ខេត្តកំពង់ធំ ៖ ស្ត្រីមានផ្ទៃពោះគ្រប់ខែម្នាក់ ឈឺពោះសម្រាល ក៏ត្រូវម្តាយមីងដឹកតាមម៉ូតូសំដៅទៅមន្ទីរពេទ្យ តែមិនទាន់ទៅដល់មន្ទីរពេទ្យផង ក៏សម្រាលនៅកណ្តាលផ្លូវបានកូនស្រីម្នាក់ បង្កឱ្យមានការភ្ញាក់ផ្អើលឡើង កាលពីវេលាម៉ោង១០និង៣០នាទីយប់ ថ្ងៃទី២៤ ខែមករា ឆ្នាំ២០១៨ នៅចំណុចក្បែរសាលាឃុំទ្រា តាមបណ្តោយផ្លូវលំក្រាលក្រួសក្រហម ស្ថិតក្នុងភូមិកោះ ឃុំទ្រា ស្រុកស្ទោង។
ស្ត្រីអភ័ព្វដែលសម្រាលកូនកណ្តាលផ្លូវ មានឈ្មោះព្រុំ ឡូត អាយុ២៨ឆ្នាំ មានប្តីឈ្មោះឃី ឃាន់ អាយុ៣៣ឆ្នាំ និងមានលំនៅក្នុងភូមិ រលួស ឃុំបន្ទាយស្ទោង ស្រុកស្ទោង។
តាមប្រភពពីសមត្ថកិច្ចមូលដ្ឋាន បានបញ្ជាក់ប្រាប់ថា កាលពីយប់ថ្ងៃទី២៤ ខែមករា ឆ្នាំ២០១៨ ខណៈដែលកម្លាំងប៉ុស្តិ៍នគរបាលទ្រា និងកម្លាំងប្រជាការពារកំពុងចុះល្បាតដើម្បីការពារសុវត្ថិភាពជូនបងប្អូនប្រជាពលរដ្ឋក្នុងមូលដ្ឋាន ស្រាប់តែប្រទះឃើញស្ត្រីម្នាក់ត្រូវជាម្តាយមីង ជិះម៉ូតូឌុបក្មួយស្រីដែលកំពុងមានផ្ទៃពោះគ្រប់ខែ និងកំពុងឈឺពោះសម្រាលតាមម៉ូតូ សំដៅទៅមន្ទីរពេទ្យបង្អែកស្រុកស្ទោង តែពេលធ្វើដំណើរមកដល់ចំណុចកើតហេតុខាងលើ ដោយសារក្មួយស្រី ស្រែកប្រាប់ថា ឈឺពោះខ្លាំងពេក ទើបស្ត្រីជាម្តាយមីងបានឈប់ម៉ូតូអែបថ្នល់ លុះបន្តិច ក្រោយមកក្មួយស្រីនោះ ក៏បានបែកទឹកភ្លោះសម្រាលបានកូនស្រីម្នាក់តែម្តង ទើបកម្លាំងសមត្ថកិច្ច រួមនឹងប្រជាការពារ ប្រញាប់ទាក់ទងសុំអន្តរាគមន៍ពីគ្រូពេទ្យមណ្ឌលសុខភាពឱ្យចុះមកជួយអន្តរាគមន៍ភ្លាមៗ។
តាមសម្តីស្ត្រីជាម្តាយមីង បានរៀបរាប់ប្រាប់ថា ក្មួយស្រីរបស់គាត់ម្នាក់នេះមានប្តីត្រឹមត្រឹមតែដោយប្តីរវល់ចេញទៅរកស៊ីនៅស្រុក ឆ្ងាយបាត់ទើបមិនបានជូនប្រពន្ធទៅពេទ្យសម្រាលកូន ហើយនៅមុនពេលកើតហេតុ ក្មួយស្រីបានត្អូញថាឈឺពោះ ទើបគាត់ប្រញាប់ជិះម៉ូតូ ដឹកក្មួយស្រីចេញពីផ្ទះនៅភូមិរលួស ឃុំបន្ទាយស្ទោង ស្រុកស្ទោង បំណងថាទៅសម្រាលកូននៅមន្ទីរពេទ្យបង្អែកស្រុកស្ទោង។
ស្រាប់តែពេលជិះមកដល់ចំណុចជិតសាលាឃុំទ្រា ដោយក្មួយស្រីរបស់គាត់ឈឺពោះខ្លាំងទ្រាំលែងបាន ទើបគាត់អែបម៉ូតូឈប់ និងដាក់ក្មួយស្រីឱ្យអង្គុយនៅអែបថ្នល់ បានបន្តិចនាង ក៏បែកទឹកភ្លោះសម្រាលកូនតែម្តង។
ស្របពេលនោះសមត្ថកិច្ច និងកម្លាំងប្រជាការពារបានចេញល្បាតមកដល់ប្រទះឃើញល្មម ប៉ុន្តែដោយមិនទាន់ធ្លាក់សុកមកអស់ ទើបសមត្ថកិច្ចបានរាយការណ៍ទៅកាន់មណ្ឌលសុខភាពទ្រា តែមិនទាន់បានរាយការណ៍ផង គាប់ជួនពេលនោះ មានបុគ្គលិកនៅមណ្ឌលសុខភាពជាស្ត្រី២នាក់បានមកដល់ជួបហេតុការណ៍នោះដែរ ក៏នាំគ្នាជួយសង្គ្រោះបានទាន់ពេលវេលា ហើយក៏ដឹកបញ្ជូនក្មួយស្រីរបស់គាត់ ទៅសម្រាកនៅមន្ទីរពេទ្យបង្អែកស្រុកស្ទោងប្រកបដោយសុវត្ថិភាព៕