ខេត្តកណ្តាល ៖ ក្មេងស្ទាវដាច់យ៉ៃម្នាក់ ធ្លាប់ធ្វើសកម្មភាពគាស់ផ្ទះអ្នកជិតខាងលួចបានលុយ៣០ម៉ឺនរៀលម្តងញ៉ាម លុះលើកទី២ ក៏គាស់ផ្ទះចូលលួចម្តងទៀត ប៉ុន្តែបានប្រាក់តែ១៤០០រៀលប៉ុណ្ណោះ ស្រាប់តែចៃដន្យម្ចាស់ផ្ទះតាមទាន់ ក៏ចាប់ក្របួចប្រគល់ឱ្យសមត្ថកិច្ច ដោយចោទប្រកាន់ថា បានបាត់មាសអស់៥ជីឯណោះ។
ករណីចោរដាច់យ៉ៃលួចគាស់ផ្ទះបានប្រាក់១៤០០រៀល បែរជាត្រូវម្ចាស់ផ្ទះចោទថាលួចបានមាស៥ជីនេះ បានកើតមានការភ្ញាក់ផ្អើលឡើង កាលពីវេលាម៉ោង១២និង៣០នាទីថ្ងៃត្រង់ ថ្ងៃទី១២ ខែធ្នូ ឆ្នាំ២០១៧ នៅចំណុចភូមិរកា ឃុំក្រាំងយ៉ូវ ស្រុកស្អាង។
ជនរងគ្រោះជាម្ចាស់ផ្ទះ មានឈ្មោះប៊ុន ផល្លី ភេទស្រី អាយុ៤៦ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។ ចំណែកជនសង្ស័យ មានឈ្មោះកែន ស៊្រាង ហៅសឿ អាយុ២១ឆ្នាំ មានលំនៅក្នុងភូមិជាមួយគ្នា។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ កាលពីវេលាម៉ោង១២ និង៣០នាទីថ្ងៃត្រង់ ថ្ងៃទី១២ ខែធ្នូ ឆ្នាំ២០១៧ ជនសង្ស័យឈ្មោះកែន ស៊្រាង បានធ្វើសកម្មភាពយកកន្ត្រៃកាត់ដែក កាត់ជញ្ជាំងស័ង្កសីចូលផ្ទះរបស់ស្ត្រីរងគ្រោះឈ្មោះប៊ុន ផល្លី ខណៈដែលម្ចាស់ផ្ទះមិននៅ។ ក្រោយពេលចូលទៅដល់ខាងក្នុងផ្ទះ ជនសង្ស័យក៏បានធ្វើសកម្មភាពរើកកាយរបស់របរជនរងគ្រោះពេញក្នុងផ្ទះ និងលួចបានប្រាក់តែចំនួន១៤០០រៀលប៉ុណ្ណោះ។
ន្ទាប់មកជនសង្ស័យ ក៏បានចេញពីក្នុងផ្ទះខាងលើមកវិញ ស្រាប់តែពេលនោះ ឈ្មោះជុំ តុលា ដែលត្រូវជាកូនម្ចាស់ផ្ទះ មកទាន់បានឃើញជនសង្ស័យចេញពីផ្ទះខ្លួន ក៏រាយការណ៍ប្រាប់សមត្ថកិច្ចនគរបាលប៉ុស្តិ៍ក្រាំងយ៉ូវ ជួយអន្តរាគមន៍ដល់កន្លែងកើតហេតុ និងឃាត់ខ្លួនជនសង្ស័យបញ្ជូនមកប៉ុស្តិ៍ដើម្បីសាកសួរ។
នៅចំពោះមុខសមត្ថកិច្ច ជនសង្ស័យឈ្មោះកែន ស៊្រាង នៅសឿ បានឆ្លើយសារភាពថា រូបគេពិតជាបានធ្វើសកម្មភាពគាស់ផ្ទះចូលលួច ទ្រព្យសម្បត្តិរបស់ជនរងគ្រោះខាងលើមែន ប៉ុន្តែលួចបានប្រាក់តែចំនួន១៤០០រៀលប៉ុណ្ណោះ ព្រោះនៅក្នុងផ្ទះគ្មានអ្វីមានតម្លៃសោះឡើយ។ ជនសង្ស័យបានសារភាពបន្ថែមទៀតថា កាលពីអំឡុងឆ្នាំ២០១៦កន្លងទៅ រូបគេធ្លាប់ចូលលួចលុយនៅផ្ទះជនរងគ្រោះខាងលើម្តងដែរ ដោយកាលណោះ រូបគេលួចបានប្រាក់ចំនួន៣០ម៉ឺនរៀល និងបានយកទៅចាយ ទិញគ្រឿងញៀនជក់ទាំងអស់។
យ៉ាងណាក្តី ស្ត្រីរងគ្រោះជាម្ចាស់ផ្ទះ បានអះអាងថា គាត់មិនត្រឹមតែបាត់ប្រាក់១៤០០រៀលប៉ុណ្ណោះទេ តែថែមទាំងបាត់ទ្រព្យសម្បត្តិ មានតម្លៃរួមមានខ្សែដៃប្លាកទីន១ខ្សែ ទម្ងន់៣,៥ជី ព្រមទាំងចិញ្ចៀនប្លាកទីន១វង់ ទម្ងន់១,៥ជីទៀតផង។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿងបញ្ជូនខ្លួន ទៅកាន់អធិការដ្ឋាននគរបាលស្រុកស្អាងដើម្បីចាត់ការបន្តតាមនីតិវិធី៕