ខេត្តតាកែវ ៖ ស្ត្រីម្នាក់បានដើរចេញពីផ្ទះ ក្នុងគោលបំណងទៅខ្ចីលុយុពីស្ត្រីអ្នកភូមិម្នាក់ លុះទៅដល់ជួបតែបុរសជាប្តី និងប្រាប់ថា ប្រពន្ធរបស់ខ្លួនចេញទៅក្រៅបាត់ហើយ រួចក៏បានហៅមកសាកសួរនៅក្នុងផ្ទះថា មានការអី ទីបំផុតឃើញឱកាសស្ងាត់ល្អក៏ចាប់អូសដៃស្ត្រីរងគ្រោះ ចូលទៅក្នងផ្ទះចាប់រំលោភសេពសន្ថវៈរហូតដល់បានសម្រេច។
ករណីស្ត្រីចំណាស់ដើររកទៅខ្ចីលុយគេមិនបាន បែរជាត្រូវប្រុសព្រានចាប់រំលោភសេពសន្ថវៈ រហូតដល់បានសម្រេចនេះ បានកើតឡើងកាលពីវេលាម៉ោង៣និង១៥នាទីរសៀល ថ្ងៃទី២០ ខែធ្នូ ឆ្នាំ២០១៧ នៅចំណុចផ្ទះជនសង្ស័យ ស្ថិតក្នុងភូមិបឹង ឃុំលាយបូរ ស្រុកត្រាំកក់។
ជនសង្ស័យល្មោភកាមនោះ មានឈ្មោះ ប៉ាវ ម៉ុន អាយុ៤៥ឆ្នាំ មុខរបរកសិករ មានលំនៅក្នុងភូមិកើតហេតុខាងលើ។ ចំណែកស្ត្រីរងគ្រោះ មានឈ្មោះអ.ស.ខ អាយុ៥៣ឆ្នាំ មុខរបរកសិករ មានលំនៅក្នុងភូមិជាមួយគ្នា។
តាមសម្តីស្ត្រីរងគ្រោះ បានរៀបរាប់ប្រាប់ថា រវាងគាត់ និងក្រុមគ្រួសារជនសង្ស័យ គឺសុទ្ធតែជាមនុស្សស្គាល់រាប់អានគ្នា និងធ្លាប់ខ្ចីប្រាក់គ្នាដោះទ័លទៅវិញទៅមក។ នៅមុនពេលកើតហេតុ គាត់បានដើរចេញពីផ្ទះសំដៅទៅផ្ទះរបស់ជនសង្ស័យបំណងទៅជួបប្រពន្ធជនសង្ស័យ ដើម្បីខ្ចីលុយខ្លះយកមកប្រើការ លុះពេលគាត់ទៅដល់ ឃើញជនសង្ស័យនៅផ្ទះតែម្នាក់ឯង ទើបសាកសួរថា តើប្រពន្ធទៅណាហើយ? ពេលនោះ ជនសង្ស័យក៏ឆ្លើយថា ប្រពន្ធរបស់ខ្លួនចេញទៅក្រៅបាត់ហើយ បន្តិចទៀតទើបមកវិញ។
ស្ត្រីរងគ្រោះបន្តថា បន្ទាប់មកជនសង្ស័យ ក៏បានហៅគាត់ចូលទៅក្នុងផ្ទះ ដើម្បីសាកសួរថា មករកប្រពន្ធរបស់គេមានការអ្វី លុះក្រោយពីគាត់និយាយប្រាប់ថាគាត់មករកខ្ចីលុយ មិនទាន់រួចផុតពីមាត់ផង ស្រាប់តែជនសង្ស័យក៏បានចាប់អូសដៃរបស់គាត់ចូលទៅក្នុងផ្ទះ បន្ទាប់មក ក៏ធ្វើសកម្មភាពចាប់សម្រាតខោអាវគាត់ចេញអស់ និងរំលោភសេពសន្ថវៈគាត់ទាំងកំរោល រហូតដល់បានសម្រេចតែម្តង។
ក្រោយកើតហេតុ ស្ត្រីរងគ្រោះបានរត់ត្រឡប់មកផ្ទះវិញ លុះមកដល់ថ្ងៃទី២១ ខែធ្នូ ឆ្នាំ២០១៧ ទើបស្ត្រីរងគ្រោះបានទៅដាក់ពាក្យបណ្តឹងឱ្យសមត្ថកិច្ចជួយអន្តរាគមន៍រហូតឈានដល់ការចាប់ខ្លួនជនសង្ស័យនាំយកមកសាកសួរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានចាប់រំលោភសេពសន្ថវៈស្ត្រីរងគ្រោះរហូតដល់បានសម្រេច ប្រាកដមែន។
ជនសង្ស័យល្មោភកាមខាងលើ ត្រូវបានសមត្ថកិច្ចរៀបចំកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការបន្តតាមនីតិវិធី៕