ភ្នំពេញ៖ រថយន្តសង្រ្គោះបន្ទាន់របស់មន្ទីរពហុព្យាបាល និងសម្ភព សុខលាភ មេត្រី ប្រញាប់ទៅដឹកអ្នករបួសករណីគ្រោះថ្នាក់ចរាចរណ៍បើកលឿន ពេលមកដល់ផ្លូវបំបែកជា៤ ចាប់ហ្រ្វាំងមិនទាន់ ជ្រុលទៅបុករថយន្តឡិចស៊ីសជារថយន្តរបស់ក្រសួងការពារជាតិ ខ្ទាតទៅបុកចូលភោជនីយដ្ឋាន មយ៉ូរា៣៦០ ចំណែករថយន្តក្រឡាប់រងរបួសស្រាលអ្នកបើកបរដែលគ្រោះថ្នាក់ចរាចរណ៍នេះកើតឡើងនៅវេលាម៉ោង២និង៥០នាទីរំលងអាធ្រាត្រ ឈានចូលថ្ងៃទី៣០ ខែ កក្កដា ឆ្នាំ២០១៧ នៅចំណុចមុខភោជនីយ មយូរ៉ា៣៦០ តាមផ្លូវ៣៦០ កែងផ្លូវ១០៥ ស្ថិតនៅភូមិ៧ សង្កាត់បឹងកេងកងទី៣ ខណ្ឌចំការមន។
ប្រភពព័ត៌មានពីអ្នកឃើញហេតុការណ៍ បានប្រាប់អ្នកយកព័ត៌មានថា មុនកើតហេតុមានរថយន្តសង្រ្គោះមន្ទីរពហុព្យាបាលនិងសម្ភព សុខលាភ មេត្រី បើកបរក្នុងល្បឿនយ៉ាងលឿន តាមផ្លូវ៣៦០ ក្នុងទិសដៅពីកើតទៅលិច ចំណែករថយន្ត Lexus RX 400h ពណ៍ត្រេអ៊ី ពាក់ស្លាកលេខខេមរភូមិន្ទ០១ ២-៨០២៤ ជារថយន្តរបស់ក្រសួងការពារជាតិ បើកបរដោយបុរសម្នាក់តាមផ្លូវ១០៥ ក្នុងទិសដៅពីត្បូងទៅជើង មកដល់ចំណុចកើតហេតុបានបើកឆ្លងកាត់ទទឹងផ្លូវបានពាក់កណ្ដាល ស្រាប់តែរថយន្តសង្គ្រោះប្រញាប់ទៅដឹកអ្នករបួសករណីគ្រោះថ្នាក់ចរាចរណ៍បើកលឿនពេក ចាប់ហ្រ្វាំងមិនទាន់ជ្រុលទៅបុករថយន្ត Lexus ពេញទំហឹង ធ្វើឲ្យរថយន្តLexus រេចង្កូតចូលទៅបុកស្លាកភោជនីយដ្ឋាន មយ៉ូរា៣៦០ បាក់រានទេវតា បាក់ទ្វារហាង និងបាក់ខូចខាតសម្ភារៈមួយចំនួនទៀត ចំណែករថយន្តបង្កក្រឡាប់ផ្ងារជើង ធ្វើឲ្យអ្នកបើករថយន្តសង្រ្គោះរបួសបែកចិញ្ចើមបន្តិច ឡើងម៉ូតូឌុបទៅមន្ទីរពេទ្យដោយខ្លួនឯង។
ក្រោយកើតហេតុភាគីទាំងសងខាងមិនអាចចរចាគ្នាបាន សមត្ថកិច្ចបានចុះទៅវាស់វែងយក រថយន្តទាំងពីរគ្រឿងទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំធ្វើការដោះស្រាយតាមផ្លូវច្បាប់៕
