោ ត្រូវបានប្រជាពលរដ្ឋដែលឃើញហេតុការណ៍រាយការណ៍ប្រាប់សមត្ថកិច្ចឲ្យចុះមកអន្តរាគមន៍ ។
ក្រោយកើតហេតុ ជនសង្ស័យដែលរងរបួសស្រាល ត្រូវបានប្រជាពលរដ្ឋចាប់ឃាត់ខ្លួន និងស្វាគមន៍ម្នាក់មួយដៃម្នាក់មួយជើង ទើបប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលដង្កោ នាំយកទៅសួរនាំ។ នៅចំពោះមុខសមត្ថកិច្ច ជនសង្ស័យខាងលើ បានឆ្លើយសារភាពថា រូបគេពិតជាបានធ្វើសកម្មភាពឆក់កាបូបពីជនរងគ្រោះជាប្រពន្ធបានសម្រេចមែន គឺរូបគេបានធ្វើសកម្មភាពឆក់កាបូបពីជនរងគ្រោះនៅមុខសាលាបឋមសិក្សាភូមិឬស្សី តាមផ្លូវលេខ២១៧ ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ ហើយរូបគេបានព្យាយាមបើករត់គេចខ្លួន ក៏ត្រូវជនរងគ្រោះជិះម៉ូតូដេញតាមពីក្រោយរហូតមកដល់ចំណុចកើតហេតុ ជនរងគ្រោះជាអ្នកបើកម៉ូតូបានធាក់ម៉ូតូរបស់ជនរងគ្រោះ បណ្តាលអោយដួល ចំណែកម៉ូតូជនរងគ្រោះជ្រុលទៅបុកគូទរថយន្ត ។ ដោយឡែកកាបូបរបស់ជនរងគ្រោះដែលរូបគេឆក់ បានពេលដែលដួលម៉ូតូមិនដឹងថាខ្ទាតទៅណាបាត់ទេ ។
បច្ចុប្បន្នជនសង្ស័យ រួមនិងវត្ថុតាង ត្រូវបាននគរបាលប៉ុស្តិ៍នគរបាលរដ្ឋបាលដង្កោ ធ្វើការសាកសួររួច ទើបប្រគល់បន្តឲ្យនគរបាលប៉ុស្តិ៍ស្ទឹងមានជ័យ ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌមានជ័យ រង់ចាំបញ្ជូនបន្តទៅតុលាការ ដើម្បីធ្វើការចាត់ការទៅតាមច្បាប់។ ដោយឡែកម៉ូតូនិងរថយន្តនៅកន្លែងកើតហេតុ សមត្ថកិច្ចជំនាញចុះធ្វើការវាស់វែងយករថយន្តនិងម៉ូតូរបស់ជនរងគ្រោះទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ធ្វើការដោះស្រោយគ្នានៅពេលក្រោយ ចំណែកឯសពជនរងគ្រោះទាំងពីរនាក់ប្តីប្រពន្ធត្រូវសមត្ថកិច្ចប្រគល់ទៅឲ្យសាច់ញាតិដឹកយកទៅធ្វើបុណ្យតាមប្រពៃណីនៅឯផ្ទះ៕